1 เฌาพรา วี ต็อห, “แตห เบ ดัด ตาง ตาง, ดัด แคะ ซี ดี เลห แมง เบ. แตห อึณ ฮัม ตาง ปี ฮัม นึง แป. แตห เบ กาลาง ดี เฆ ดูอี ปี อึบ โอว ลอง ปี กาบัห เฆ ดี โอว. แตห เบ บอ แค ดี เฆ ดูอี อาโมยว อาโกบ ลอง หมาบ เฆ แบน โมยว แบน โมยว.

2 เฆ บอ ต็อห, เฆ แฮะ ฆาว ปวน โอว ดอน ซีแง ดอน ซีแง. อึณ บอ ปี เฆ กาปรา กาเซา ดี นับ ปี ปาย เฌาพรา. เฆ บอ ปี อาโมยว ดูอี อี มึห น็อห ซืร น็อห หมาน อี ตู แวน ดารา เฌาพรา. เฆ บอ หมาณ, แตห โอว ซูงพยาด ดารา ซืร ซืร หมาน หมาน ดี เฆ. อึณ บอ ปี เฆ แฮะ ดาคึย ดี แตห เฌาพรา กอย รึม โดบ เฆ.”

3 เฆ ดูอี กืน บอ นับ ดี วี ต็อห, “แปะ แฮะ ยืน เย ปี ดี โฮม อาว มึห ดีโคว มาเซ. โคว, เฌาพรา ตู ยอด เย. บอ ลอง แฮะ ปี เตียม เย น็อห เย, อาว มึห อาฆยึร มาเซ. โคว, เฌาพรา ตู ณึงราง ยึร.” เฌาพรา ยี วี ต็อห ดี เฆ, “ซีแง ยืน เบ ปี ดี โฮม ตี, เบ แฮะ โบง โดบ ปี อึง เบ. เบ แฮะ คาหนาบ หมาย เบ, จัร เฆ โบง ฆาน จัน อี หณาบ กาเซา.

4 เบ แฮะ ยืน ปี ดี โฮม, เบ ยี วี ลาย กาเอห ลาย กาลูต. เบ บอ วี ลาย กามัห ตา แด เบ อี ฮาย อี มืก. ปี โบง เบ ซีแง ยืน เบ ปี ดี โฮม ตี, อึณ ตู หมึอม, ตู แตห โอว โทม โฆรห ปี ซาคึร เบ.

5 เบ ทาง ยืน ปี ดี โฮม ปาย ตี แฮะ ล็อะ น็อห โอว? เบ ทาง, เซ เบ แฮะ ปี เตียม โดว เบ อาดา อู ซีแง, แฮะ ฆลึม? บอ เซ เบ โฆม มูด ฆึบ แตห อึณ กอ ปี แมออ, ปี วี ดึห จาน ดัะ แบน อึณเบว, วี ดึห บอ กาฟาง คร็อห นา ครึม, เบ ทาง ฌึร ตี แฮะ มูห แฮะ หมาน ดอ ยืน เบ ปี ดี โฮม? เบ ทาง แฮะ ล็อะ น็อห โอว ปี โบง เบ ตี?

6 ลอง ยืน ปี ดี โฮม อี ล็อะ น็อห โอว, อึณ ปาย นี. เซ อึณ มึห ดูอี อี กอย แคง กาปึม, ยี ตู มึห ดี โบง หมาบ, เบ โลว เบลห เฆ, แตห อึณ ปี เบ ฆ็อห แวน วัน ฮีน เฆ ตี. เซ อึณ มึห ดูอี แปะ แฮะ คาหนาบ เบ, แตห อึณ ปี เฆ ชึบ แอะเมา, แตห เบ ดึห กาบัก แวน แอะเมา ตี ดอน โมยว.

7 เซ ดูอี กาปราณ ปี ดี โฮม, แตห เบ กาซาง ปี ดี โฮม เบ ดี เฆ. เซ อึณ มึห ดูอี ฆีน อี ตู มึห กาง โดง ดี กอย, แตห เบ วึห มาโลห กาง เบ, แตห เฆ ปึอน ดี ลึบ กอย. เซ อึณ มึห ดูอี อี ตู มึห ดี ตา ครึง, แกวะ แตห เบ แตห เฆ กอย โดว ฆลัะ ปาย ตี. เฆ มูห บีนอง วอแว เบ.

8 เซ เบ โบง ปาย ตี ปี เฆฌู โอว ดี เบ ดี บอ ปี บลาง อี ทอง แดง เบ ปี บลาง ซีแง ดอ มูห เจว หณา. ดีม เบ เฆ ปลา เบ ดี บอ เจว หราย เจว แกน. โอว ดี บอ แตห เบ มึห น็อห ซืร น็อห หมาน, แตห อึณ บอ ฆ็อง แร ดี อาต เบ. บอ อาพูง ดังโคว โอว ดี บอ ฆ็อง แร ดี ปัน เบ.

9 ดอ ซาคึร เบ ดี โอว, โอว ดี บอ โทม โฆรห เบ. ดอ แดะ เบ ดี โอว, แตห โอว จอย เบ, โอว ดี บอ เวียะ โฆรห เบ. เซ เบ บอ จู คาหนาบ อี เฮา บอ จู พยาก อี เฮา, จู แนนัะ อี เฮา กาแต เบ,

10 เซ เบ บอ วี มึห น็อห ซาทา, น็อห ฮาง, วี กาซาง ปี ดี โฮม ดี เฆ อี กาปราณ, วี จอย เฆ ดูอี ปี คาหนาบ อี เฮา, อึณ ดี หมึอม ดี เบ. ปาย ตี อี อับ ว็อง อี กอย โคบ เบ ตึอน, อึณ ดี วี แบน อี บลาง ปี บลาง ซีแง.

11 เซ เบ โบง ปาย ตี, โอว ดี วี แยต วี แหน อึณเตณ ดี เบ เซเซ, แตห น็อห เบ กอ ดาคึย ฆยามซา ปี อี แพ โบม. แคง โดง กาฮ็อห, โอว ดี วี แตห เบ มึห โปลม เฆ แฮณ. แตห เบ กอย ดาคึย ฆยามซา. เบ ดี บอ ปี กาปึม โอ็ง โบห อี มึห อึม ซีคยา, อี ปี บอ อึม โตห อี ตู ดึอม ฮีด ดอ เหมา.

12 เฆ ดูอี เบ ดี บอ วี อึณปราย อี แฮะ ลึร แฮะ กาปยาต ซีณ ดอ มึอน อี แฮะ เหลณ กาเซา. เฆ ดี บอ วี โฆว วี เบลห ดัง บรีม อัน. ปาย ตี อี เฮา มืร ดี ต็อห, เบ มูห ดูอี อี วี อึณปราย แรง มืง, อี วี ซัม วี บยีต กาง อี แฮะ ลึร อี กอย โคบ อึณเตณ.

13 เฌาพรา ปี วี ต็อห, “เซ เบ กัม ซีแง ดีเหลา ตู แตห เบ กาลึบ ดี ฮาว โต็ง บอ ตู โบง ปี อึง เบ, เซ เบ มืร มาด ซีแง ตี แฮะ มูห ซีแง อี ซีงา บอด, เซ เบ บอ ดาคึย ดี อูน ซีแง ตี, แตห อึณ แบน ซีแง อี อาเร ตาง, ซีแง อี ซีงา บอด, เซ เบ มืร โรวเซ บอ ตู วี โดบ ปี อึง เบ บอ ตู กาลาง โฆรห อี ตู มึห ดีโคว, อึณ ดี แบน อาฆยึร ดี เบ.

14 เซ เบ โบง ปาย ตี, เบ ดี แบน น็อห โบยว ดาคึย ดี กรึบ โอว. โอว ดี วี แตห เบ แบน ดูอี ปี โรวเซ อี เฮา แดง กาดาย นี. เบ ดี บอ ปึอน ดี กอย โบยว ดาคึย แคง มืง แปะ แฮะ อาบ โอว ดี ฆูณ ดัง เบ อี จืร อาโกบ อี แฮะ แบน คาฆูน เบ ตึอน. โอว เฌาพรา แฮะ กาลาง อูน ปาย ตี.”