อึย เบ ดูอี อี กอย แคง มืง ฌีโอน, แตห เบ วี โหลห โดว เบ ปี ดูอี แฮะ วี อึณซึห อีด. แตห เบ วี มึห โปลม เฆ แฮณ. อึย เบ ดูอี อี กอย แคง มืง เยรูซาแลม อี มูห มืง อี ซีงา บอด, แตห เบ วี ชึบ ครึง ชีด. วาย นี, เฆ อี ตู คัม ดี โดบ ดารา เฌาพรา,^a บอ เฆ อี ตู ซีงา บอด, เฆ อาว ฮู ปึอน ดี ลึบ แคง มืง เบ ตี.

2 เบ ดูอี แคง มืง เยรูซาแลม, แตห เบ ดียึห กาปูห ดี โดว เบ. แตห เบ วี ยีต ดีฆรึห โดว เบ. เบ อี กอย แคง มืง ฌีโอน อี แฮะ คัม อี เฮา เหมต ฮาว เบ, แตห เบ ฆ็อห แวน วัน อี แฮะ ปัก ดี แมง เบ ตี.

3 เฌาพรา อี อึบ โตต ดอน โมยว แฮะ ต็อห, “ดอ แฮะ แบน เบ หมาย อี เฮา, อาว มึห อาเซ อี ฌาย รึอน ดัว ดี เบ. ปาย ตี ปัน ดี วี ทูด เลห โอว ดี เบ มืร, เบ ตู โลว โตต มาเซ.”

4 เฌาพรา วี ต็อห, “อาต นี เฆ ดูอี ปี อึบ โอว แฮะ ฮาว กอย แคง มืง แอฆึบ. วาย อัน ตี เฆ ดูอี อาซูรียา แฮะ วี คาหนาบ เฆ ปีเยณ.”

5 เฌาพรา ปี วี ต็อห, “ดอ ตี นี มืร, อึณ บอ ปาย ตี. เฆ ดูอี ปี อึบ โอว, แฮะ ฮาว คัม ดูก ตาง ปี ดูอี อี ตู มึห ดีโคว. คูนดีคัม อี อึบ เฆ ตี บอ โบง แตห อี ซีนัน ซีนืง บอ ยาม ตาง. เฆ บอ แนนัะ โอว ดอน ซีแง.

6 ปาย ตี อู ซีแง เฆ ดูอี ปี อึบ โอว, เฆ ดี บอ นับ ปี ปาย โอว เฌาพรา. เฆ ดี บอ โทม โฆรห ปี กาลาง โอว ต็อห, ‘แตห เบ ยอด, โอว กอย ดี นี.’”

7 เอ แฮะ ปึอน ดี ยึร วี อี กาลาง ลอง โฆรห อี แตห น็อห ดูอี ดาคึย. อัน แฮะ ตัห กาลาง ลอง นา บอด นา หมึอม, ลอง อี แตห น็อห ดูอี ฆัด เฆียด. อัน บอ ตัห กาลาง บอ ลอง อัน เฌา อี ดี คยอด อี. อัน บอ กาลาง ดี ดูอี แคง มืง ฌีโอน ต็อห, “เฌาพรา ปี กรึบ เบ, อัน แฮะ อึบ โตต.” ดูอี วี ตี บอ ฮาว กาโลห นอน เฆ ดีลัยะ. เปลา อัน มืร แฮะ ชีด กาเซา.

8 เฆ อี บัร มืง, เฆ ดี บอ โคย, กาโพรม ดี ต็อห โหมว ดาคึย โกบ แฮะ ยึร เฆ เฌาพรา แฮะ วี ตัห ลึบ แคง มืง ฌีโอน.

9 อึย เบ อี กอย แคง มืง เยรูซาแลม อี แฮะ ดึอม กาปยาต ลึร, แตห เบ วี ดาคึย บอ ต็อห โหมว ตาง. โคว, เฌาพรา แฮะ ทูด เลห ดูอี แคง มืง เยรูซาแลม, วี เหลา น็อห เฆ ดูอี ปี อึบ อัน, แตห เฆ วี ดาคึย.

10 อึณ ปี เฌาพรา แฮะ บยัะ แด อัน อี ซีงา บอด, แตห ดูอี ดอน โมยว ปึอน ดี ยึร. อัน ดี วี คยอด เฆ ดูอี ปี อึบ อัน, แตห เฆ ดูอี อี กอย โดง ซืด แดง กาดาย ปึอน ดี ยึร.

11 เบ อี โฆ็ง ครึง ตา อี กอย แคง โฮว เฌาพรา, แตห เบ วี เลห ฮาว. แตห เบ เลห แคง โดง ตู บอด. แกวะ แตห เบ ดึร, เบ ปา โมยว อี ตู ซีงา บอด. แตห เบ แตห โดว เบ ซีงา บอด โดบ ปี หมาณ ดารา.

12 มาแล, คา นี เบ ยี ตู โลว เลห ฮาว กาเตา กาตืะ. เบ มืร ตู โลว เลห เตา. เฌาพรา อี มูห เฌาพรา ปี กรึบ เบ, อัน ดี บอ แยต เบ บอ โดบ ดี ปัน เบ บอ ฆ็อง แร เบ.

13 บัร เบ ยอด, แดเจณ โอว แฮะ มึห อางยาน ดี โบง ดอน โมยว. เฆ ดี บอ อืบ มยูก อัน บอ ต็อห อัน มูห อี บอด อี มยาด กาเซา.

14 เฆ ดูอี อี ยึร อัน, เฆ บอ อาม กาเซา บอ กาจัว กาปึณ. โคว, นา อัน แฮะ ลึร กาปยาต ปี ปี ตู ดึอม ยึร เฆ. บอ โดว โบ็ง อัน อาว ฮู แหนน อารึบ ดูอี.

15 เฆ อาโมยว ดูอี กืน ดี บอ อาม ลอง อัน ตี. เฆ คูนดีคัม มืร ดี บอ อาม, โฆรห กอ ฮู เลห. ปี ตู ดึอม กาลาง อี ดี เฆ, เฆ ดี บอ วี ยึร. ปี ตู ดึอม ยึร เฆ, อึณ ดี วี กาหลูห ดี น็อห เฆ.