1 วี อี แฮะ ตัห แคง มืง เอโดม, อี แฮะ ชึบ ครึง เรณ อี ตัห แคง มืง โบวฌารา, อัน มูห อาเซ? วี อี แฮะ ชึบ ครึง บอด บอ ฮาว แตห อึณ บยัะ อัน อาพูง ดังโคว อัน บอ งึห ฆีณ อัน โกบ มึห อัน อาพูง ดังโคว ตาง, อัน มูห อาเซ? อึณ มูห โอว อี กาลาง นา ซืร นา หมาน บอ มึห ปวน ดี คยอด ดูอี.

2 เหมา อึณ ปาย อึม มางูน ซอ ดึก ดี ครึง แม? เหมา อึณ ปาย ปี ชึบ แม ดี ตา ครึง ดูอี อี แฮะ แณต เบล มางูน?

3 เฌาพรา วี ต็อห, “โอว อู วี แฮะ แณต เบล มางูน. แคง อาโมยว ดูอี เฮา อาว มึห อาเซ อี โพรม รึม โดบ โอว. โอว มืร แฮะ แณต เฆ รันซู โอว. โอว แฮะ แณต ทูทีต เฆ โกบ แฮะ เลห ดอซัะ โอว. โคว, หนาม เฆ แฮะ กาชัต ดี ครึง โอว, แตห อึณ กาดาต โตต.

4 โอว แฮะ ฮอต อูน แคง น็อห โอว ซีแง ดี ดัม โอว หมาบ ดี เฆ. โอว มืร แฮะ นับ ซีนัม ปี ดี คยอด โอว ดี เฆ ดูอี ปี อึบ โอว.

5 ดอ วี ยอด โอว อาว มึห อี จอย โอว คอ อู วี. โอว บอ วี อาม ลอง อัน ตี. โคว, แด โอว อี มึห โปลม แฮะ จอย โอว โกบ แฮะ เลห ดอซัะ โอว, อึณ แตห โอว แว แฮณ.

6 โอว มืร แณต โตต เฆ ดูอี ดอน โมยว โกบ รู กาเซา โอว ดี เฆ. โอว แฮะ แตห เฆ ปี ดูอี ยึต ป็อห โกบ แฮะ เลห ดอซัะ โอว. หนาม เฆ โอว มืร แฮะ ฮูห แดง กาดาย.” แคะ ตี ปี กาลาง เฌาพรา.

7 โอว ดี วี กาลาง ลอง น็อห ร็อก เฌาพรา อี ตู นับ ดี โตต ดอ เหมา. แตห เอ อืบ อัน เฌา โกบ แปะ แฮะ โบง อัน อาดา เอ. โกบ มึห อัน เฌา น็อห ร็อก กาเว กาเซา, อัน มืร ดัว นา บอด นา หมึอม กืน ดี เฆ ดูอี อีซาเรลัะ.

8 โคว, เฌาพรา แฮะ วี ต็อห, “เฆ ตี, เฆ มูห ดูอี ปี อึบ โอว. เฆ มืร ตู กาบัห ดี โอว.” แฮะ ฮอต, อัน ดี วี คยอด เฆ.

9 ดูก ปี โลว คัม เฆ ดูอี ปี อึบ อัน เฌา วี แบน ดูก บอ ดี เฌาพรา. เฆ อามู อามาด เฌาพรา อี กอย ดี อาต อัน เฌา, เฆ แฮะ คยอด ดูอี เฆ ตี. โกบ มึห อัน เฌา น็อห ร็อก กาเว, อัน มืร ทูด เลห เฆ. อึณ ปี อัน เฌา แฮะ โจะ ดี โฆ็ง เฆ, แฮะ โจะ เงียะ เฆ ซีณ ดอ มึอน.

10 เฆ ยี วี โบง กาบัห ดี อัน เฌา, โบง แตห อึณ เซา ดี น็อห พึอม เฌาพรา อี ซีงา บอด. โกบ อึณ ปาย ตี อัน เฌา วี แบน รันซู เฆ, วี กาโฆห ดี เฆ.

11 ดอ อัน ตี อัน เฌา บอ วี โหลห ดอ มึอน, โหลห บอ อาโมวแซ บอ เฆ ดูอี ปี อึบ อัน. อัน วี ดีหมอด ต็อห, “ดา อี แฮะ ดึห เลห เฆ บอ โดว ซัดดาวา เฆ แคง อึม นัมมูกซารา, อัน วี กอย ดี เหมา? เฌาพรา อี แฮะ แตห น็อห พึอม อัน กอย กาแต เฆ, อัน วี กอย ดี เหมา?”

12 อาเซ แฮะ ตา อาพูง ดังโคว อัน, จัร อาโมวแซ โบง นา หมึอม อาม กาเซา, โบง แตห อึม นัมมูกซารา กาย็อห แบน อา บลาก, แตห อาพูง ดังโคว อัน ลึห เซเซ?

13 อาเซ แฮะ แยต แตห เฆ ฮาว โดง ลึก กาดัม อึม, แตห อึณ ปี มังปร็อง อี นับ ดี ฮาว ดาคึย โดง ฆลัง, ตู ดีปลาด ตู เกห?

14 เฆ ดูอี ปี อึบ เฌาพรา, เฆ บอ ปี พึง มามัก อี โลง แคง ฆลัง เหรต ดี โฮม เปต. น็อห พึอม เฌาพรา มืร โบง แตห เฆ ปึอน ดี ดีเหลา. ปาย ตี อัน เฌา บอ แยต เฆ, แตห อึณ บอ ลึห ซีคยา แคะ ตาง ปวน อัน เฌา.

15 อึย แม เฌาพรา อี กอย แคง ฆางหราว, โดง กอย แม แฮะ ซีงา บอด บอ มึห ปวน ตาง. เย หมาณ, แตห แม เฌา ยอด เย. น็อห ซี โบง ดีงัณ แม บอ อาพูง ดังโคว แม, อาว ฮู ลึห ดี เย. น็อห แม อี นับ ดี ร็อก กาเว กาเซา มืร, เย ตู ปึอน ยึร. เย หมาณ, แกวะ แตห แม เฌา เบลห แวน เย.

16 แม เฌา บอ มูห ฆูณ เย. อาบราฮัม ตึอน, อัน ตู นับ เย. อาอีซาเรลัะ ตึอน มืร, ตู ดึอม รวห เย. แม เฌา ยี มูห เฌาพรา อี ปี ฆูณ เย. ซีณ ดอ มึอน เฆ แฮะ ต็อห, แม จืร “อี คยอด เย.

17 เหมา อึณ ปาย ปี เบลห แวน แม เฌา ดี เย, แตห เย วี วัห อึณเตณ ปี แหน แม เฌา, แตห บอ น็อห เย วี โปลม ดีฆัต บอ แวน แม. เย หมาณ, แตห แม เฌา วี ตัห โดง กอย เย โกบ ร็อก แม ดี เย บอ โกบ ร็อก แม ครึร ดูอี อี ปี คาฆูน แม.

18 อาดา อู กาจัน เฆ ดูอี ปี อึบ แม อี ซีงา บอด, เฆ แฮะ ปึอน ดี บึง โดง บอด แม เฌา. รันซู เย ยี แฮะ ตัห แณต โดง ซีงา บอด แม เฌา, แตห อึณ กาปยาต ลึร โตต.

19 แม เฌา แฮะ โบง ดี เย แตห เย ปี ดูอี ปี ตู ดึอม อึบ แม เฌา บอ ปี ดูอี อี ตู ดึอม นับ ลอง แม.