โอว ตู กอย หนีม โกบ ร็อก โอว มืง ฌีโอน. โอว มืร ตู ดีเหลา โกบ กาเว โอว มืง เยรูซาแลม, แตห อึณ กอ ฌัม ปัน ดี คยอด โอว ดี เฆ. โอว ดี ดัว น็อห ซืร น็อห หมาน ดี เฆ, แตห อึณ กอ ลึห ซีคยา ปี อี ยึร บลาง เงา แคง หมึร. บอ ลอง คยอด โอว ดี เฆ, โอว ดี แตห อึณ ลึห ปี บลาง เงา โรว.

2 อึย เบ ดูอี แคง มืง เยรูซาแลม, แคะ กอย อาโมยว ดูอี เฆ ดี บอ ยึร ลอง น็อห ซืร น็อห หมาน เบ. แคะ กอย เฆ คูนดีคัม, เฆ ดี บอ ยึร อาพูง ซาเร เบ. เบ ดี บอ ปึอน จืร กามาย ปี ดัว เฌาพรา ดี เบ.

3 เบ ดี ปี มังฆึม อี ชีด กาเซา ปี โฆ็ง เฌาพรา. เบ ดี บอ ปี บอ กามัยะ เซณ ปี โฆ็ง เฌาพรา อี อึบ เบ.

4 วาย นี, เบ มืร อาว ฮู โลว คัม อี แดะ เบ ต็อห, “ดูอี ปี เบลห แวน เฌาพรา.” บอ มืง เบ มืร, อี อาว ฮู โลว ต็อห, “มืง ราม.” อี ดี บอ แดะ จืร กามาย ต็อห, “เฌาพรา แฮะ อึง แม.” บอ จืร กามาย มืง เบ เฆ ดี บอ ต็อห, “มืง อี คัด” โคว, เฌาพรา แฮะ อึง แฮะ ร็อก อัน ปี อีมาย ร็อก อีบึณ อัน.

5 อึณ ดี ปี กาโณม อี ดี คัด ดึห ดีบยา แฌด. ปาย ตี อึณ ปี เฌาพรา อี แฮะ พาน เบลห เบ ดี คัด ดึห เบ. อึณ บอ ปี เอียะ กามาย แฮะ โคย โกบ แฮะ ปึอน อัน เอา กามาย. เฌาพรา มืร ดี โคย โกบ เบ ปาย ตี.

6 อึย เบ อี กอย แคง มืง เยรูซาแลม, โอว แฮะ จัร ดูอี บัร แรง มืง เบ, แตห เฆ บัร เซเซ, แกวะ แตห เฆ กอย หนีม ดอง วัน ดอง คืน. ปาย ตี บอ เบ อี โลว กาลาง ดี เฌาพรา, แตห อัน โหลห กาดีก ซัดฌา อัน, แกวะ แตห เบ กอย ซีต็อง กอย หนีม หนีม.

7 แกวะ แตห อัน เฌา ปึอน ดี กอย ดีเหลา, แตห อึณ กอ ฌัม ปัน ดี ฮอต โตต วี ซัม วี อึณปราย เฆ มืง เยรูซาแลม. แตห มืง ตี วี แบน มืง ปี อืบ มยูก ดูอี บอกาเฆลียด แดง กาดาย.

8 เฌาพรา แฮะ ดึอม ดัว กาดีก ซัดฌา อี แฮะ หมาน อาคาคัร. อัน เฌา ดี บอ ตา อาพูง ดังโคว อัน โบง แตห อึณ เฌะฌูง. อัน แฮะ ดืง ต็อห, “วาย นี, โอว มืร ตู ดึห โหงว เบ, วี เฮียง เฆ รันซู เบ. เฆ ดูอี อาโมยว เฮา มืร อาว ฮู ปึอน ดี เดียง อึม มางูน เบ, แกวะ แตห ฆาน เบ วี ชึม.

9 เฆ อี แฮะ บรัด ซีมา โหงว, อี แฮะ วี โซะ กาโย็ง โหงว, เฆ ดี บอ ปึอน ดี วี โฮม คามูน บอ ดาง ฆูง เฆฌู ดี เฌาพรา. เฆ อี แฮะ รัณ มาน มางูน, อี แฮะ ปึอน ดี วี เบต เบล อัน, เฆ ดี บอ ปึอน ดี เดียง อึม มางูน แคง โดง กอย โอว อี มูห โดง ซีงา บอด.”

10 แตห เบ กาโลห มาโลห มืง, แตห เบ อึณปราย อึณเตณ อาดา เฆ ดูอี อาโมยว เบ อี ดี วี ตัห. แตห เบ โบง แตห อึณเตณ ตาง. ดึห แวน บอ มาว, แตห เบ ซัม ร็อง บอ ฮอย อาลาม อี แบน ลักซานา ดี ดูอี ดอน โมยว ลอง แฮะ ออง เบ.

11 เฌาพรา แฮะ กาลาง แตห อี ยึร กอ ฌัม โดง ซืด กาดาย. อัน ต็อห, “แตห เบ กาลาง ดี เฆ ดูอี แคง มืง เยรูซาแลม ต็อห, ‘อัน เฌา อี ดี คยอด เบ, อัน แฮะ ฮอต ตัห. บอ รูห ปี ดี ดัว อัน ดี อี, อัน แฮะ ดึห ตัห. อัน แฮะ ดึห ตัห บอ ง็อห คัน ปี ดี เวียะ อัน ดี อี.’”

12 อี ดี บอ แดะ จืร เบ ต็อห, “ดูอี อี ซีงา บอด ปี อึบ เฌาพรา, ดูอี แปะ แฮะ คยอด เฌาพรา.” มืง เยรูซาแลม อี ดี บอ แดะ จืร ต็อห, “มืง โดง กาปรา อี ดี กอย.” บอ “มืง ปี ตู เบลห แวน เฌาพรา.”