1 เบ แกวะ ทาง เฌาพรา ตู ปึอน คยอด เบ. เบ แกวะ ทาง เฌาพรา ตู ยึร โฆรห เบ.

2 อึณ ยี มูห หมาบ เบ อี แตห เฌาพรา กาย็อห ดี เบ. อึณ บอ มูห นา จีจีว ปี โบง เบ, อี แตห เฌาพรา ตู ยอด เบ บอ ตู โทม โฆรห เบ.

3 โคว, หมาบ ปี โบง เบ, อึณ ปี หนาม แฮะ ดึก ดี แด เบ, แตห น็อห เบ โยว บอ กาปึณ. เบ มืร แฮะ กาลาง โฆรห กาโลว บอ ต็อห โฆรห จีจีว.

4 อาว มึห คอ อู วี อี ซี โบง แตห อึณ โดบ ดารา. อาว มึห คอ อู วี อี ซี โบง ซืร ซืร หมาน หมาน. เฆ บอ บึง อี ตู หมาน บอ กาโลว แตห เฆ ออง อามู เฆ. ปี เฌณฌา เฆ, อึณ ปี เฆ แฮะ แด บาดีก ซันเท. อี ฆึอด วาย อัน ตี แบน นา ฮาย นา มืก.

5 อากยาม อางยาน เฆ อี ฮาย อี มืก ตี, อึณ บอ ปี เฆ กานัม ปึอน มาฮัณ บอ โบง กาง มาปูงเปยณ. เฆ อี โฮม ปึอน มาฮัณ ตี, เฆ ดี ยัม. ปึอน มาฮัณ ตี ฮี กัห, อึณ ดี เลห อี ฮาย กาเซา.

6 บอ มาปูงเปยณ นับ ดี ซีณ วัน อัน. มาแล, วัน อัน ตี ยี ตู ปึอน วี ด็อะ แบน ครึง ตา อัน, อาว ปึอน วี กาบีด โดว อัน. ปี โบง เฆ มืร, แฮะ ฮาย กาเซา, นับ ดี กาลูต กาโฆห เซเซ.

7 โดง ฮาว โดง ว็อะ เฆ, เฆ บอ โบง แตห อึณ ลึร, แตห อึณ กาปยาต. เฆ บอ ออน ดี ง็อห ยัม อี เฮา อี ตู มึห ปี ลูต. เฆ บอ คราม มี ดี โบง อี ฮาย อี มืก เซเซ.

8 โดง ว็อะ โดง เวณ เฆ, อาว มึห อาเซ อี ปึอน กอย ซีคยา กอย ฆัด เฆียด. แคะ ปี โบง เฆ, ตู โดบ ดารา. เฆ บอ ฮาว โดบ อึณเตณ โฆะ, เฆ อี วี ฮาว โดบ อึณเตณ ตี ตู ปึอน ฆยามซา ดอ เหมา.

9 เฆ ดูอี กืน วี ต็อห, “ดอ ตี นี เย แฮะ ฮอต นับ อึณ ปาย เหมา. อาว มึห อี ดี ซูงพยาด อามู เย, แตห อึณ โดบ ดารา. เย มืร ตู ปึอน น็อห ซืร น็อห หมาน ปี ดัว เฌาพรา. เย บอ เหรต นา บลาง, อับ ว็อง ยี วี ปลึก เย. เย ซี กอย โดง มึห บลาง ซีแง, ยี วี มึห มี อับ เฆ กามึก.

10 โกบ ปาย ตี เย บอ กาดูห ดี ฮาว บูน ปี ดูอี งาย อับ. ดอ กาแต ซีแง, เย บอ นับ ดี ดีปลาด เกห ปี ดอ แปร แฮะ อับ. กาแต เฆ ดูอี อี มึห โปลม เฆ แฮณ เย ปี ดูอี ยัม.

11 เย บอ กาอืน ปี มาเฆรห. เย บอ หงูน ปี ฮัม มาโบลย. เย วี เหรต นา มูห นา หมาน มืร, ยี ตู ยึร. เย เหรต อี ดี คยอด เย มืร, ยี ปี อึณ กอย กาโต็ง กาเซา.

12 อึย แม เฌาพรา, หมาบ เย แฮะ กืน กาเซา. หมาบ เย ตี แฮะ วี พยาก เย ดี อาต แม. เย แฮะ นับ ลอง อี ตู หมึอม ปี โบง เย ตี บอ กาลาง ลอง อัน ตี ดี แม เฌา.

13 เย แฮะ โบง กาบัห ดี แม เฌา, แฮะ แวน แม เฌา. เย แฮะ วี คาหนาบ อี เฮา บอ แตห อี เฮา วี โบง กาบัห ดี แม. โฆรห ปี กาลาง เย บอ มูห โฆรห กาโลว อี เลห แคง น็อห เย.

14 โคว, ปี ซูงพยาด อี โดบ ดารา แฮะ แหล เลห. บอ น็อห ซืร น็อห หมาน แฮะ กอย โต็ง เย. นา มูห นา หมาน มืร แฮะ ฮอต เกห โดบ อึณเตณ. นา ซืร ซืร หมาน หมาน มืร, อาว ฮู ปึอน ดี ลึบ ตัห.

15 นา ซืร นา หมาน อาว ฮู ปึอน ยึร นา เหมา. เฆ อี วัห นา จีจีว, เฆ บอ แบน ปี พาด ดึห อี เฮา.” เฆ ดูอี กืน ต็อห แคะ ตี.

เฌาพรา บอ ยึร ลอง อัน ตี, อึณ ตู ล็อะ น็อห อัน โกบ ตู มึห เฆ อี ซูงพยาด แตห อึณ การัม.

16 อัน เฌา แฮะ ยึร อาว มึห ดูอี คอ อู วี จอย เฆ อี คัม ตี. อัน บอ อาม กาเซา โกบ ตู มึห คอ อู วี อี ซาคึร ลอง อัน ตี. อัน เฌา ยี วี ตา อาพูง ดังโคว อัน, วี คยอด เฆ บอ แตห น็อห ซืร น็อห หมาน อัน วี จอย ฆาน อัน.

17 อัน เฌา แฮะ ดึห นา ซืร นา หมาน, แตห อึณ ปี ดา ซึก อี แฮะ โฆ็ง มัง ฆ็อง. อัน บอ ดึห ดารา อี คยอด อี, แตห อึณ ปี ดา ซึก ชึบ มาฆีณ ฮีน. อัน บอ เบลห น็อห ซี โบง เวียะ ดี เฆ ดูอี ฮาย, แตห อึณ ปี อัน ชึบ ครึง. อัน บอ มึห น็อห ซี โบง ดีงัณ, แตห อึณ ปี อัน กัน ฮึบ.

18 อัน ดี บอ โบง เวียะ ดี เฆ รันซู อัน, แตห อึณ กาดาน แคะ ปี ดึอม โบง เฆ. เฆ อี โบง กาบัห ดี อัน, เฆ โลว คัม แคะ กาอาบ เฆ คัม. อัน ดี โบง เวียะ บอ ดี เฆ อี กอย แคง ฆูน อึม.

19 เฆ ดูอี อี กอย บลาก นา เลห ซีแง, เฆ ดี บอ โยว เฌาพรา. บอ เฆ อี กอย บลาก นา เฆต ซีแง, เฆ ดอน อี ดี บอ โรวเซ อาพูง ดังโคว อัน เฌา. โคว, ปัน ดี ตัห อัน เฌา, อึณ ดี ปี เฌาพรา แฮะ ฮึห พึอม อัน บอ แตห อึม กอ แฌว กาเซา.

20 เฌาพรา วี ต็อห, “โอว ดี วี ตัห ดี มืง ฌีโอน, แตห โอว ปึอน ดี ตัห ทูด เลห เฆ บอ คยอด เฆ อี แฮะ โหลห แฮะ แวน หมาบ เฆ ดอน อี.

21 กาดีก ซัดฌา ปี ดัว โอว ดี เบ อึณ ปาย นี. โอว ดี แตห น็อห พึอม โอว อึบ เบ. บอ โฆรห แปะ แฮะ ฮับ อูน โอว แคง โมต เบ, อึณ ตู เลห ตู หราย ดอ เหมา. จูห อาตึร นี ฮาว นา อาต, บอ ฆอน เบ เฆ หลูกหลาน เบ, เฆ ดี บอ โหลห โฆรห โอว เซเซ, ตู ปีว ดอ เหมา.” เฌาพรา แฮะ กาลาง อูน ปาย ตี.