1 ปัน ตี คูนดีคัม อาเฮจัะกี บอ ยึร โฆรห ตี, อัน บอ กายาต ครึง ตา อัน, บอ วี ชึบ ครึง จาน, วี ฮาว แคง โฮว เฌาพรา.

2 อัน บอ แดะ อาเอยาคีม อี อึบ โตต ดอน โมยว แคง โฮว คูนดีคัม บอ ดา จาเร อี จืร อาเซบานา บอ ดา ตาง อี หลู ดี เฌาพรา, แตห เฆ ชึบ โตต ครึง จาน, วี จัร เฆ ฮาว โดง กอย ดูอี อี บยาน โฆรห เฌาพรา อี จืร อาอีซายัะ, อี มูห ฆอน อาโมด.

3 เฆ บอ ต็อห ดี อัน, “คูนดีคัม อาเฮจัะกี ต็อห, ‘อาตึร นี แฮะ มูห ซีแง อี มึห ดูก ตาง, ซีแง โลว โทม โฆรห ปี คาหนาบ อี เฮา, อี แฮะ แตห เย หมึอม ซาย. อึณ ปี ฆอน งัะ แฮะ โลว ฆึอด, ยี ตู มึห โปลม ดี แตห อัน ฆึอด. 4 โอว ทาง, เฌาพรา อี มูห เฌาพรา ปี กรึบ แม, อัน แฮะ ยึร โฆรห ปี กาลาง ดา อี อึบ ดา ซึก คูนดีคัม อาซูรียา. คูนดีคัม ตี แฮะ จัร, แตห อัน ตัห กาลาง นา จาว ดอน โมยว ลอง เฌาพรา อี มูห เฌาพรา อาคาคัร. โอว ทาง, เฌาพรา ดี บอ เอห อัน โกบ แฮะ กาลาง อัน โฆรห ตี. โคว, โอว หมาณ, แตห แม ซาคึร บอ ดาง เฆ อี ซี กอย แคง มืง ยูดา เอ นี.’”

5 อาอีซายัะ แฮะ ฮอต ยึร โฆรห ปี ดัม อาเฮจัะกี ดี แดเจณ อัน ตี, 6 อาอีซายัะ วี ต็อห ดี เฆ, “แตห เบ วี เวณ กาลาง ดี ดา กาณา เบ ต็อห, ‘เฌาพรา ต็อห, แกวะ แตห แม โยว โฆรห แปะ แฮะ ยึร แม ตี, แปะ แฮะ กาลาง แดเจณ คูนดีคัม อาซูรียา นา จาว ลอง โอว ตี. 7 บัร เบ ยอด, โอว ดี ฮับ แคง น็อห อัน, แตห อัน มึห น็อห ซี เวณ. โอว ดี แตห อัน วี เวณ โดง กอย บรีม อัน โกบ ยึร อัน ซาดาง อู โมยว. อัน ดี บอ ยัม ดี มาปัวะ ลาง อี กอย แคง แด อัน.’”

8 ปัน ตี ดา โบว ตาง อี อึบ ดา ซึก คูนดีคัม อาซูรียา ตึอน, อัน บอ วี ยึร ซาดาง ลอง คูนดีคัม แฮะ ฮอต เลห ฮาว ตัะ มืง ลาคีด. ดอ อัน ตี อัน บอ วี เวณ, บอ กาตูณ คูนดีคัม ดอ กาโฆห อัน ดี มืง ลีปานา.

9 คูนดีคัม อาซาคารีบ แฮะ วี ยึร อี เฮา กาลาง ลอง คูนดีคัม อาตีรีกา อี มูห ดูอี กูซา. เฆ ต็อห, “อัน ดี ตัห กาโฆห บอ ดี แม.” แฮะ ฮอต, คูนดีคัม บอ วี จัร ดาลาม อัน, แตห เฆ ฮาว ตึย แปะ ดี อาเฮจัะกี ต็อห, 10 “แกวะ แตห เฌาพรา ปี กรึบ แม กาโลว แม ต็อห, ‘คูนดีคัม อาซูรียา ตู ปึอน ดี อึบ มืง เยรูซาแลม.’ 11 แม แฮะ ยึร แปะ แฮะ โบง เฆ คูนดีคัม อี อึบ มืง อาซูรียา. เฆ แฮะ ปยาต แวน มืง ดอน มืง. บอ แม ตู นับ ดี ลอด.

12 แม แฮะ ดึอม ยึร, เฌาพรา แบน กาดัง ปี กรึบ ดูอี เฮา อาว ปึอน จอย เฆ. อึณ มูห ดา ดา โอว, เฆ แฮะ ปยาต แวน เฆ บอกาเฆลียด. อี มูห เฌา ปี กรึบ ดูอี กอจัน, ดูอี ฮาราน, ดูอี เรจัะ บอ เฆ ดูอี เอเดน อี กอย ดี มืง เตลัะฌา, เฆ บอกาเฆลียด ตู ปึอน จอย มาเซ.

13 แตห แม เหรต บอ คูนดีคัม อี อึบ มืง ฮามาด, คูนดีคัม อี อึบ มืง อาราพาด, คูนดีคัม อี อึบ มืง เซพาอีม, คูนดีคัม อี อึบ มืง เฮนา, คูนดีคัม อี อึบ มืง อีวา, แม อาว ปึอน ยึร เฆ, เฆ อาว ฮู กอย ดี เหมา.”

14 คูนดีคัม อาเฮจัะกี บอ ดึห แปะ ตี ดี ดาลาม ตึอน. แฮะ ฮอต ตีห, อัน บอ วี ฮาว แคง โฮว เฌาพรา. อัน บอ บลัห, แตห เฌาพรา ยอด.

15 แฮะ ฮอต, อัน บอ วี ซาคึร ดี เฌาพรา ต็อห,

16 “อึย แม เฌาพรา อี อึบ โตต ดอน โมยว, แม มูห เฌาพรา ปี กรึบ ดูอี อีซาเรลัะ. แม เฌา กอย โดง กอย เฆ อามู อามาด เฌาพรา อี จืร เครูบ. แม เฌา กอย แคง มาน มืง ดอน มืง แดง กาดาย. อึณ มึห แม เฌาพรา อู กาดัง อี มูห เฌาพรา. แม เฌา แฮะ โบง บอ ฆางหราว บอ กาดาย.

17 โอว หมาณ แม เฌาพรา, แตห แม โทม. หมาณ, แตห แม ยอด โลง, แตห แม ยึร โฆรห แปะ แฮะ แดม อาซาคารีบ. อัน แฮะ ตัห กาลาง นา จาว ลอง แม เฌาพรา อี มูห เฌาพรา อาคาคัร.

18 อึย แม เฌาพรา, แฮะ หมาน, เฆ คูนดีคัม อี ดึอม อึบ มืง อาซูรียา เฆ แฮะ ปยาต ดูอี ดอน มืง ดอน โปละ. บอ มาน มืง เฆ ตี, เฆ แฮะ โบง แตห อึณ ลึร.

19 เฆ แฮะ ดึห บอ อารึบ ปี กรึบ อาโมยว ดูอี เฆ ตี, โดะ แคง เงา. อารึบ ยี ตู มูห เฌาพรา คาคัร. อึณ มูห มี มาว เฆ เฮ ปี โบง ดูอี, แปะ แฮะ ปยาต แวน คูนดีคัม ตี.

20 แม เฌาพรา, แม มูห เฌาพรา ปี กรึบ โอว. ดอ ตี นี โอว หมาณ, แตห ดูอี ดอน มืง ดอน โปละ กอ นับ, อึณ มูห แม เฌาพรา อู กาดัง อี มูห เฌาพรา อาคาคัร. โอว ซาคึร หมาณ, แตห แม เฌา คยอด เย, แตห เย ลอด ดี คูนดีคัม ตี.”

21 แฮะ ฮอต ซาคึร, อาอีซายัะ อี มูห ฆอน อาโมด ตึอน, อัน บอ วี จัร ดูอี อู วี ฮาว โดง กอย คูนดีคัม อาเฮจัะกี บอ ต็อห ดี อัน, “เฌาพรา อี มูห เฌาพรา ปี กรึบ ดูอี อีซาเรลัะ ต็อห, ‘โอว แฮะ ฮอต ยึร โฆรห ปี ซาคึร แม ลอง อาซาคารีบ อี มูห คูนดีคัม อี อึบ ดูอี อาซูรียา ตี.’

22 เฌาพรา มืร แฮะ กาลาง ลอง คูนดีคัม ตี ต็อห, ‘เฆ ดูอี แคง มืง ฌีโอน, เฆ ปี ฆอน ดีบยา อี แฮะ ตัห โดง กอย แม, ยี ลูกตาย บอ กาณัห แม. เฆ ดูอี แคง มืง เยรูซาแลม, เฆ ปี ฆอน อีบึณ อี ปี วาณาก บอ มาวัด ฆีณ เฆ ดี แม ดอ เตา แม.

23 ดี อาเซ อึณ มูห แปะ แฮะ กาแคณ แม, แปะ แฮะ กาลาง แม จาว อัน? ดี อาเซ อึณ มูห, แปะ แฮะ ดัด แดะ แม, บอ แปะ แฮะ ปีคึก แม ดี อัน? อึณ บอ มูห เฌาพรา อี ซีงา บอด ปี กรึบ ดูอี อีซาเรลัะ, แปะ แฮะ โบง แม ฌึร ตี.

24 แม แฮะ แตห ดาลาม แม กาลาง นา จาว ลอง เฌาพรา. แม แฮะ ต็อห, “โอว แฮะ ดึห กืน ลักเลา โอว, โฮะ แดง นอน เลบานูน ดอน โปละ. โอว แฮะ ฆัร แวน บอ เฮ อารีด อี ดี โต็ง ดี ตาง. บอ เฮ อึณเก อี ดี ชีด อี เลา, โอว โบง แตห เฆ เกห โตต. โอว แฮะ ฮาว ฌัม โดง ลึก กาเซา บอ แคง แปร อี แฮะ หมึอม หลึอม โตต.

25 โอว แฮะ ฆึห ดี เดียง อึม คึม แคง มืง อี เฮา. ดอ ฮาว โอว แคง มืง แอฆึบ ดอน โปละ, โอว แฮะ โบง แตห แบลง อึม กอ ฮีด โตต.”

26 โอว ยี ต็อห, “เหมา อึณ ปาย ปี ตู ดึอม ยึร แม ปี ต็อห โอว?” ซีณ อาต นี โอว แฮะ ฮอต ซูงพยาด. ซีณ ดอ มึอน โอว แฮะ คราม ดี โบง. ดอ ตี นี โอว ยี แตห อึณ แบน ปี ดึอม ต็อห โอว. โอว แฮะ แตห แม ปึอน ดี ปยาต มืง อี มึห แรง, แตห เฆ วี ลึร, แบน อึณปึม มาว.

27 โกบ อึณ ปาย ตี เฆ ดูอี อี กอย แคง มืง ตี อาว ฮู มึห แฮณ. อึณ ดี แบน กาฟัร กาเฟียน บอ น็อห ลึร ดี เฆ, แตห เฆ บอ ชึม ซาเร. เฆ บอ ปี เปต อี ลัต แคง มาน บอ ปี โหงว อี ซี อึณจัม บอ ปี เปต อี ลัต ดี กาตูะ กาง. อึณ หณัม ดัน ตาง, แฮะ ฮอต วี กาฮ็อห.

28 โอว ปี บอ แฮะ แตห แม โบง ปาย ตี, โอว ยี นับ โตต ดอน โมยว ปี ดี ปาย แม. แม บอ ตูต บอ ยีต, แม บอ ลึบ บอ เลห. แม บอ รู บอ จาว ดี โอว, โอว แฮะ นับ โตต.

29 โกบ แฮะ ปีรู แม ดี โอว, โกบ แฮะ นับ โตต โอว ลอง ตู รีมาด แม ดี โอว, โอว ดี บอ โบง ดี แม แตห อึณ ปี โอว บลูห ฆูงมูห แม, ฮับ วัน, ฮับ บอ ก็อะ แคง โมต แม. โอว ดี ตึณ แม วี วีว โดบ อึณเตณ บรีม แม.’”

30 แฮะ ฮอต, อาอีซายัะ ปี วี กาลาง ดี คูนดีคัม อาเฮจัะกี ต็อห, “อึย แม คูนดีคัม อาเฮจัะกี, โอว ดี โบง ลักซานา แตห แม นับ, โฆรห โอว แฮะ หมาน. นัม นี, แม ดี ปึอน ดี โฮม เบล อี เลห ตัห ราง อัน. นา ดี ตัห มืร, แม ดี ปึอน ดี โฮม ปาย ตี. ตัะ นา ดี ตัห, แม โลว ซัม บอ โซะ โหงว ปี ซัม แม. แม โลว โบง มาน มางูน บอ ปึอน ดี โฮม เบล อัน.

31 เฆ ดูอี อายูดา อี แฮะ ลอด ยัม, อี ซี ฆีด, เฆ ดี วี ปี เฮ ปี ซัม อี, นา ครึม อึณ ดี บอ มึห เรียห อี โลง ลึก, นา แดง ดี บอ มึห เบล อัน.

32 โคว, อึณ ดี มึห เฆ อี ซี ฆีด. เฆ ดี กอย แคง มืง เยรูซาแลม. อึณ บอ มึห เฆ อี แฮะ ลอด ยัม. เฆ ดี ตัห ดี นอน ฌีโอน. เฌาพรา อี อึบ โตต ดอน โมยว, อัน แฮะ คราม ดี โบง. อัน ดี บอ โบง แตห อึณ กอ แบน.”

33 โกบ อึณ ปาย ตี เฌาพรา แฮะ ดึอม กาลาง ลอง คูนดีคัม อาซูรียา ตี ต็อห, “อัน ตู ปึอน ดี ลึบ ฮาว แคง มืง นี, ตู ปึอน บัณ ลึบ บลา แคง มืง. ดา ซึก อัน อี โฆ็ง มัง ฆ็อง ตู ปึอน ดี ตัห กาตัด มืง นี. เฆ มืร ตู ปึอน ดี ฆึห กาดาย, โบง บล็อะ อึณแตง ดี แรง มืง นี.

34 อัน ตัห อึณเตณ เหมา, อัน ดี โลว วี เวณ อึณเตณ ตี. อัน ตู ปึอน ลึบ แคง มืง นี. เฌาพรา แฮะ กาลาง ปาย ตี.

35 เฌาพรา บอ ต็อห, ‘โอว ดี แร ดี คยอด มืง นี โกบ ซี แตห โอว อี เฮา โรวเซ โอว บอ โกบ โหลห โอว แดเจณ โอว อี จืร อาดาวีด.’” แคะ ตี เฌาพรา แฮะ จัร อาอีซายัะ กาลาง ดี คูนดีคัม อาเฮจัะกี.

36 บอ ฌัม แคง หมึร ตี, อามู อามาด เฌาพรา บอ ง็อห ยัม ดา ซึก อาซูรียา แคง โดง คยัะ เฆ อาดา อู แซน ดี ดา หมึณ ดี พัน แหรณ วี. บอ ฌัม ซีณวัห ว็อง, ดอ วี อึณซึห มัง อี, เฆ ยึร แฮะ มูห โตต มี ดูอี ยัม. 37 ปาย ตี อาซาคารีบ อี มูห คูนดีคัม ดูอี อาซูรียา ตึอน, อัน บอ วี เวณ กอย ดี มืง นีนีเว.

38 วาย อัน ตี อู ซีแง อัน บอ วี ฮาว แคง โฮว เฌา นีซารอก, ต็อห ดี กรึบ อัน เฌา ตี อี มูห เฌา ปี กรึบ อัน. อึณ ยี มูห ฆอน อีมาย อัน อี จืร อาตารัมมาเลก ฆาย อาซาเรฌา, ฆาย บอ ดึห มาปัวะ ลาง, ง็อห ยัม อัน, บอ วี เตา ฮาว ดี มืง อาราราด. ปัน ตี ฆอน อัน อี จืร อาซาฮาโดน บอ วี แบน คูนดีคัม วี อึบ มืง อาซูรียา.