1 วาย อัน ตี คูนดีคัม อาเฮจัะกี วี มึห เซา. แฮะ รีน ดี ยัม ดี เซา อัน ตี. ดา อี บยาน โฆรห เฌาพรา อี จืร อาอีซายัะ อี มูห ฆอน อาโมด ตึอน, อัน บอ ตัห จัร อาเฮจัะกี บอ กาลาง ดี อัน ต็อห, “เฌาพรา ต็อห, ‘แตห แม แรน, แตห อึณ เฌะฌูง โตต ดอน โมยว โกบ ตู แกน แม. แม ดี ยัม.’”

2 อาเฮจัะกี บอ วี มางัห นา แรง, วี ซาคึร ดี เฌาพรา ต็อห, 3 “อึย แม เฌาพรา, หมาณ แตห แม โหลห ปี โบง โอว. โอว แฮะ คัด น็อห ดี โดบ แม บอ มึห น็อห ซืร น็อห หมาน บอ โบง นา บอด นา หมึอม ปี อึง แม เซเซ.” อัน แฮะ ฮอต ต็อห ปาย ตี, อัน บอ วี ยาม ตาง.

4 ปัน ตี เฌาพรา ปี วี จัร อาอีซายัะ, แตห อัน วี เวณ โดง กอย อาเฮจัะกี, 5 วี กาลาง ดี อัน ต็อห, “เฌาพรา อี มูห เฌาพรา ปี กรึบ ฆูณ ดัง แม อี มูห อาดาวีด ตึอน, อัน ต็อห, ‘โอว แฮะ ยึร โฆรห ปี ซาคึร ปี หมาณ แม. แคะ แฮะ ยาม แม มืร, โอว แฮะ ยึร. โอว ดี วี ซืบ ฮาว อาซาก แม ปอ ฆึร ดี พัน ซีนัม.

6 โอว ดี คยอด แม บอ มืง เยรูซาแลม, แตห เบ ลอด ดี คูนดีคัม อี อึบ มืง อาซูรียา. โอว ดี ฆ็อง ดี แร มืง นี.’”

7 อาอีซายัะ แฮะ ฮอต กาลาง โฆรห เฌาพรา ดี อาเฮจัะกี ตี. อัน ปี วี ต็อห, “ลักซานา ปี ดี ดัว เฌาพรา อี แตห แม นับ ซีคยา ลอง ดี โบง โดบ อัน กาดีก ซัดฌา ตี, อึณ ปาย นี. 8 ดี บล็อะ อึณแตง ปี โบง อูน คูนดีคัม อาคาด ตึอน, เฌาพรา ดี แตห กามึก วี โฮะ นา ปัน ฆึร บล็อะ.’” อาอีซายัะ แฮะ ฮอต กาลาง ปาย ตี ซีแง วี โฮะ นา ปัน แตห อึณ ปี ปี กาลาง อัน.

9 วาย แฮะ วี แกน อาเฮจัะกี ดี เซา อัน ตี, อัน วี แดม โหมว อี อืบ เฌาพรา.

10 อัน ต็อห, “ดอ แฮะ กาแต อาซาก โอว, โอว โลว ฮาว กอย แคง มืง มารานัะ. โอว ทาง, โอว อาว ฮู ลอด ยัม.

11 โอว บอ ทาง, โอว อาว ฮู วี ยึร เฌาพรา ดอ กอย โอว แดง กาดาย โดบ ดูอี อีม นี. โอว บอ ทาง, อาว ฮู ยึร ดูอี คอ อู วี อี กอย แดง กาดาย นี.

12 อาซาก โอว นี แฮะ ฮอต โตต. แฮะ ปี อี แดบ แตห อึณ กาดัด. แฮะ ปี อี ปยาต แวน ทึบ ดา อี เฮียง มาบู. แฮะ ปี อี กับ เลห ด็อะ ดี กาบ็อง. โอว บอ ทาง, เฌาพรา แฮะ ฮอต แตห อาซาก โอว โตต ครัน ครัน, ปี ซีณวัห ฌัม อับ.

13 โอว บอ ยาม ดอง วัน ดอน คืน โกบ แฮะ เซา กาเซา โอว. อึณ บอ ปี มาครังซี แฮะ กาบัก กาอาง โอว. โอว บอ ทาง, เฌาพรา ดี แตห อาซาก โอว โตต ครัน ครัน, ปี ซีณวัห ฌัม อับ.

14 โอว บอ หงูน บอ ปึณ ปี ฮัม มาเลว เฆ มาโนกกอน. โอว บอ โฆรห ปี ฮัม มาโบลย. งาย โอว มืร แฮะ ฮอต อึณ จัม โกบ ซากึห ยอด โอว ฆางหราว. อึย แม เฌาพรา, โอว บึง แม แตห แม ดึห เลห โอว แคง ดูก ตาง ตี.

15 โอว ยี ตู ปึอน ต็อห มาเซ. โคว, เฌาพรา แฮะ ฮอต กาลาง ดี โอว. เฌาพรา แฮะ โบง โดบ ปี คราม อัน ตี. อึณ บอ เซา ดี น็อห โอว, ตู แตห โอว ปึอน ดี อีด.

16 อึย แม เฌาพรา, โฆรห แม แตห ดูอี มึห อาซาก. บอ โอว มึห อาซาก โกบ โฆรห แม. แม มืร แฮะ ซีนัม โอว, แตห โอว แกน, แตห โอว วี อีม.

17 อี ดูก อี เซา ดี น็อห โอว, อึณ แฮะ วี แบน นา บอด นา หมึอม ดี โอว. แม เฌา แฮะ คยอด เลห โอว แคง กาเดา บาเรว. แม แฮะ ฆ็อห แวน บอ หมาบ โอว, แกวะ ฮู แตห แม ซี โหลห.

18 ดูอี ยัม อี กอย แคง มืง มารานัะ, เฆ ตู ปึอน ดาง ฆูง เฆฌู บอ อืบ มยูก แม เฌา. ดูอี ยัม มืร ตู ปึอน ดี บึง แม เฌา บอ โบง นา มูห นา หมาน เซเซ.

19 อึณ มูห มี ดูอี อีม อี ปึอน อืบ มยูก แม เฌา, แตห อึณ ปี โอว อืบ มยูก แม เฌา ดอ ตี นี. แคะ กอย เฆ อี มูห ฆูณ ดอน อี, เฆ บอ กาลาง ดี ฆอน เฆ ลอง แม เฌา มึห น็อห ซืร น็อห หมาน เซเซ.

20 อัน เฌา แฮะ ฮอต แตห โอว ลอด ยัม. เย ดี บอ บัห ดีง, ต็อห โหมว อี อืบ แม เฌา. เย ดี บอ ต็อห โหมว อี อืบ แม เฌา แคง โฮว เฌาพรา บอ โจว เย.” แคะ ตี โหมว แปะ แฮะ ต็อห อาเฮจัะกี.

21 ดอ หณัม แกน อาเฮจัะกี อาอีซายัะ มืร แฮะ ดึอม ต็อห ดี อัน, “แตห แม ดึห เบล ดีปู อี แบน ดีกลวน, วี อึบ กาซืร ดีม ตี, แตห อึณ แกน.”

22 อาเฮจัะกี มืร แฮะ ดีหมอด ต็อห, “อึณ ดี มึห ลักซานา ปาย เหมา, อี แตห โอว นับ ซีคยา ลอง ดี ปึอน โอว ฮาว ลึบ แคง โฮว เฌาพรา?”