1 เฌาพรา วี กาลาง ดี คูนดีคัม อาซายรัด อี มูห ดูอี ปี ร็อห ปี ตึย อัน. อัน ต็อห ดี จอย คูนดีคัม ตี, แตห อึณ ปี เฌาพรา ปา แด อัน, แตห อัน กาโฆห แป ดา ซึก ดอน โมยว, แตห อัน บลัวะ แวน บอ เฆ คูนดีคัม แบน กาดัง แบน กาดัง, แกวะ แตห เฆ ซี มึห ปวน. เฌาพรา มืร ดี วึห มาโลห มืง, แตห คูนดีคัม อาซายรัด ปึอน ดี ลึบ, แกวะ แตห เฆ วี กาบีด. เฌาพรา บอ ต็อห,

2 “โอว ดี แยต ดี อาต แม. แคะ กอย นอน อี ตาง, โอว ดี แตห อึณ ฆลัง. บอ มาโลห บ็อง, โอว ดี กาบัก แวน. โอว ดี แดบ แวน บอ มาโลห ฮีน.

3 โอว ดี วี ดึห โกรวกราม อี กอย แคง อับ ว็อง บอ โกรว อี มึห ดีง็อห ดีคัน แปะ แฮะ เครียง อูน อี, วี ดัว ดี แม. ปาย ตี แม ดี บอ นับ โอว มูห เฌาพรา อี มูห เฌาพรา ปี กรึบ ดูอี อีซาเรลัะ บอ เฌาพรา อี แฮะ แดะ จืร แม.

4 โอว แฮะ แดะ แม โกบ ร็อก โอว ดูอี อาโมยว อาโกบ อี มูห แดเจณ โอว บอ ดูอี อีซาเรลัะ แปะ แฮะ ร็อห โอว. แม ปี ซัะ นับ โอว มืร, โอว ยี ดี แดะ จืร แม, โบง แตห แม มึห ซาเร.

5 มี โอว อู กาดัง นี มูห เฌาพรา. แดง โอว อาว มึห เฌาพรา ปอ อู กาดัง. แม ปี ซัะ นับ โอว มืร, โอว ดี แตห แม มึห โปลม เฆ แฮณ แคะ ปี โลว แม.

6 โอว โบง ปาย ตี แตห เฆ ดูอี นับ, แดง โอว อู กาดัง นี, อาว มึห เฌาพรา ปอ อู กาดัง. เฆ อี กอย โดง ซืด กาดาย จูห อู บลาก กอ วี ฌัม โดง ซืด ปอ อู บลาก, แตห เฆ นับ, อึณ มึห มี โอว อู กาดัง นี อี มูห เฌาพรา.

7 โอว บอ มูห อี โบง แตห อึณ มึห บลาง บอ อับ ว็อง. โอว บอ โบง แตห อี โบยว ดาคึย, บอ โบง แตห อี คัม อาเพ อาเร. ฌึร ตี ดอน โมยว, อึณ บอ มูห โอว เฌาพรา อี โบง.

8 โอว ดี บอ กาลาง แตห ดูอี มึห น็อห ซืร น็อห หมาน อี เลห ตัห แคง ฆางหราว, แตห อึณ บอ โจห ปี อึม ฆลาย. แตห ดูอี กืน มึห น็อห ซืร น็อห หมาน, แตห อึณ คยอด เฆ, แตห อึณ ปี กาดาย บอ วึห บอ รับ บอ รวห อึม ฆลาย ตี. โอว เฌาพรา ดี โบง แตห อึณ แบน ปาย ตี.

9 วี อี โบง กาบัห ดี โอว อี มูห ดา กาณา อี พาน เบลห อัน, อัน ดี คัม ดูก ตาง. อัน ปี โดณ กาโละ กาดาย แปะ แฮะ แวน อี. กาดาย อี กาปีด ตึอน, อัน ตู ปึอน วี ดีหมอด ดา อี โบง กาโละ ต็อห, ‘มาเซ ปี โบง แม?’ กาดาย กาปีด ตี ตู ปึอน วี แน ดา อี โบง อัน ต็อห, ‘ดา อี โบง โอว นี ตู โหมว ดี โบง.’

10 เซ ดูอี อู วี วี ต็อห ดี ฆูณ อัน, ‘เหมา อึณ ปาย ปี แตห แม โอว แบน ดูอี?’ บอ ต็อห ดี ฆูณ อัน, ‘เหมา อึณ ปาย ปี แตห แม โอว ฆึอด ตัห?’ ดูอี วี ตี ดี คัม ดูก ตาง.

11 เฌาพรา อี มูห เฌาพรา อี ซีงา บอด, เฌาพรา ปี กรึบ เฆ ดูอี อีซาเรลัะ บอ มูห ดา กาณา อี พาน เบลห เฆ. อัน แฮะ ต็อห, “เบ ตู ปึอน ดีหมอด โอว ลอง เฆ ฆอน โอว วี อี ดี ตัห วาย นี. เบ มืร ตู ปึอน จัร โอว โบง ปาย นี ปาย นี.

12 โอว มูห อี พาน เบลห กาดาย บอ ดูอี. โอว บอ แตห เฆ กอย แดง กาดาย ตี. โอว แฮะ ตา อาพูง ดังโคว โอว, โบง แตห ฆางหราว อึณบลัห. โอว แฮะ จัร ซีแง เฆ มาเฆียน บอ ซีมัณ บอกาเฆลียด, แตห เฆ เลห.

13 โอว ยี ดี จัร คูนดีคัม อาซายรัด, แตห อัน โบง แคะ ปี คราม โอว, แตห อึณ เฌะฌูง, แตห อึณ บอ โดบ น็อห ซืร น็อห หมาน โอว. โอว ดี โบง แตห อึณเตณ โดง ดี ฮาว อัน ดอน โปละ ซืร ซีคยา. อัน ดี วี อึณปราย มืง ปี อึบ โอว อี มูห มืง เยรูซาแลม. อัน ดี โบง แตห เฆ ดูอี ปี อึบ โอว ลอด เลห แคง ดูก. อึณ ยี ตู มึห อาเซ อี ฌาง อัน โบง, แตห อัน ปึอน อาฆยึร. อาว มึห อาเซ อี ดัว ลักซอง ดี อัน.” เฌาพรา อี อึบ โตต ดอน โมยว แฮะ กาลาง ปาย ตี.

14 เฌาพรา ปี วี กาลาง ดี เฆ ดูอี อีซาเรลัะ ต็อห, “ปี กาจึห กาย็อง บอ ครัม เฆ ดูอี แคง มืง แอฆึบ ฆาย มืง กูซา, อึณ ดี วี แบน โกรว เบ. ดูอี ดี โต็ง ดี ตาง อี กอย แคง มืง เซบา, เฆ ดี วี ตัห โดง กอย เบ บอ กาดูห ดี แบน หมาย เบ. เฆ ดี บอ คัม อี ปัก เฆ ตา วัน ฮีน, วี โดบ ดี ปัน เบ. เฆ ดี บอ วี โฆม กรึบ เบ บอ กันโดว เบ ต็อห, ‘เบ มูห ดา กาณา เย, เฌาพรา แฮะ กอย รึม โดบ เบ. แดง เฌาพรา กาดัง นี, อาว มึห เฌาพรา ปอ อู กาดัง.’”

15 อึย แม เฌาพรา ปี กรึบ ดูอี อีซาเรลัะ, แม มูห เฌาพรา อี เครียง โดว แม. แม บอ มูห อัน เฌา อี คยอด เฆ ดูอี ปี อึบ แม.

16 เฆ อี โบง อารึบ ราง, เฆ ดี วี ซาย อี บอ ชึม ซาเร. เฆ บอกาเฆลียด ดี หราย โตต อู เฌณ.

17 อี มูห เฆ ดูอี อีซาเรลัะ, เฌาพรา ยี ดี คยอด เฆ แตห เฆ กอย ซีคยา เซเซ. เฆ ตู โลว คัม อี หมึอม ซาย บอ อี ชึม ซาเร ดอ เหมา, บอ ดอ มูห โจว เฆ บอ ดอน โจว ดอน บาน.

18 เฌาพรา อี แฮะ พาน เบลห ฆางหราว, อัน แฮะ แตห บอ กาดาย กอย มัน ซีคยา. อัน เฌา มืร ตู โบง แตห กาดาย เบลา ตู มึห มาเซ. อัน โบง แตห อึณ แบน โดง ดี กอย โดว ซัดดาวา. อัน เฌา ตี มืร แฮะ ต็อห, ‘โอว อี มูห เฌาพรา. แดง โอว อู กาดัง นี, อาว มึห เฌาพรา ปอ อู กาดัง.

19 โอว มืร ตู ดึอม เครียง ปี กาลาง โอว, ตู แตห อึณ ลึห ดี อี. โอว มืร ตู ต็อห แตห เฆ ดูอี อาโมยว อาโกบ เหรต โอว, เซ อึณ ตู มึห ดีโคว. โอว มูห เฌาพรา อี กาลาง โฆรห มูห โฆรห หมาน, แตห อึณ บอ ลึห ซีคยา ดี อี.’”

20 เฌาพรา แฮะ ฮอต กาลาง ปาย ตี. อัน ปี วี ต็อห, “อึย เบ ดูอี อีซาเรลัะ บอ ดอน ครึร, แตห เบ วี ตัห กอย กาฌูะ. เบ อี แฮะ ลอด อาเพ อาเร ดี ดูอี แคง มืง เฮา, แตห เบ วี ตัห โดง กอย บรีม เบ. เฆ อี ดึห เฮ โบง อารึบ ราง, วี กรึบ, บอ เฆ อี ซาคึร ดี เฌาพรา อี ตู ปึอน คยอด เฆ, ดูอี เฆ ตี บอกาเฆลียด, เฆ ตู มึห อางยาน.

21 แตห เบ ตัห กาลาง ลอง อี ดี ปาย นา อาต ฮาว. แตห เบ ลาย กามวน ซังคยาง ลอง อัน ตี. แตห เบ กาลาง อู ซีณ ดอ มึอน กอ ฌัม ดอ ตี นี, อึณ มึห อาเซ อี แฮะ ปึอน กาลาง ลอง อี ดี แบน นา อาต ฮาว. อึณ มูห มี โอว เฌาพรา, อี แฮะ กาลาง. แดง โอว, อึณ มืร ตู มึห เฌาพรา ปอ อู กาดัง. โอว มูห เฌาพรา อี มึห น็อห ซืร น็อห หมาน. โอว มืร นับ ดี คยอด อี. แดง โอว อาว มึห เฌาพรา ปอ อู กาดัง.

22 อึย เบ ดูอี อี กอย โดง ซืด กาดาย, แตห เบ วี ตัห เครียะ โอว, แตห โอว ปึอน ดี คยอด เบ. โคว, โอว มูห เฌาพรา อู กาดัง, อาว มึห ปอ อู กาดัง.

23 โอว แฮะ ดัว กาดีก ซัดฌา, โอว มืร ตู บยอง ตู กาปลูะ โฆรห ตี ดอ เหมา. โคว, อึณ แฮะ หมาน อาคาคัร. โอว มืร แฮะ ฮอต ดืง ต็อห, ดูอี ดอน อี ดี ตัห ครึบเครา ดี อาต โอว. บอ ดอน อี ดี โลว คัม ดี กาลาง ลอง มูห โอว เฌาพรา.

24 ดอน อี ดี บอ ต็อห ลอง โอว, “มี เฌาพรา นับ ดี ออง, นับ ดี แป โตต ดอน โมยว. มี อัน เฌา มึห บอ อาพูง ดังโคว ตาง. แคะ กอย เฆ รันซู อัน บอกาเฆลียด ดี วี หมึอม ซาย ดี อาต อัน เฌา.”

25 ดูอี อาโมยว อีซาเรลัะ บอกาเฆลียด, เฆ ดี บอ วี อืบ มยูก อัน เฌา โกบ แฮะ หณึม บึง เฆ อัน เฌา บอ ปึอน น็อห ซืร น็อห หมาน.