Dit es de Jeschicht, dee Lukas jeschräwen haud, von woo de Heilje Jeist derch de Apostel jeschauft haud.
De Aposteljeschichte
No dän daut Jesus vom Doot oppjestonen wia, dan bewees hee siene Apostel daut hee wada läwd, un hee vespruak äant dän Heiljen Jeist
1
1-2 Leewa Teophilus, en daut ieeschte Buak schreef ekj die von aules waut Jesus jedonen un jelieet haud, von don aus hee met sien Deenst aunjefungen haud, bat Gott am nom Himmel jenomen haud. Oba ea hee nom Himmel jefoaren wia, dan räd hee met siene utjewälde Apostel, un derch dän Heilje Jeist siene Krauft, säd hee äant em verut waut see aules doonen sullen, wan hee nich mea mank äant sennen wudd.3 Un no dän daut Jesus jeläden un jestorwen wia, dan läwd hee 40 Doag oppe Ieed ea hee nom Himmel jefoaren wia, un hee bewees siene Apostel daut opp veschiedne Wäaj, daut hee werkjlich wada läwendich wia. Un hee kjeem foaken no siene Apostel, un hee vetald äant von woo Gott äwa aules rejieren deit.
Ea Jesus nom Himmel jefoaren wia, dan vetald hee siene Apostel daut see fa am zeijen wudden
4 Un opp eene soone Jeläajenheit, dan befool Jesus siene Apostel, un säd, "Blieft soo lang en Jerusalem, bat mien Voda junt sien vesproaknen Heilje Jeist schenkjen woat, von dän ekj junt aul vetalt ha. 5 Wiel Johanes haud junt bloos met Wota jedeept, oba nu om atelje Doag wieda woat Gott junt, met däm Heiljen Jeist deepen."a
6 Un wiel Jesus siene Apostel soont vetalt haud, dan fruagen see am opp eene aundre Jeläajenheit, "Har, es daut nu soo wiet daut du Israel friemoaken woascht, un daut du aus Kjennich äwa ons rejieren woascht?"
7 Un Jesus auntwuad äant, un säd, "Bloos mien Voda haft de Vollmacht to bestemmen wan daut aula passieren woat, un de Dotems un Tiedenb wan daut aula passieren woat bruck jie nich weeten. 8 Oba waut jie weeten sellen, es daut wan jie dän Heiljen Jeist jekjräajen hant, dan woat hee junt de Krauft jäwen, soo daut jie fa Gott läwen kjennen. Un dan woat de Heilje Jeist junt de Krauft jäwen, soo daut jie en Jerusalem, un äwa de gaunze Jäajende von Judäa un Samarieen, un uk äwa de gaunze Welt, fa mie woaren zeijen kjennen. Un dan woa jie aulem vetalen, waut jie von mie jeseenen un jehieet hant."
9 Un aus Jesus daut jesajcht haud, dan neem Gott am enne Hecht nom Himmel, un siene Apostel stunden un kjikjten woo hee manke Wolkjen veschwunk. 10-11 Un aus see noch emma sea enne Hecht kjikjten, dan stunden doa met eemol twee Enjel biesied äant, dee met witte Kjleeda aunjetrocken wieren, un see säden, "Mana von de Jäajent von Galiläa, too waut sto jie hia bloos un kjikjen enne Hecht? Dis Jesus, dän jie hinjaraun kjikjen, haft Gott em Himmel oppjenomen, un soo aus jie am enne Wolkjen veschwinjen sagen, soo woat hee wada, von manke Wolkjen, trigj no de Ieed komen."
De Apostel vesaumelden sikj foaken toom bäden, un see wälden sikj een nieen Apostel, dee äant en Judas siene Städ halpen sull
12 Un aus de Apostel jehieet hauden waut de Enjel äant jesajcht haud, dan veleeten see dän Boajch, dän see dän 'Eeljboajch' nanen, un see jinjen trigj no Jerusalem, waut soo wiet auf wia, aus de Juden aum Sabat gonen durwen. 13 Un aus see bat Jerusalem kjeemen, dan jinjen see no de bowa Stow, wua de Gleubje sikj to dee Tiet emma troffen.
Un dee waut sikj doa emma toop troffen wieren,
Petrus, un Johanes,
un Jakobus, un Andreas,
un Philippus, un Thomas,
un Bartolomäus, un Matthäus,
un dee aundra Jakobus, de Sän von Alphäus, un Simon, dee mol to ne Partie jehieed, dee Israel von de Reema friemoaken wull,
un Judas, de Sän von Jakobus.
14 Un see wieren sikj aula eenich, un see vesaumelden sikj pinkjlich toom bäden, un Jesus siene Mutta Maria, un siene Breeda, vesaumelden sikj uk met äant toop, un doatoo uk de Frues waut Jesus bedeent hauden.
15-17 Un atelje Doag lota, aus sikj doa bie 120 Gleubje en de bowa Stow vesaumelt hauden, dan stunt Petrus opp, un säd, "Leewe Jeschwista, de Heilje Jeist haud daut aul lang em verut, von Kjennich David, en de Schreften loten dol schriewen, waut Judas korz passieet wia. Jesus haud am met ons toop aus een Apostel aunjestalt, un hee haud uk een Poat aun dän Deenst jekjräajen, waut Jesus ons jejäft haud. Un doch haud Judas de Mana no Jesus jebrocht, soo daut see am faustnämen kunnen."
18 Un met daut Jelt waut Judas jekjräajen haud, aus hee Jesus verot haud, koft hee sikj een Flekj, un daut es wua hee sikj jehongen haud. Un aus sien Kjarpa no de Ieed jefollen wia, dan plauzt dee soo opp, daut aul siene Doarm rut kjawlden. 19 Un daut dieed nich lang, un dan wisten aul de Enwona von Jerusalem, waut met Judas passieet wia. Un von dan aun nanden see daut Flekj 'Hakeldamach'; daut meent oppe Aramäische Sproak, 'Bloot Flekj', ooda 'Bloodjet Flekj'.c
20 Un Petrus räd wieda, un vetald de 120 Gleubje waut sikj en de bowa Stow vesaumelt hauden, waut Kjennich David en de Psalmen von Judas jeschräwen haud. Un Petrus säd,
'Siene Wonstäd saul ladich stonen,
un kjeena saul dee bewonen.'
Un opp eene aundre Städ sajcht daut,
'Sien Aumt saul sikj een aundra äwanämen.'"
21-22 "Un dis aundra," säd Petrus, "waut sikj Judas sien Aumt äwanämen saul, mott soona sennen, dee von dan met ons toop wia, aus Johanes Jesus jedeept haud, bat Gott am nom Himmel jenomen haud. Un dee mott daut uk met ons toop beläft han, woo Jesus mank ons jeläft un jeschauft haud, un dee mott daut nu met ons toop wieda vetalen, daut Jesus wada läwen deit."
23 Un von de Gleubje waut sikj en de bowa Stow vesaumelt hauden, worden twee Mana fa daut Apostel Aumt väajeschloagen. Eena von dee heet Josef, dän see Barsabbas nanen, un dän see uk Justus nanen, un dee aundra heet Matthias.
24-25 Un dee waut sikj doa vesaumelt hauden, bäden too Gott, un säden, "Har, du kjanst aule Menschen, un du weetst wäa wie werkjlich sent. Un soo wies ons nu, woona von dise beid, ons en Judas siene Städ methalpen saul. Judas haud sien Aumt toch jeloten, un es nu no de Städ jegonen, wua hee han jehieet. Un soo wies ons nu, wäa en siene Städ wieda schaufen saul." 26 Un doaropp trocken see Lessa, un daut Loss foll opp Matthias, un soo wort Mattias de twalfta Apostel.