1 เฌาพรา วี ต็อห, “อึย เบ ดูอี อาโมยว อาโกบ อี มูห แดเจณ โอว บอ เบ ดูอี อีซาเรลัะ อี แฮะ แบน ดูอี ปี ร็อห โอว, แตห เบ โทม โฆรห โอว.

2 โอว มูห เฌาพรา อี พาน เบลห เบ. ซีณ อาต ฆึอด เบ โอว แฮะ โบง อูน เบ. โอว มืร ดี จอย เบ. เบ ครึร อาโกบ อี มูห แดเจณ โอว บอ เบ ครึร อาเยซูโรน อี มูห วี ปี ร็อห โอว, แกวะ แตห แม โยว.^a

3 ดี กาดาย กาฮ็อห, โอว ดี โหลว อึม. ดี กาดาย เฮณ, โอว ดี วี แตห อึณ มึห อึม แหล. ปาย ตี โอว ดี บอ แตห น็อห พึอม โอว ลึบ แคง น็อห เฆ หลูกหลาน เบ. โอว ดี บอ ม็องการา ดัว ดี เฆ ครึร เบ.

4 เฆ ดี บอ เจว เหรห, เจว ตาง ปี แปร อี แฮะ แพ อึม, แตห อึณ ปี บอ เฮ อาราบ อี กอย โคบ บาง แบลง.

5 อู วี ดี บอ ต็อห, ‘โอว มูห ดูอี ปี อึบ เฌาพรา.’ มัง อี บอ ดึห จืร อาโกบ, แบน จืร เฆ. มัง อี เฆ ดี บอ แดม ดี แด เฆ, ‘เฌาพรา อี อึบ โอว.’ เฆ ปี ดี วี ต็อห, ‘โอว มูห อาโมยว อีซาเรลัะ,’ แตห อึณ แบน จืร เฆ.”

6 เฌาพรา อี มูห คูนดีคัม เฆ ดูอี อีซาเรลัะ, อี ทูด เลห เฆ บอ อึบ โตต ดอน โมยว, อัน ปี วี ต็อห, “โอว มูห เฌา อี กาจูห โตต ดอน โมยว. โอว ดี บอ โบง แตห อึณ กอ ฮอต. แดง โอว อาว มึห เฌาพรา ปอ อู กาดัง.

7 อึณ มืร ตู มึห อาเซ อี ปี โอว. เซ เบ ยี ทาง แฮะ มึห, แตห วี ตี ตัห กาลาง ดี โอว ลอง อี ดี โบว แบน นา อาต ฮาว ดอ หณัม แบน อัน. แตห อัน กาลาง ดี อาต ลอง อี หณัม แบน. แตห อัน กาลาง ดี โอว บอ ลอง อี แฮะ ปวน ตัห ซีณ ดอ โฆว แตห อึณ กอ วี ฌัม ดอ ตี นี.

8 อึย เบ ดูอี ปี อึบ โอว, แกวะ แตห เบ ดียูห ดีเยณ ดี โยว. โอว แฮะ ฮอต กาลาง ดี เบ ลอง อี แฮะ ฮอต โบว แบน ตี. อาว มึห เฌาพรา อี ซี ดี ตาง หลึอม โอว. อาว มึห อี ดี ปึอน บึง อี ปี ดาอาง มาว. โอว มืร ตู ดึอม ยึร.”

9 เฆ อี โบง อารึบ ราง อาว มึห ดีโคว มาเซ. โกรว ปี มาด เฆ แฮะ ง็อห ตาง, เฆ ตู มึห ดีง็อห ดีคัน มาเซ. เฆ อี อืบ อารึบ ราง ตี, เฆ ปี ดูอี งาย อับ. เฆ ตู มึห อางยาน. เฆ ดี วี ซาย อี.

10 วี อี โบง อารึบ เฌาพรา, อี โหลว บอ อารึบ ราง, อัน ตู มึห อาฆยึร มาเซ.

11 บอ อัน บอ ฆึก อัน, เฆ ดี วี ซาย อี. เฆ ดี วี โจห โดง เตียม. เฆ อี โบง อารึบ ราง, เฆ ตู มึห ดีโคว. เซ เฆ ตัห กาฌูะ บยัะ แคะ กยัะ แคะ ปี นับ เฆ, เฆ ดี วี โยว, วี หมึอม ซาย ดอน อี.

12 ดา อี จึม ฮีน, อัน บอ ดึห ดีฆัร ฮีน, ฮับ แคง เงา กาซ็อห. แฮะ ฮอต, อัน บอ วี ดึห มีแด มัห แฮณ แฮณ ดีฆัร ฮีน ตี, แตห อึณ วี แบน อารึบ ราง. ดอ โบง อัน ปาย ตี อึณ บอ แบน ซี เดียง อึม บอ แบน กาปราณ โบม บอ นูน กาเซา.

13 เซ อึณ มูห ลักซามา, อัน มืร ปาย ตี. อัน บอ ดึห แมมี วี ทัด เฮ, วี ดึห อึม มึก, แดม ราง อารึบ. แฮะ ฮอต, อัน วี ดึห อึณโปลห เฆ กาล็อง ครึง ตา, วี โบลห แตห อึณ แบน ราง อารึบ อีมาย อี ชีด, วี เบลห อูน แดง ยางพรา.

14 เฆ บอ ฮาว แดบ ตัห เฮ อารีด, บอ ร็อห บอ เฮ ทาซูรา บอ เฮ เทเรบ อี กอย แคง แปร. เซ อาว ปาย ตี เฆ บอ ซัม เฮ อึณเก, แตห ฆลาย บอ โจห, แตห อึณ เจว ตาง.

15 ดูอี วี ตี, อัน บอ วี โบง แตห อึณ แบน เฮ โดะ. อาดา อู ปอด, อัน โดะ แคง เงา, แตห อัน วี ปึอน ดี วาด, ปึอน ดี ดัง ปี ดี โฮม. อาดา ปอ อู ปอด, อัน บอ วี โบง แตห อึณ แบน อารึบ ราง ปี ดี กรึบ อัน.

16 อาดา อู ซีะ, อัน บอ วี ดัห แบน เฮ โดะ, แตห อัน ปึอน ดี โคว ยัง ปี ดี ฮาบ อัน, แตห อึณ กอ ซีน ซีคยา. อัน บอ วี วาด เงา ตี บอ ต็อห, “อาโล, เงา โอว นี แฮะ ซีอูณ กาเซา, แฮะ หมึอม อาคาคัร.”

17 ซีะ อี ซี ฆีด, อัน บอ วี โบง อารึบ ราง. แฮะ ฮอต, อัน บอ วี ครึบเครา กรึบ อารึบ ราง ปี โบง อัน ตี บอ วี ซาคึร ดี อารึบ ราง ตี ต็อห, “แม มูห เฌาพรา อี อึบ โอว. โอว หมาณ, แตห แม คยอด โอว.”

18 ดูอี อี โบง ฌึร ตี, เฆ ตู มึห อางยาน, อาว กาหลูห ดี น็อห เฆ ลอง ปี โบง เฆ ตี. เฆ บอ กาบีด งาย เฆ, แกวะ แตห เฆ ยึร มาเซ. เฆ บอ กาบีด อางยาน เฆ, แกวะ แตห เฆ นับ ลอง เฌาพรา.

19 อาว มึห ดูอี อี มึห อางยาน คอ อู วี, อี วี แตห อึณ กาหลูห ดี น็อห อัน ต็อห, “ออ, เฮ นี อาดา อู ซีะ โอว แฮะ โดะ แคง เงา, แฮะ วี ดึห คามูน ด็อง แดง อึณกึร อัน. โอว แฮะ ปีง บอ ยัง วี ฮาบ กอ แพ. เซ อึณ ปาย ตี เฮ ซีะ อี ซี กาโลย ตึอน อาว กาอาบ โบง อี หมึอม กาอีห, บอ อาว กาอาบ โอว วี มูด กรึบ ดี อาต เฮ ซีะ ตี.”

20 ปี โบง อัน ตี อึณ บอ ปี อัน โฮม กาฟาง ปีเยณ. อี เฮา อี ตู มึห น็อห ซืร น็อห หมาน แฮะ กาโลว, โบง แตห อัน กาลึบ. ปาย ตี อัน ตู แป ดี คยอด น็อห พึอม อัน. อัน มืร ตู ต็อห แคง น็อห อัน, “อารึบ ราง ปี โฆ็ง โอว แคง แด บลาก อาอัห โอว นี, อึณ ตู มูห เฌาพรา.”

21 แฮะ ฮอต, เฌาพรา ปี วี ต็อห, “อึย เบ ดูอี อาโมยว อาโกบ บอ เบ ดูอี อีซาเรลัะ, แตห เบ โนว, แตห เบ นับ, เบ มูห แดเจณ โอว. โอว แฮะ พาน เบลห เบ, แตห เบ แบน แดเจณ โอว. โอว มืร ตู ปีว เบ ดอ เหมา.

22 โอว แฮะ ฮอต บยัด แวน แปะ แฮะ กาลึบ เบ, แตห อึณ หราย ปี อึณอูะ. โอว แฮะ ฮอต ฆ็อห แวน หมาบ เบ, แตห อึณ หราย ปี อึม ดีงาน. แตห เบ วี ตัห โดง กอย โอว, โอว แฮะ ฮอต ทูด เลห เบ.”

23 “อึย เบ อี กอย แคง ฆางหราว, แตห เบ ต็อห โหมว โกบ แฮะ ดาคึย น็อห เบ. โคว, เฌาพรา แฮะ โบง ปาย ตี. เบ อี กอย ครึม กาดาย, แตห เบ ดัด ตาง. เบ นอน ตาง บอ เฮ เฆ แปร, แตห เบ กาโพรม ดี ต็อห โหมว ตาง ตาง, ต็อห โหมว ดาคึย ดาคึย อี อืบ มยูก เฌาพรา. โคว, เฌาพรา แฮะ คยอด เฆ ดูอี อาโมยว อาโกบ บอ บยัะ อาพูง ดังโคว อัน แคง มืง อีซาเรลัะ.”

24 เฌาพรา ปี วี ต็อห, “โอว มูห เฌาพรา อี แฮะ ทูด เลห เบ. ซีณ อาต ฆึอด เบ โอว แฮะ โบง เบ. โอว บอ มูห เฌาพรา อี พาน เบลห โตต ดอน โมยว. โอว อู กาดัง นี อี แฮะ ปีแครณ เบลณ เฆ ฆางหราว. โอว มืร แฮะ พาน เบลห กาดาย ราง โอว อู วี, อาว มึห อาเซ อี จอย โอว.

25 โอว โบง แกวะ แตห อึณ แบน ปี กาลาง เฆ ดูอี อี กาโลว ดี บยาน โฆรห เฌาพรา. บอ เฆ ดา เบดาง, โอว วี แตห อึณ ลึห แคะ รึร เฆ. บอ เฆ ดา ซารา, โอว โบง แตห อางยาน เฆ หราย โตต. โฆรห ปี กาลาง เฆ อี มึห อางยาน, โอว แฮะ แตห อึณ วี กาฟัร กาเฟียน โตต ดอน โมยว.

26 โอว มืร โบง แตห อึณ แบน ปี กาลาง เฆ แดเจณ โอว. โอว ดี โบง โดบ โฆรห เฆ ดูอี ปี ตึย โอว, แตห เฆ กาลาง ปี คราม โอว ดี โบง. ลอง เฆ ดูอี มืง เยรูซาแลม โอว มืร แฮะ กาลาง ต็อห, ‘เฆ ดูอี กืน ดี วี ตัห กอย ดี นี.’ แฮะ ฮอต, โอว ปี วี กาลาง บอ ลอง มืง อี กอย แคง อืง ยูดา ต็อห, ‘เฆ ดี บอ วี อึณปราย, วี แด มืง เฆ นี. โอว มืร ดี แตห เฆ วี อึณปราย อี แฮะ ฮอต ลึร, แฮะ ฮอต กาปยาต.’

27 โอว มืร แฮะ จัร อึม นัมมูกซารา, แตห อัน ฮีด กาฮ็อห. บอ อึม แบลง แคง มืง เบ, โอว ดี แตห อึณ ฮีด.

28 โอว แฮะ กาลาง ลอง คูนดีคัม อาซายรัด ต็อห, ‘แม ปี ดูอี อี เฮียง มาบู โอว. แม ดี บอ โบง โดบ แคะ ปี ซี แตห โอว แม โบง. แม ดี บอ จัร เฆ, แตห เฆ วี อึณปราย มืง เยรูซาแลม, วี ซัม อูน บอ เจณ ร็อง โฮว เฌาพรา.’”