De Stiernforschasch sochten no de Juden äa niejebuarnen Kjennich
2
1-2 Jesus wia to dän Groota Kjennich Herodes siene Tiet, en daut Darp von Betlehem, en de Jäajent von Judäa jebuaren. Un seet junt, een Stoot no Jesus siene Jeburt, dan wieren doa atelje Stiernforschasch, von een Launt von wiet em Oosten jekomen. Wiel aus see noch wieren Tus jewast, dan hauden see een besondren Stiern jeseenen, waut de Juden äa Kjennich sien Tieekjen wia. Un aus de Stiernforschasch bat Jerusalem kjeemen, dan forschten see no de Juden äa niejebuarna Kjennich, wiel see am aunbäden wullen.3 Aus Kjennich Herodes jehieet haud, daut de Stiernforschasch no de Juden äa Kjennich sochten, dan baudad am daut sea, wiel hee wull daut nich tooloten, daut am irjentwäa met eemol daut Kjennichrikj wajchnämen sull. Un wan Kjennich Herodes waut baudad, dan baudad de Menschen von Jerusalem daut uk, wiel see wisten nich waut met äant passieren wudd. 4 Un Herodes roopt sikj aul de Juden äare väastonende Priestasch un Schreftjelieede toop, un hee befruach sikj daut aun äant, wua de Profeeten jesajcht hauden, daut de Christus jebuaren woaren sull.
5 Un de väastonende Priestasch un Schreftjelieede jeewen Herodes dise Auntwuat, "Gott haud daut aul sea lang trigj von sien Profeet loten dol schriewen, daut de Christus sull en daut Darp von Betlehem, en de Jäajent von Judäa jebuaren woaren.
6 'Jie Menschen von Betlehem, von de Jäajent von Judäa.', schreef de Profeet, 'Horcht emol häa!
Jun Darp es nich daut jerinjste, von de judäische Städa,
wiel von jun Darp saul een Kjennich komen,
dee mien israelitischet Volkj soo leiden woat, aus een Hoad siene Schop leit.'"
7 Aus Kjennich Herodes daut jehieet haud, dan roopt hee sikj de Stiernforschasch plietsch oppoat, un hee befruach äant krakjt wanea see dän Stiern toom ieeschtemol jeseenen hauden. 8 Un aus see am daut dan jesajcht hauden, dan schekjt hee äant no Betlehem, un säd, "Sieekjt aulewäajen no daut Kjint, un wan jie daut jefungen hant, dan sajcht mie wua daut es, soo daut ekj daut uk aunbäden kaun."
9 Aus de Stiernforschasch sikj dän Kjennich hauden aunjehieet, dan reisden see loos, un sochten no daut Kjint. Un seet junt, de Stiern dän see em Oosten jeseenen hauden, jinkj ver äant bat bowa daut Hus wua daut Kjint wia, un doa bleef dee stonen. 10 Un aus see dän Stiern bowa daut Hus sagen, dan freiden see sikj äwa Moten sea, wiel schlieslich hauden see dän niejebuarnen Kjennich jefungen. 11 Dan jinjen see em Hus nen, un see fungen daut Kjint bie siene Mutta Maria, un see kjneeden sikj ver daut Kjint han, un see bäden daut aun. Dan pakten see äare Jeschenkja ut, un see schonken daut Kjint Golt, Weiruaka, un Mirrenb.
12 Un aus de Stiernforschasch trigj nom Oosten no Hus reisen wullen, dan woarnd Gott äant en een Droom, daut see oppe Trigjwajch nich bie Herodes aunhoolen sullen, un soo reisden see too een aundren Wajch no Hus.
Gott woarnd Josef, daut Herodes dän jungen Jesus doot moaken wull
13 Aus de Stiernforschasch aul wieren loos jereist, dan seet junt, dan kjeem doa met eemol een Enjel vom Harn, no Josef en een Droom, un säd, "Josef, sto opp un nemm daut Kjint, un daut Kjint siene Mutta, un kleift ut no daut Launt von Ägipten, un blieft doa bat ekj die wada sajen woa. Wiel de Kjennich Herodes woat siene Soldoten rut schekjen, om daut Kjint to sieekjen, un om daut doot moaken."
14 Dan stunt Josef vom Schlop opp, un hee neem Maria un daut Kjint, un see reisden noch en de selwje Nacht loos. 15 Un see bleewen en Ägipten, soo lang bat Herodes jestorwen wia. Un soo wia daut dan mäajlich, daut aules soo passieren kunn, aus de Har daut von sien Profeet, aul sea lang trigj haud dol schriewen loten.
"Ut Ägipten," schreef de Profeet, "ha ekj mien Sän jeroopt."
Herodes leet de Junkjes von de Omjäajent von Betlehem doot moaken, wiel hee de Juden äa niejebuarna Kjennich ombrinjen wull
16 Aus Kjennich Herodes daut wia enjeworden, daut de Stiernforschasch am hauden aunjeschmäat, dan wia hee sea doll. Un soo befool hee siene Soldoten, daut see aul dee Junkjes sullen doot moaken, dee tweejoasch un doarunja wieren, dee en Betlehem, un doa rom wonden. Kjennich Herodes haud aul von onjeväa jewist woo oolt Jesus sennen kunn. Wiel hee haud sikj daut von de Stiernforschasch no jeforscht wanea see dän Stiern jeseenen hauden, un soo haud hee sikj daut utjeräakjent, daut daut Kjint twee Joa oolt sennen kunn. 17 Un aus de Soldoten de Junkjes hauden doot jemoakt, dan wia daut passieet waut Gott sien Profeet Jeremia, aul sea lang trigj haud dol schriewen loten.
18 "En daut Darp von Rama,"c schreef Jeremia,
"doa hieet eena woo de Frues bettalich hielen.
De Frues, dee von Rahel staumen,
hielen wiel äare Kjinja doot sent,
un see loten sikj nich treesten."
Josef brocht siene Famielje trigj no Israel
19 Oba no däm daut Kjennich Herodes jestorwen wia, dan seet junt, dan kjeem de Enjel vom Harn, en Ägipten no Josef, en een Droom, un säd, 20 "Josef, sto opp un nemm daut Kjint, un daut Kjint siene Mutta, un trakjt trigj no daut Launt von Israel, wiel dee waut daut Kjint wullen doot moaken, sent jestorwen."
21 Dän näakjsten zemorjes wia Josef vom Schlop opp jestonen, un hee neem Maria un daut Kjint, un see trocken trigj no Israel. 22 Oba Josef haud sikj je-enjst aus hee jehieet haud, daut Archelaus, en Judäa de niea Harscha wia. Wiel Archelaus wia Kjennich Herodes sien Sän, un hee rejieed en sienen Voda siene Städ. Un Gott befool Josef wada derch een Droom, daut see no de Jäajent von Galiläa trakjen sullen. 23 Un doa wonden Josef un Maria en een Darp waut Nazaret heet. Un soo wia daut dan mäajlich, daut aules soo passieren kunn, aus Gott daut von sien Profeet aul sea lang trigj haud dol schriewen loten.
"Am woaren see een Nazarena nanen.", schreef de Profeet.