1 เฌาพรา วี ต็อห, “อึย เบ ดูอี แคง มืง บาแบ อี ปี ฆอน ดีบยา, แตห เบ ตูต แดง กาปูห. เบ ฆอน ดีบยา แคง มืง กาลาเด, แตห เบ เลห แดง มาลาง เบ, วี ตูต แดง กาดาย. ซีณ ดอ ตี นี ฮาว นา อาต อาว ฮู มึห อาเซ อี ต็อห, เบ ชีด, เบ โคยว.

2 แตห เบ วี ดึห มาว กรีด เบ คามูน, แตห เบ วี กรีด โหงว. แตห เบ บูต เลห กาแมะ ปี กาโหมะ เบ ฆีณ เบ. บูต เลห บอ ซีโตว ตาง เบ บอ ฆลาง เบ, วี กาโลห ดีลัยะ แบลง อึม.

3 เฆ ดูอี กืน ดี บอ ยึร เบ แฮะ ฆลัะ. เบ แฮะ หมึอม ซาย กาเซา. โอว ดี โบง เวียะ แคะ ปี โบง เบ. โอว มืร ตู แตห อาเซ ลอด.”

4 เฌาพรา อี ซีงา บอด, เฌาพรา ปี กรึบ เฆ ดูอี อีซาเรลัะ, อี แฮะ ทูด เลห เย, อัน มูห เฌาพรา อี อึบ โตต ดอน โมยว.

5 อัน ปี วี กาลาง ดี เฆ ฆอน อีบึณ แคง มืง บาแบ ต็อห, “แตห เบ กอย หนีม หนีม, กอย แคง อับ ว็อง. วาย นี, อาว มึห คอ อู วี อี ดี แดะ เบ ต็อห, เบ ปี นาง ฮอคัม อี อึบ แบน มืง แบน มืง.

6 โอว เฌาพรา มืร แฮะ ดึอม รู จาว ดี เฆ ดูอี ปี อึบ โอว. โอว มืร แฮะ แวน คาฆูน โอว, วี แตห อึณ กาดาต. โอว แฮะ อาบ แตห เบ อึบ เฆ. มาแล, เบ ยี ตู มึห น็อห กาเว เฆ. เบ แฮะ วี แตห เฆ ดูอี กัด ดูอี แฆ วี โบง ฆาน จัน.

7 เบ บอ ทาง, เบ ดี ปึอน ดี แบน นาง ฮอคัม เซเซ. เบ มืร ตู กาพา ลอง อัน ตี. เบ มืร ตู ทาง, เบ ดี ฌัม ดูก.

8 อึย เบ อี อึง ดี โบยว ดี เกยา โดบ น็อห บรีม เบ, บอ ตู กาดัวะ กาพา มาเซ. แตห เบ โทม. เบ บอ ทาง, เบ แฮะ ปึอน ดี กอย ดาคึย, กอย ซีคยา. เบ บอ ต็อห, ‘แฮะ มูห มี โอว, อาว มึห อี เฮา คอ อู วี อี ปี โอว.’ เบ บอ ทาง, เบ อาว ฮู กาดูห ดี แบน ยา ซีปรัห, อาว ฮู โลว คัม ดูก โกบ แฮะ ยัม ฆอน เบ.

9 อู ซีแง ดูก อา โมยว ดี บอ โบว แบน ดี เบ อู เฌณ. เบ โลว คัม บอ ดูก อี แตห อีมาย เบ ยัม บอ ดูก อี แตห ฆอน เบ ยัม. เบ ปี บอ แฮะ นับ ดี บึง กานัม บอ โบง อาดาด เฆ อากยูน มืร, อีมาย เบ เฆ ฆอน เบ ยี ดี ชึม.

10 เบ แฮะ บึง อี ฮาย อี จีจีว แปะ แฮะ โบง เบ ตี, เบ บอ ทาง อาว มึห อี ยึร คอ อู วี. อางยาน เบ บอ ปี นับ เบ, อึณ แฮะ วี แยต แตห เบ กาลึบ. โคว, เบ แฮะ ต็อห ดี โดว บรีม เบ, ‘อาว มึห อี เฮา. แดง โอว อาว มึห อาเซ.’

11 เบ ดี บอ คัม อาเพ อาเร. อาดาด ปี บึง เบ ตี, อึณ ยี ตู ปึอน ฆ็อง แร เบ. โมยว อี นับ ดี แตห เบ ลึร ชึม, อึณ ดี บอ โบว แบน กาจัว ดี เบ อู เฌณ. เบ มืร ตู ปึอน ดองบาน. ดูก ปี ตู นัมโหลห เบ, อึณ ดี ตัห ดี เบ ดอ ตู ทาง เบ.

12 แตห เบ บึง อาดาด บอ อากยูน แปะ แฮะ โบง เบ, แปะ แฮะ ออน เบ ดี โบง ซีณ ดอ มูห เบ ฆอน. เซ อึณ บอ หมึอม แบน อาฆยึร ดี เบ, แตห เบ โบง, แตห อึณ บอ ฆ็อง เบ. มัง เฌณ อึณ ยี ดี แตห เบ กาจัว บอ โยว ดียูห ดีเยณ.

13 เบ แฮะ ดูก หณาบ กาเซา โกบ แฮะ วี กามวน ซังคยาง กืน กาเซา เบ. เฆ อี นับ ดี ยอด ปี ปาย นาคาด ฆางหราว บอ เฆ อี นับ ดี ยอด นาคาด ซีมัณ, เฆ อี นับ ดี ยอด อี ดี ปาย ดอน มาเฆียน, แตห เฆ ตาก ดี ยอด ลอง อี ดี โบว แบน ดี เบ ตี, แตห อึณ คยอด เบ.

14 เฆ ดา ซารา ตี, เฆ ดี บอ ปี กาอัห กาโอบ. เงา ดี บอ กาซึม โตต เฆ. เฆ มืร ตู ปึอน จอย แตห โดว บรีม เฆ ลอด ดี แปละ เงา อี แฮะ กูห แฮณ กาเซา. เงา ตี, อาว มูห อึณกึร เงา แตห อี วาด, อาว มูห เงา อี แตห อึณ ซีอูณ ดี อี.

15 เฆ ดา ซารา ตี, เฆ นับ ดี จอย เบ มี แคะ ตี. เบ แฮะ โบง ฆาน รึม โดบ เฆ บอ กาจึห กาย็อง โดบ เฆ ซีณ ดอ มูห เบ ฆอน ดีรอย. เฆ ดอน อี ยี แตห เบ โบง ฮาว อี กาลึบ เซเซ. อาว มึห อาเซ อี ดี ปึอน คยอด เบ.”