1 อึย เบ ดูอี แคง มืง ฌีโอน, แตห เบ ยีต. โคว, บลาง แฮะ ฮอต ตัห. แตห ปี โบง เบ ปี บลาง ซีแง อี วี ทอง ดี อี เฮา. อึณ มูห อาพูง ดังโคว เฌาพรา อี ปี บลาง ตี, อี แฮะ ลึห ดี เบ.

2 อับ ว็อง แฮะ วี ปลึก ดูอี อาโมยว เฮา. อึณ ปี อึณอูะ เฮต แฮะ ปลึก เฆ บอกาเฆลียด. อี มูห แคง มืง เบ, บลาง เฌาพรา แฮะ เลห, แตห อาพูง ดังโคว อัน บอ กอย โดง กอย เบ.

3 เฆ ดูอี อาโมยว เฮา เฆ ดี บอ ตัห โดง กอย เบ โกบ มึห บลาง ตี. เฆ คูนดีคัม ดี บอ ตัห โดง กอย เบ โกบ มึห บลาง โดง กอย เบ ซีณ ซีณวัห.

4 แตห เบ วี ยอด อี แฮะ โบว แบน, อี แฮะ กอย โรบ เบ. เฆ ดูอี อาโมยว เบ แฮะ ลาย กาฌูะ วี ตัห โดง กอย บรีม เฆ. เฆ ฆอน กาโณม เบ อี แฮะ กอย โต็ง กาเซา บอ วี ตัห โดง กอย เบ. บอ ฆอน ดีบยา เบ ดี บอ วี ตัห โดง กอย เบ ปี อี โจะ ตัห ฆอน ดีแตด.

5 เบ ฮี ยึร ลอง อัน ตี, เบ ดี บอ วี โคย กาเซา. น็อห เบ ดี บอ ดียูห ดีเยณ โกบ แฮะ โคย เบ ปาย ตี. ครัม เฆ ดูอี อาโมยว เฮา, เฆ ดี บอ วี ดึห ตัห กาฌูะ โดง กอย เบ. โกรวกราม อี บอด อี หมึอม อี กอย ดี มืง นา ตัะ อึม นัมมูกซารา, เฆ ดี บอ วี ดึห ตัห กาฌูะ ดี โดง กอย เบ.

6 พึง มังปร็อง กาฮาต อี กืน อี กอย แคง มืง มีดีอาน, บอ แคง มืง เอพา ตึอน, เฆ ดี บอ ดึห ตัห ดี โดง กอย เบ. เฆ ดูอี แคง มืง เซบา ดี บอ ดึห ตัห ครีว เฆ กาณัน เลโบน. เฆ ดูอี ดี บอ กาลาง ลอง นา บอด แปะ แฮะ โบง เฌาพรา บอ อืบ อัน.

7 พึง มาบู อี กอย แคง มืง เคตา ดี บอ ตัห โดง กอย เบ. บอ มาบู อาโล็ง อี ตัห แคง มืง เนยาโบด ตึอน ดี แบน โกรว เบ. เบ ปึอน ดี หลู โดว เฆ ตี แดง กาโช็ง หลู, แตห อึณ ล็อะ น็อห โอว. โอว ดี บอ แตห อาพูง ดังโคว โอว แว ลึห แว ฮืง แคง โฮว โอว.

8 เฆ อี บึณ ตัห ปี อึณอูะ มูห อาเซ? เฆ อี ปี มาโบลย อี บึณ ตัห ลึบ แคง กาฮูน เฆ มูห อาเซ?

9 เฆ อี กอย แคง ฆูน อึม เฆ บัร โอว. เฆ รึร ซังโพว อี ตัห มืง ทาซีด บอ แยต ดี อาต, แตห เฆ ดึห ตัห ฆอน เบ บอ รึอน เฆ ครีว เฆ. ปาย ตี อาพูง ดังโคว เฌาพรา อี มูห เฌาพรา ปี กรึบ เบ, อึณ ดี ลึห ซีคยา. อัน เฌา มืร แฮะ แตห เบ มึห ซาเร.

10 เฌาพรา ปี วี กาลาง ดี เฆ ดูอี แคง มืง เยรูซาแลม ต็อห, “เฆ ดูอี อาโมยว เฮา, เฆ ดี บอ วี โฆว วี อึณปราย แรง มืง ดัว ดี เบ. คูนดีคัม ดูอี เฆ ตี, เฆ บอ แบน ปี ซูต ปี จัร เบ. โคว, โอว ปี บอ แฮะ รู แฮะ จาว ดี เบ บอ แฮะ ดัม หมาบ ดี เบ, โอว ยี วี มึห น็อห กาเว เบ.

11 มาโลห มืง เบ ดี วึห อูน ดอง คืน ดอง วัน, ตู กาบีด ดอ เหมา, แตห เฆ ดูอี อาโมยว เฮา ปึอน ดี ดึห ตัห โกรวกราม เฆ บอ คาฆูน เฆ, ดัว ดี เบ, แตห บอ คูนดีคัม เฆ แยต เฆ.

12 เฆ ดูอี อาโมยว เฮา อี ตู ซี แบน ปี ซูต ปี จัร เบ, เฆ ดี กาดูห อี ปยาต แตห เฆ ลึร ชึม โตต บอกาเฆลียด.

13 เฮ อี บอด อี หมึอม อี กอย ดี นอน เลบานูน ตึอน, บอ มูห เฮ กาทีน, เฮ อึณเก บอ เฮ ทาซูรา, เฆ อี เฮา ดี บอ ดึห ตัห, วี อึณปราย มืง เบ. เฆ ดี บอ โบง แตห โฮว โอว วี ชีด. แตห โดง กอย โอว วี มึห ซาเร ตาง.

14 ฆอน เฆ ดูอี อี แฮะ ดึอม คาหนาบ เบ, เฆ ดี บอ โลว วี ตัห โฆม ตัห โยม เบ บอ โรวเซ เบ. เฆ อี แฮะ ดึอม ลูกตาย เบ, เฆ ดี บอ โลว วี ตัห มูด ฆึบ โคบ เปลา เบ. เฆ ดี บอ แตห มืง เบ จืร, ‘มืง ฌีโอน อี มูห มืง ปี อึบ เฌาพรา อี ซีงา บอด, มืง เฌาพรา ปี กรึบ เฆ ดูอี อีซาเรลัะ.’

15 อี เฮา แฮะ ดึอม วัห เบ บอ ฌ็อง เบ. อึณ มืร ตู มึห อาเซ อี ตัห จัร เบ. โอว ยี วี แตห เบ โบยว ดาคึย กอย แคง มืง เบ, แตห อึณ วี แบน มืง โดง ซี กอย ดอน อี ดอน โจว ดอน บาน.

16 เฆ ดูอี อาโมยว เฮา บอ คูนดีคัม เฆ, เฆ ดี บอ โลว วี ลึมลา เบ, แตห อึณ กอ ปี มา ลึมลา ฆอน อัน. ปัน อัน ตี เบ ดี บอ วี นับ โอว มูห เฌาพรา อี แฮะ คยอด เบ, เฌาพรา ปี กรึบ ดูอี อีซาเรลัะ, เฌาพรา อี มึห อาพูง ดังโคว ตาง อี แฮะ ทูด เลห เบ อี มูห อาโมยว อาโกบ.

17 โอว ดี วี ดึห ครีว ตัห ปลูะ บ็อง เดณ. ดึห รึอน วี ตัห ปลูะ ฮีน. ดึห บ็อง เดณ วี ปลูะ เฮ, ดึห ฮีน วี ปลูะ มาว. โอว ดี แตห เบ มึห น็อห เฆียด เยน เซเซ, แตห อึณ ปี ดา อี อึบ เบ. โอว ดี แตห บอ น็อห ซืร น็อห หมาน ดี เบ, แตห อึณ ปี ดา กาณา เบ.

18 อี ซีนัน ซีนืง ลาย กาโฆห กาง็อห, เบ อาว ฮู ยึร แคง มืง เบ ดอ เหมา. เบ ดี วี ต็อห, แรง มืง เบ มูห โดง คยอด อี. เบ ดี บอ ต็อห, ลอง มาโลห มืง เบ, อึณ มูห โดง อืบ อี เฌาพรา.

19 วาย อัน ตี ดอ กาแต ซีแง เบ อาว ฮู โลว บลาง ซีแง. แคง หมึร, เบ อาว ฮู โลว มาเฆียน บลาง ดี เบ. โคว, โอว เฌาพรา แฮะ แบน อี บลาง ดี เบ. กาตาน อาพูง ดังโคว โอว ดี บอ แตห อึณ บลาง ดี เบ เซเซ. บอ เฌาพรา ปี กรึบ เบ ดี บอ แตห เบ มึห อาพูง ดังโคว.

20 โอว เฌาพรา ดี แบน อี บลาง ดี เบ เซเซ. โอว ดี ปี ซีแง ดี เบ อี ตู เฆต ดอ เหมา. โอว บอ ปี มาเฆียน ดี เบ อี ตู ยัม ดอ เหมา. เบ มืร อาว ฮู มึห กลึร มึห ดูก ดอ เหมา.

21 เฆ ดูอี อาโมยว เบ บอกาเฆลียด, เฆ ดี บอ โบง ซืร ซืร หมาน หมาน. เฆ ดี วี ปึอน ดี บึง มาน มืง เฆ เซเซ. เฆ ปี โหงว ปี ซัม โอว ตา แด โอว, แตห อึณ บยัะ แคะ ตาง อาพูง ดังโคว โอว.

22 อี มูห วา เตียะ เบ, อัน ดี วี แบร วี แบน อู แหรณ วี. บอ วี อี ดีแตด, อัน ดี วี แบร แบน อาโมยว ดูอี กืน. ฮี ฌัม อาคราว อัน, โอว อี มูห เฌาพรา, โอว ดี บอ โบง ลอง อัน ตี, แตห อึณ แบน ครัน ครัน แฮ แฮ.”