1 คูนดีคัม อาเฮจัะกี แฮะ อึบ มืง ยูดา อาดา ฆึร ดี พวน ซีนัม. ดอ อัน ตี คูนดีคัม อาซาคารีบ อี อึบ มืง อาซูรียา, อัน บอ ตัห กาโฆห ดี มืง อี มึห แรง ดอน มืง, อี กอย แคง กาดาย มืง ยูดา ตึอน. อัน บอ ปึอน มืง ตี ดอน มืง. 2 วาย อัน ตี, คูนดีคัม อี อึบ มืง อาซูรียา ตึอน กอย แคง มืง ลาคีด. อัน บอ จัร ดา โบว ตาง อี อึบ ดา ซึก อัน, แตห บอ อัน บอ ดา ซึก อัน กืน ฮาว โดง กอย คูนดีคัม อาเฮจัะกี แคง มืง เยรูซาแลม, จัร อัน แตห อัน คยัะ ดา ซึก อัน. ดา โบว ตาง ตี, แฮะ ตัห ฌัม โดบ อึณเตณ อี ฮาว โดง ลัห เฆ ครึง อี กอย บาง อึม ดึง นา กัว. 3 ดอ อัน ตี อาเอยาคีม อี มูห ฆอน อาฮีลาคี อี อึบ แคง โฮว คูนดีคัม บอ ดา จาเร ตาง อี จืร อาเซบานา บอ ดา อี จอย ดา จาเร ตาง อี จืร อาโยวอา อี มูห ฆอน อาซาบ, เฆ โอย วี ตี บอ เลห ฮาว โดง กอย รันซู เฆ ตึอน.

4 ดา โบว ตาง อี อึบ ดา ซึก อาซูรียา ตึอน บอ กาลาง ดี เฆ ต็อห, “แตห เบ วี เวณ กาลาง ดี คูนดีคัม อาเฮจัะกี ลอง คูนดีคัม ตาง อี อึบ มืง อาซูรียา แฮะ ดีหมอด ต็อห, ‘แม บึง อาเซ, แตห แม ยัะ กาโฆห ดี โอว? 5 แม ทาง เซ แม กาลาง มี โฆรห, อึณ ดี แตห แม มึห อางยาน บอ มึห ปวน ดี กาโฆห ออง? แม แฮะ ยัะ วี กาบัห ดี โอว. ดอ ตี นี, อาว ฮู มึห อาเซ อี ปึอน จอย แม. 6 ยอด, เซ แม บึง คูนดีคัม มืง แอฆึบ, อัน ปี อี ดึห แมออ แบน อึณกรวน. แมออ ตี นับ ดี ดูห แด ดูอี อี บึง อัน แตห อึณ กาหลูห. คูนดีคัม มืง แอฆึบ ดี โบง ปาย ตี ดี ดอน อี อี บึง อัน.’ 7 เซ แม ปี วี ต็อห ดี โอว, ‘โอว บึง เฌาพรา อี มูห เฌาพรา ปี กรึบ เย.’ อึณ ตู มึห ดีโคว. แม แฮะ ดึอม ปยาต แวน โดง กรึบ เฆ เฌาพรา ตี, บอ กาโช็ง หลู อี กอย โดง จา แบน โปละ แบน โปละ. แฮะ ฮอต, แม มืร แฮะ ต็อห ดี ดูอี อายูดา บอ ดูอี มืง เยรูซาแลม, แตห เฆ กรึบ มี โดง ปี บยัะ แม ดี เฆ.

8 ดอ ตี นี, แตห บอ แม บอ คูนดีคัม อาซูรียา อี มูห ดา กาณา โอว ลาย ฌาบ. โอว ดี ดัว มังปร็อง อา แหรณ โดว ดี แม, เซ แม มึห ดา ซึก อี ปึอน ป็อะ เฆ. 9 เซ แม ต็อห ดี บึง เฆ ดูอี อาโมยว แอฆึบ, แตห เฆ ดัว ดี แม ดา ซึก อี ป็อะ ลักเลา บอ ดา ซึก อี ป็อะ มังปร็อง ตัห จอย แม. เหมา แม ทาง แม ปึอน กาแคณ ดี ดา ซึก ดูอี อาซูรียา อี คย็อะ หลึอม อี เฮา? 10 อาว วัน มี แคะ ตี. เฌาพรา ตู แคร โอว ตัห กาโฆห ตัห ปยาต มืง แม นี. เฌาพรา ตี อี แฮะ จัร โอว แรน ดา ซึก โอว ตัห กาโฆห ตัห ปยาต มืง แม นี, แตห อึณ ลึร.”

11 ดา โบว ตาง ตึอน แฮะ ฮอต กาลาง โฆรห ตี, อาเอยาคีม อาเซบานา บอ อาโยวอา, เฆ วี กาลาง ดี อัน ต็อห, “แตห แม กาลาง โฆรห อารามี ดี เย. เย นับ โฆรห ฌึร ตี. อาว โลว กาลาง โฆรห แฮแบร. ดูอี อี กอย แดง แรง มืง บอกาเฆลียด แฮะ บัร ดี โทม.” 12 ดา โบว ตาง ตี วี ต็อห ดี เฆ, “เบ ทาง คูนดีคัม จัร โอว ตัห กาลาง โฆรห มี ดี คูนดีคัม บอ ดี เบ? อาว มูห ปาย ตี. โอว โลว กาลาง แตห บอ เฆ อี กอย แดง แรง มืง โทม. อึณ มูห เฆ อี ดี วี โฮม เอียง เฆ, วี เดียง อึม ชี เฆ โดบ เบ.”

13 ปาย ตี อัน บอ วี ยีต จ็อง, กาลาง โฆรห ตาง แคง โฆรห แฮแบร ดี เฆ ต็อห, “แตห เบ โทม อามีง ปี กาลาง ตัห คูนดีคัม อาซูรียา. 14 อัน แฮะ ดัม ตัห ต็อห, แกวะ แตห อาเฮจัะกี กาโลว เบ. 15 โคว, อาเฮจัะกี ตี, อัน ตู ปึอน จอย ตู ปึอน คยอด เบ. แกวะ แตห อาเฮจัะกี แยต เบ บึง เฌาพรา. เบ แกวะ โทม เซ อัน ต็อห, เฌาพรา ดี คยอด เบ. เฌาพรา ตู ปึอน ฆ็อง แร เบ ดี เย ดา ซึก ดูอี อาซูรียา.

16 แกวะ โทม โฆรห อาเฮจัะกี ตี. คูนดีคัม อี อึบ มืง อาซูรียา แฮะ เบลห อามีง ต็อห, เซ เบ บอ เลห ฮาว ตัะ มืง เบ บอ คัม ดี ชึม, เบ ดี วี ปึอน ดี โฮม เบล มางูน ดี เฮ มางูน เบ, บอ เบล ดีปู ดี เฮ เบล ดีปู เบ. เบ ดี วี ปึอน ดี เดียง บอ อึม แคง อึม คึม เบ ราง อาเซ ราง อัน. 17 เบ ดี ปึอน กอย ปาย ตี แตห อึณ กอ ฌัม ปัน ดี ดึห ฮาว คูนดีคัม ดี เบ, แตห เบ กอย แคง มืง อี ปี มืง โดง กอย เบ นี. อึณ มูห มืง อี มึห โหงว บอ อึม มางูน, มืง อี มึห ปี ดี โฮม บอ มาน มางูน.

18 แกวะ แตห อาเฮจัะกี ปึอน ดี กาโลว เบ เซ อัน ต็อห, ‘เฌาพรา ดี คยอด เอ.’ อึณ มืร ตู ดึอม มึห เฌาพรา ปี กรึบ ดูอี โมยว เหมา อี แฮะ ดึอม จอย ดึอม คยอด ดูอี อี บึง อัน, แตห เฆ ลอด ดี คูนดีคัม อาซูรียา. 19 เฆ เฌา ปี กรึบ เฆ ดูอี อี กอย แคง มืง ฮามาด บอ แคง มืง อาราพาด, เฆ กอย ดี เหมา? เฆ เฌา ปี กรึบ เฆ ดูอี แคง มืง เซพาอีม บอ กอย ดี เหมา? เฌา เฆ ตี, กาดัง เหมา อี แฮะ คยอด ดูอี แคง มืง ซามารี แตห เฆ ลอด ดี โอว? 20 เฌา ปี กรึบ เฆ ตี บอ ดอน มืง, กาดัง เหมา อี แฮะ ดึอม คยอด ดูอี ปี อึบ อัน, แตห เฆ ลอด ดี คูนดีคัม อี อึบ เย? เหมา อึณ ปาย ปี ทาง เบ, เฌาพรา เบ ดี ปึอน คยอด เบ แคง มืง เยรูซาแลม นี?” แคะ ตี โฆรห ปี กาลาง ดา โบว ตึอน.

21 มาแล, เฆ ดา ตาง ตู เวียะ โฆรห ตี. เฆ แฮะ โทม โฆรห ปี กาลาง อูน คูนดีคัม อาเฮจัะกี ดี เฆ คา อาต. อัน แฮะ ต็อห, “เบ แกวะ โฆรห.”

22 ปัน ตี อาเอยาคีม อี มูห ฆอน อาฮีลาคี อี อึบ แคง โฮว คูนดีคัม บอ อาเซบานา อี มูห ดา จาเร ตาง ตึอน, บอ อาโยวอา อี มูห ฆอน อาซาบ ตึอน, เฆ บอ กายาต ครึง ปี ตา เฆ, วี ตัห โดง กอย คูนดีคัม อาเฮจัะกี, วี กาลาง โฆรห ปี กาลาง ดา โบว ตาง ตึอน ดี อัน.