1 เฌา บาลัะ แฮะ ฮอต โจห โลง, บอ เฌา เนปอ แฮะ เกห ซีฆึบ. อี เฮา แฮะ ดาง อารึบ ราง เฆ ตี แดง กาตูะ โดว ซัด. บอ มัก อี ลาก เลา อัน แฮะ จัน กาเซา. อึณ บอ แตห โดว ซัดดาวา เฆ ตี กอ นูน กาเซา.

2 อารึบ ราง เฆ ตี มืร, ตู ปึอน วี แคร โดว บรีม เฆ, แกวะ แตห เฆ ลอด ดี ดูอี อี ซี เหมต ฮาว เฆ.

3 เฌาพรา ปี วี ต็อห, “อึย เบ ครึร อาโกบ, แตห เบ โทม โฆรห โอว. เบ ดูอี ปี อึบ โอว อี ซี ฆีด ซี กอย แคง มืง บรีม เบ, โอว แฮะ แตห เบ ฆึอด ตัห. โอว มืร แฮะ ลึมลา เบ ซีณ ดอ ฆึอด เบ.

4 โอว อี มูห เฌาพรา ปี กรึบ เบ, โอว ดี ลึมลา เบ แตห กอ ฌัม ปัน กัด เบ, แตห ฮึก ฆีณ เบ กอ ลูย. โอว อี พาน เบลห เบ. โอว อี ลึมลา เบ. โอว อี จอย เบ บอ คยอด เบ.

5 เบ ดี กาเฆา โอว ดี อาเซ อี ปี โอว? เบ ดี กาเฆา โอว ดี อาเซ, แตห อัน แหนน โอว?”

6 เฆ ดูอี กืน บอ วึห กาบยาว เฆ, วี ฮูห เลห ครีว เฆ. เฆ ปี วี ดึห ณอย เฆ ลัะจู, วี ซัะ รึอน เฆ, วี ฮาว ฌาง เฆ อี นับ ดี จึม ครีว, แตห เฆ วี โบง อารึบ ราง. แฮะ ฮอต, เฆ บอ วี มูด ฆึบ กรึบ อารึบ ราง ตี.

7 เฆ บอ วี กาฆอด อารึบ ราง ตี, วี ฮาว อูน โดง กอย อัน. อารึบ ตี มืร จ็อง ดี ตี. อัน มืร ตู กาโทะ โดง กอย อัน ตี ดอ เหมา. เฆ ปี บอ ฆาว ปวน อัน, ซาคึร ดี อัน มืร, อัน ตู เวียะ โฆรห เฆ. อัน มืร ตู ปึอน คยอด แตห เฆ เลห แคง ดูก ปี คัม เฆ.

8 โคว, เฌาพรา ต็อห, “อึย เบ ดูอี อี กาบัห ดี โอว, แตห เบ วี กาดัวะ กาพา ลอง อัน ตี.

9 แตห เบ วี โหลห ลอง อี แฮะ ดึอม โบว แบน อู ซีณ ดอ มึอน ตึอน. แตห อึณ บอ กาหลูห ดี น็อห เบ, อึณ มึห มี โอว อู กาดัง อี มูห เฌาพรา. แดง โอว นี, อาว มึห เฌาพรา ปอ อู กาดัง.

10 ซีณ ดอ โฆว อัน ดอ มึอน, โอว แฮะ ฮอต กาลาง อูน ลอง อี ดี โบว แบน. ซีณ อาต นี แฮะ เหลณ กาเซา โอว แฮะ ฮอต กาลาง อูน, อึณ ดี แบน ปาย เหมา. โฆรห ปี กาลาง อูน โอว บอ แปะ แฮะ คราม โอว, โอว ดี โบง. โอว ดี บอ โบง แคะ ปี อึง โอว, แตห อึณ กอ เฌะฌูง.

11 โอว ดี แดะ มาฆลาง อี กอย นา เลห ซีแง ตัห. โอว ดี บอ แดะ ดูอี อู วี อี กอย แคง มืง โต็ง. อัน ดี บอ ตัห อู เฌณ, ตัห โบง แปะ แฮะ ต็อห โอว ดี โบง. โอว ดี โบง แคะ แฮะ คราม โอว ดี โบง, แตห อึณ กอ ฮอต โตต.

12 อึย เบ อี มึห น็อห ดืร, น็อห โปลม ดีฆัต, เบ อี ตู เฌณฌา ลอง น็อห ซืร น็อห หมาน, แตห เบ โทม โฆรห โอว.

13 โอว ดี แตห น็อห ซืร น็อห หมาน ดี เบ, แตห อึณ ปี อึณ แฮะ ตัห กาตัด, ตัห กาเครียะ ดี เบ. อาว เหลณ โอว ดี บอ คยอด เบ. โอว ดี คยอด เฆ ดูอี แคง มืง เยรูซาแลม. บอ อาพูง ดังโคว โอว โอว ดี ดัว ดี ดูอี อีซาเรลัะ.” แคะ ตี เฌาพรา แฮะ กาลาง.