1 เฌาพรา ปี วี ต็อห, “อึย เบ อี มึห น็อห ซืร น็อห หมาน, เบ อี บึง เฌาพรา, เบ อี ปี ฆอน มาว, แตห เบ โหลห อัน เฌา อี ปี ดาอาง มาว โดง เลห ตัห เบ. แตห เบ บอ โหลห อัน เฌา อี ปี มาว ดีโฆละ โดง เลห เบ.

2 แตห เบ วี โหลห อาบราฮัม อี มูห ฆูณ ดัง เบ บอ นาง ซารา อี มูห มา โดง ฆึอด ตัห เบ. ดอ แดะ โอว ดี อาบราฮัม ตึอน, อัน ตู มึห ฆอน. มาแล, โอว บอ วี ม็องการา ดัว ดี อัน บอ ดี เฆ ฆอน อัน, แตห ครึร อัน วี แบร กืน.

3 อัน เฌา ดี วี เหลา น็อห เฆ ดูอี แคง มืง ฌีโอน อี แฮะ กาปยาต ลึร. ดอน โปละ อี แฮะ วี แบน แปร กาฮ็อห, โอว ดี วี โบง แตห อึณ วี ปี กาปึม เอเดน. โดง มูห กาฮาต ดี วี แบน กาปึม อี ชีด กาเซา. เฆ อี กอย โดง ตี, เฆ ดี บอ โบยว ดาคึย บอ เกยา ดี น็อห เฆ. เฆ ดี วี ต็อห โหมว อี ดาง ฆูง เฆฌู อี อืบ มยูก อัน เฌา.

4 อึย เบ ดูอี ปี อึบ โอว, แตห เบ โทม โฆรห ปี กาลาง โอว. โอว ดี ดัว ดารา โอว ดี เฆ ดูอี แดง กาดาย นี บอ ปี ซูงพยาด โอว ดี แบน บลาง ดี เฆ.

5 อาว เหลณ โอว ดี บอ บยัะ น็อห ซืร น็อห หมาน โอว. โอว ดี บอ คยอด เฆ ครัน ครัน. โอว ดี บอ ซูงพยาด ดารา ดี อี. เฆ ดูอี อี กอย แคง ฆูน อึม, เฆ ดี บอ บึง ปวน โอว.

6 แตห เบ ซากึห ยอด แคง ฆางหราว, ปี วี มูด ยอด บอ กาดาย. ฆางหราว ดี บอ หราย ปี ดัก. กาดาย ดี บอ บรีม ปี ครึง อี แฮะ ราม. บอ ดูอี อี กอย แดง กาดาย, เฆ ดี บอ ยัม ปาย ตี. อี มูห ดารา โอว, ดารา อี คยอด อี, อึณ ยี ดี กอย เซเซ. บอ น็อห ซืร น็อห หมาน โอว, อึณ ตู หราย ดอ เหมา.

7 อึย เบ ดูอี อี แฮะ นับ ลอง น็อห ซืร น็อห หมาน โอว, บอ เบ อี แฮะ ดึห อูน ดารา โอว แคง น็อห เบ, แตห เบ โทม โฆรห โอว. แกวะ แตห เบ โทม เซ อี เฮา แนนัะ เบ. แกวะ แตห เบ โยว เซ เฆ พยาก เบ.

8 โคว, เฆ ดี บอ วี หราย ปี ครึง ปี โฮม มาวัะ. เฆ ดี บอ ปี ฮึก มาบู ปี โฮม วัะเรีย. น็อห ซืร น็อห หมาน โอว ยี ดี กอย เซเซ. โอว มืร ดี คยอด อี ดอน โจว ดอน บาน.”

9 อึย แม เฌาพรา, แตห แม เฌา ยีต. แตห แม เฌา ดึห ปวน แม, แตห แม บยัะ อาพูง ดังโคว แม ปี ดอ มึอน ดอ มูห บาน ดา ดา เย. แม เฌา บอ มูห อี แฮะ กาแดบ มากราย ตาง อี จืร ราฮาบ ตึอน. แม แฮะ บลูห แตห อัน ยัม.

10 แม เฌา บอ มูห อี โบง แตห อึม นัมมูกซารา ฮีด, แตห อึณ วี แบน อึณเตณ แตห เฆ ดูอี ปี อึบ แม วี ปึอน ดี กาโลห ฮาว.

11 เฆ ดูอี แปะ แฮะ ทูด เลห แม เฌา ตี, เฆ ดี วี ตัห ดี มืง ฌีโอน. เฆ ดี บอ โคย ดาคึย ต็อห โหมว ตาง ตาง บอ โบยว โบยว เกยา เกยา. เฆ มืร ดี โคย ดาคึย ปาย ตี เซเซ. เฆ มืร ดี ลอด ดูก ดี น็อห ดี พึอม, อาว ฮู โลว กลึร, อาว ฮู โลว เหงา ดอ เหมา.

12 “โอว อี มูห เฌาพรา, โอว อี ปึอน เหลา น็อห เบ, แตห เบ ดาคึย. เหมา อึณ ปาย ปี วี โยว เบ ดูอี อี นับ ดี ยัม บอ เฆ ฆอน ดูอี อี ปี แปร เฆ เปต ตึอน?

13 ปาย ตี เบ แฮะ วี ปีว เฌาพรา อี พาน เบลห เบ. เบ แฮะ ปีว อัน เฌา อี โบง แตห อึณ มึห เบลณ เฆ ฆางหราว บอ บืน กาดาย. เบ บอ โยว บอ กาปึณ ดอน ซีแง โกบ นา ฮาย ปี โบง เฆ อี ซี คาหนาบ เบ, บอ เฆ อี แฮะ โพรม ดี ปยาต แตห เบ ลึร ชึม ตึอน. เบ ยี ตู ยึร นา ฮาย นา มืก ปี โบง เฆ ตี ดอ เหมา.

14 เฆ อี แฮะ โจห แคง กาปึม, เฆ ดี วี ปึอน ดี เจว เลห, ตู โลว ยัม. ปี ดี โฮม เฆ มืร ดี บอ ฆลึม.

15 โอว มูห เฌาพรา ปี กรึบ เบ. โอว อี โบง แตห อึม นัมมูกซารา กาย็อห ดอ แฮะ กาตูน อัน, แตห อึณ ดีงึณ บอ ซีลอย ซีลอย. โอว บอ จืร เฌาพรา อี อึบ โตต ดอน โมยว.

16 โอว แฮะ ฮับ โฆรห โอว แคง โมต แม. โอว มืร แตห แม กอย ครึม ยาบ แด โอว. อึณ บอ มูห โอว อี แฮะ บลัห เบลณ บอ เบลห อูน ดัง กาดาย. โอว บอ วี ต็อห ดี เฆ ดูอี อี กอย แคง มืง ฌีโอน, ‘เบ มูห ดูอี ปี อึบ โอว.’”

17 อึย เบ ดูอี อี กอย แคง มืง เยรูซาแลม, แตห เบ วี อึณซึห, แตห เบ ยีต. เบ แฮะ คัม น็อห รู เฌาพรา ปี เบ แฮะ เดียง ซีลัยะ ป็อห แปะ แฮะ ดัว เฌาพรา อี แตห เบ โยว ดียูห ดีเยณ. อึณ ปี เบ แฮะ เดียง โตต แฮะ โฮม บอ คัร อัน.

18 ดูอี อี กอย แคง มืง ตี, อาว มึห คอ อู วี อี ดี วี ปา แด เบ บอ แยต เบ.

19 อึณ ดี บอ มึห อาเพ อาเร อา โมยว อี โบว แบน ดี เบ. อึณ ยี ตู มึห อี กาเว เบ. อึณ ดี มึห อี ปยาต เบ, โบง แตห เบ ลึร ชึม, แตห มาน มืง เบ กอ ลึร กอ ราม โตต. ปอ อู โมยว, อึณ ดี บอ มึห อี ลาย กาโฆห ลาย กาง็อห ตา มาปัวะ ลาง บอ เอต ปี ดี โฮม. อึณ ยี ตู มึห คอ อู วี อี ดี กาเว เบ.

20 เฆ ฆอน กาโณม อี กอย แคง มืง ตี, เฆ แฮะ ดีหลัห ดีหลอย, แฮะ ปีว โดว บอ อีด ดี บาง อึณเตณ ดอน นา ดอน โปละ. เฆ ดี บอ ปี มาฌัะ อี แฮะ เคร ยอต ดูอี แล แปร. ปาย ตี เฆ แฮะ คัม ปี มาโนว เฌาพรา ดี เฆ, แตห อึณ ปี เฆ แพ โบม.

21 อึย เบ อี แฮะ คัม ดูก แคง มืง เยรูซาแลม, เบ อี แฮะ กาเกียง กาเกห ปี ดูอี ยึต ป็อห, แตห เบ โทม.

22 เฌาพรา อี มูห เฌาพรา ปี กรึบ เบ อี แฮะ บัร เบ, อัน แฮะ ต็อห, “โอว แฮะ ฮอต แวน น็อห รู โอว ดี เบ อี ปี ก็อก ป็อห แปะ แฮะ เดียง เบ ตึอน. ปาย ตี วาย นี เบ อาว โลว ฮาว กาเกียง กาเกห ปี ดูอี ยึต ป็อห ตึอน.

23 โอว แฮะ วี ดึห ก็อก ตี, วี ดัว ดี เฆ อี คาหนาบ เบ, บอ ดี เฆ อี โบง แตห เบ เกห โดบ อึณเตณ บอ แณต เบ ปี อี แณต แดง กาปูห.”