Johanes muak de Juden fa Jesus, dän Enjesäajenden Kjennich,a reed
3
Väle Joaren lota, aus Jesus noch emma en Nazaret jewont haud, dan kjeem Johanes de Deepab no de Wiltnis von Judäa, wua hee to de Juden prädijd. 2 Un dit es waut Johanes siene Bootschoft wia, "Doot jun beeset Denkjens Oat endren, wiel Gott em Himmel es reed, aus Kjennich äwa junt to rejieren." 3 Wan Johanes soo aus dit jeprädicht haud, dan deed hee waut Gott aul lang em verut von am jesajcht haud, aus hee daut von sien Profeet Jesaja, haud soo aus dit dol schriewen loten."Jie Juden woaren enne Wiltnis ne lude Stemm hieren," schreef Jesaja,
"un de Bootschoft waut jie hieren woaren es dit,
'Moakt junt june Hoaten soo fa dän Harn reed,
aus wan eena een Wajch fa een Harscha reed moakt.
Wan de Har no junt komen woat,
dan sell jie secha moaken daut am nuscht em Stich es.'"
4 Aus Johanes uk schlieslich soo jekomen wia, aus Gott daut jeprofezeit haud, dan kjeem hee oba mau aus een eefacha Mensch. Siene Kjleeda wieren von Kameelenhoa jekjnet, un hee haud een Ladanen Belt om, un hee eet jeweenlich emma bloos Heischrakjen un willa Honnich. 5-6 Un väle Menschen kjeemen no Johanes enne Wiltnis, wiel see sikj am aunhorchen wullen. See kjeemen von Jerusalem, un von de Jäajent von Judäa, un von de gaunze Jordan Jäajent, un dee waut äare Sinden bekjanden, leeten sikj von Johanes em Jordan Riefac deepen.
7 Un doa wieren oba väle Pharisäa un Saduzäad, waut doa uk no Johanes kjeemen, dee sikj uk von am wullen deepen loten. Oba aus Johanes daut wia enjeworden, daut see sikj äare beese Denkjens Oat nich jeendat hauden, dan woarnd hee äant, un säd, "Jie Schlangen Nast!e Mie staunt daut daut jie daut tookjinftje Jerecht, werkjlich wellen ut däm Stich komen. 8 Wiel wan ekj junt deepen saul, dan mott jie daut ieescht met june Woakjen bewiesen, daut jie jun beeset Denkjens Oat werkjlich jeendat hant! 9 Jleeft nich daut jie Gott siene Strof nochmol woaren ut däm Stich komen, bloos wiel jie Abraham siene Nokomen sent. Daut jie Abraham siene Nokomen sent, haft nuscht too sajen, wiel wan Gott well, dan kaun hee am von dise Steena Nokomenschoft veschaufen. 10 Gott es reed, un hee woat junt boolt rechten. Un wan hee junt rechten woat, dan woat daut een bät soo sennen aus wan een Goadna sikj reed moakt, een onfruchtboaren Boom dol too haken. Hee nemt siene Akjs, un dan helt hee dee aun de Wartlen naun, un dan brukt hee dän Boom aul mau bloos dol haken. Un soo hakt hee aul de Beem dol, dee nich goode Frucht droagen, un dan schmitt hee dee em Fia nen."
11 Johanes räd wieda, un säd, "Ekj doo Menschen em Wota deepen, toom bewiesen daut see äa beeset Denkjens Oat jeendat hant. Oba lota woat een aundra komen, dee mea to sajen haft aus ekj. Dee es jrata aus ekj, un dän sie ekj nich mol wirdich de Schoo optoleesen. Un wan dee komen woat, dan woat hee deejanje met däm Heiljen Jeist deepen, dee äare beese Denkjens Oat jeendat hant, un dee aundre oba met Fia. 12 Sien Jerecht kaun eena dan uk met een Bua vejlikjen, wan dee Weit draschen deit, wiel wan een Bua dän Weit utschluft, dan deelt hee de Weitkjieena von de Schluwen uteneen. Dän Weit bewoat de Bua sikj en sien Spikja opp, un de Schluwen fäajcht hee sikj oppe Draschflua aula toop, un dan vebrent hee dee en soon Fia, waut nich ut to moaken jeit."
Jesus leet sikj von Johanes deepen
13 Sea too de Tiet, aus Johanes enne Wiltnis jeprädicht haud, dan kjeem Jesus von de Jäajent von Galiläa no am, wiel hee am en dän Jordan Riefa deepen sull. 14 Oba Johanes vesocht Jesus doavon auf to roden, un säd, "Daut es doch nich rajcht daut du no mie kjemst, om daut ekj die deepen sull, wiel ekj sull mie doch von die deepen loten."
15 Oba Jesus auntwuad am, un säd, "Doo mau waut ekj die saj, wiel doamet volfell wie waut Gott nu von ons velangt." Dan jeef Johanes no, un hee deept Jesus.
16 Un soo schwind aus Johanes Jesus jedeept haud, dan kjeem Jesus ut däm Wota rut, un seet junt, de Himmel jinkj äwa am op, un Johanes sach Gott sien Jeist soo aus ne Duw rauf komen, opp Jesus nopp. 17 Un seet junt, dan räd Gott vom Himmel, un säd, "Dit es mien leewa Sän, dän mie sea jefelt, un met dän ekj gaunz tofräd sie."