Dit es de Goode Norecht, dee Markus jeschräwen haud, von Jesus, dän Gott aus Kjennich enjesäajent haud.
Daut Evangeliuma von Markus
Väawuat
Woarschienlich haud Markus disen Breef fa de Nich-Juden jeschräwen, dee en de Staut von Room jewont hauden. Sien Ziel wia daut hee de Läsa daut erkjläaren wull wäa Jesus wia.
De Markus Breef beschrift woo de Jinja daut langsom wia kloa jeworden wäa Jesus werkjlich wia. Jesus wia nämlich eena dee de Kranken jeheelt haud, un dee Wundatieekjens jedonen haud, om de Menschen to halpen, un om äant to bewiesen, daut see sikj opp siene Lieren veloten kunnen. Un aus Jesus siene Jinja lota jefroacht haud wäa hee wia, dan haud Petrus daut kloa erkjant, daut Jesus Gott sien Enjesäajenda Kjennich wia. (Markus 8)
De Markus Breef beschrift uk woo de Jinja dan aula met Jesus toop no de Staut von Jerusalem jegonen wieren, un woo Jesus sikj met de Judenfierasch vestemt haud, un woo see am dan orrajcht jerecht hauden. Jo, Jesus wia dee waut de Kranken jesunt jemoakt haud, un dee dusende Menschen to äten jejäft haud, un dee soogoa atelje Menschen vom Doot oppjewoakt haud, un dän hauden de Judenfierasch orrajcht verem Jerecht jenomen, un dan hauden see am loten doot moaken. Oba de Markus Breef beschrift uk woo Gott Jesus vom Doot oppjewoakt haud, un woo hee daut dan haud kloa jemoakt, daut Jesus nich bloos irjent een Mensch wia.
De Jinja un de aundre Gleubje hauden nämlich jedocht daut Jesus jekomen wia, om de Reema äare rejierunks Macht von äant wajch to nämen, soo daut hee dan äa Kjennich sennen kunn. Oba Jesus wia Gott sien Utjewälda Sän, dee aus een Mensch to Welt jekomen wia, un dän Gott von manke Menschen rut jewält haud, om aules soo ut to fieren, aus Gott daut aul von de Erschaufunk aun fa de Menschheit jeplont haud. Un aus Jesus vom Doot oppjestonen wia, dan haud hee dän beesen Fient de Doodes Macht wajch jenomen, waut hee lang äwa aule Menschen jehaut haud, un dan haud Jesus daut mäajlich jemoakt, daut eena daut eewje Läwen kaun han. Wäa sikj dan tru opp Gott velat, woat nochmol nich bloos von de Strof enne Hal jerat woaren, dee woat dan uk een Deel en Gott siene Rejierunk kjriejen, wan Jesus aus Kjennich trigj no de Ieed komen woat.