1 อึย เบ อี แฮะ โบง แตห อี เฮา ชึม ยี ตู คัม อี เฮา โบง เวียะ ดี เบ, เบ ดี ฌัม ดูก ตาง. เบ แฮะ ปีหล็อก ดี อี. เบ ยี ตู คัม อี เฮา ปีหล็อก ดี เบ. มาแล, วาย แฮะ ฮอต เบ โบง แตห อี เฮา ชึม, บอ เบ ดี วี ชึม. วาย แฮะ ฮอต ปีหล็อก เบ ดี อี เฮา, เบ ปี วี โลว คัม อี เฮา ปีหล็อก ดี เบ.

2 อึย แม เฌาพรา, แตห แม กาเว เย. เย หน็อะ อึณด็อะ แม. แตห แม เฌา ฆ็อง แร เย ดอน ซีแง ซีณ ซีณวัห. เย หมาณ, แตห แม เฌา คยอด เย ดอ มึห เย อาเพ อาเร.

3 เฆ ดูอี กืน ดี บอ กาโพรม ดี เตา โกบ แฮะ ยึร เฆ ซีนัน ซีนืง. เฆ ดูอี แบน โมยว แบน โมยว ดี บอ กาโชต เตา ดอ ตัห แม เฌา บอ บยัะ ปวน แม.

4 ดูอี อี พาด ดึห โกรวกราม อี เฮา, เฆ ปี วัะลัว อี ดึห กาฌูะ กืน ปี ดี โฮม อัน. เฆ บอ พาด โกรว อี เฮา, ปี พึง มาอาโฌ็ง ตัห โฮม โตต.

5 แตห เอ อืบ มยูก เฌาพรา. โคว, เฌาพรา แฮะ อึบ โตต ดอน โมยว. อัน เฌา ดี แตห ดูอี แคง มืง เยรูซาแลม นับ ดี ซูงพยาด โดบ ดารา, บอ ซูงพยาด ซืร ซืร หมาน หมาน.

6 อัน เฌา มูห โดง บึง เย เซเซ. อัน เฌา ดี ฆ็อง แร เฆ ดูอี ปี อึบ อัน บอ ดัว อางยาน ดี เฆ, บอ แตห เฆ นับ แบน โมยว แบน โมยว. อาเซ โรวเซ บอ โยว เฌาพรา แฮะ ปี อัน มึห คาฆูน บอด.

7 แตห เบ ยอด, เฆ ดูอี กยัะ กอย ดีฆลัะ บอ ดัด แดะ แตห อึณ มึห อี จอย เฆ. เฆ ดาลาม อี ตัห กาลาง โฆรห ซี ลาย กาล็อะ, เฆ บอ ยาม ตาง, ดัด ตาง กาเซา.

8 โดบ อึณเตณ ตาง, อึณ ดี บอ ง็อง, อาว ฮู มึห ดูอี อี ฮาว ฮาว ตัห ตัห. แปะ กาดีก ซัดฌา ปี ลาย กาแซณ อี, เฆ แฮะ ฮอต โบง กาปยาต, แฮะ ฮอต ลึร. โฆรห ปี กาลาง ซักเซ, อาว มึห อี หณึม. ดูอี มืร, อาว ฮู ลาย รีมาด.

9 มาน มืง บอ ปี ดูอี แฮะ แบน น็อห ลึร น็อห เตียะ. แปร ดี นอน เลบานูน ดี บอ เฮียะ กาฮ็อห, ปี ดูอี อี แฮะ หมึอม ซาย. ดีลัยะ อี จืร ซาโรน อี ดึอม มูห กาดาย บอด กาดาย หมึอม, อึณ ดี วี แบน ปี แปร กาฮ็อห. หลา เฮ ดี นอน บาซัน บอ ดี นอน ฆาเมลัะ ดี บอ ซาฆลูห โจห.

10 เฌาพรา วี ต็อห, “ดอ ตี นี, โอว ดี ยีต. โอว ดี บยัะ แคะ ตาง อาพูง ดังโคว โอว, แคะ กาอาบ อี อืบ โอว.

11 เบ แฮะ คราม ดี โบง อี ตู มึห ดีโคว. อึณ ปี คาม เฆ เหรียง ปี โดะ อี แคง เงา. บอ พึอม ปี ฮึห เบ, แฮะ ปี เงา อี วี โดะ กาซึม เบ.

12 แคะ กอย ดูอี ดอน โมยว, เฆ ปี มาว ทูน แปะ แฮะ โดะ อี. เฆ ดี บอ ปี บอ เดา มาอาต ปี โดะ แวน อี แคง เงา.”

13 เบ ดูอี อี กอย โต็ง, แตห เบ โทม ลอง แปะ แฮะ โบง โอว. เบ ดูอี อี กอย กาตัด, แตห เบ กาลาง แคะ ตาง อาพูง ดังโคว โอว.

14 เฆ ดูอี แคง มืง ฌีโอน อี มึห หมาบ, เฆ มึห น็อห โยว. บอ เฆ อี ตู หณึม เฌาพรา, เฆ ดี บอ โยว กอ ดีเยณ. เฆ ดี บอ ต็อห, “อาว มึห อาเซ อี ปึอน กอย แคง เงา อี กูห เซเซ. อาว มึห อาเซ อี ปึอน กอย โคบ เงา อี กูห เซเซ.”

15 เซ เบ ยี กาลาง ซืร ซืร หมาน หมาน, เซ เบ ตู ดึห ปวน เบ วี โปห ดี โฮม ดูอี พลาน, ตู ดึห ดี โฮม ลักซอง ปี ปรา อี เฮา ดี ดัว, เซ เบ มืร ตู เหรต ดี โดบ ดูอี มืก อี เหรต ดี ง็อห อาซาก อี เฮา, บอ ตู ยอด อี ฮาย อี มืก,

16 เซ เบ โบง ปาย ตี เบ ดี วี ปึอน ดี กอย ซีคยา กอย หนีม หนีม. เบ ดี วี ปึอน ดี กอย ดาคึย กอย ฆยามซา ปี เบ แฮะ ปึอน ดี กอย โดง อี แฮะ มัน ซีคยา. เบ ดี วี มึห บอ ปี ดี โฮม ปี ดี เดียง.

17 เบ ดี วี ปึอน ดี ยึร คูนดีคัม อี มึห อาพูง ซาเร, อี ชีด กาเซา. เบ ดี บอ ยึร อัน อึบ มืง อี ตาง อี กาว็อห.

18 เบ ดี บอ วี โหลห บอ เฌณฌา ลอง แปะ แฮะ ดึอม โยว กาเซา เบ. เบ ดี บอ วี ต็อห, “เฆ ดูอี อี ตีห ฌาราง บอ เฆ ดูอี อี ซัะ รึอน จึง, เฆ กอย ดี เหมา? เฆ อี แลบ ดี ยอด โดง กอย โฮว จา แคง มืง อี มูห โดง อาเร ตาง, เฆ แฮะ วี ฮาว กอย ดี เหมา?”

19 โอว ยี ต็อห ดี เบ, เบ อาว ฮู โลว ยึร ดูอี ฮาย บอ ดูอี อี กาลาง โฆรห ปี ตู นับ เบ.

20 แตห เบ ยอด, มืง ฌีโอน ดี บอ แบน มืง โดง ดี โบง เบ บลอย แปะ แฮะ จัร เฌาพรา เบ โบง. มืง เยรูซาแลม ดี บอ แบน มืง อี แฮะ เยน ดาคึย, มืง อี หมึอม กอย. อึณ มูห มืง อี ปี ทึบ อี ตู โลว กาโทะ ดอ เหมา. หล็อก อัน มืร, อาว โลว รึต ดอ เหมา. วัน ปัก อัน มืร, อาว กาดัด ดอ เหมา.

21 แคง มืง ตี, เฌาพรา อี มึห ปวน ตาง บอ อาพูง ดังโคว ตาง, อัน ปี อึม แบลง ตาง อี แหล โดง กอย เอ. แคง อึม ตี รึร ปี ป็อะ ดา ซึก บอ รึร ซังโพว อี ตาง กาเซา ยี ตู ปึอน กาโลห ฮาว.

22 โคว, เฌาพรา มูห ดา ตาง อี ซูงพยาด ดารา ดี เอ. อัน มูห ดา กาณา อี อึบ เอ, มูห บอ คูนดีคัม เอ. อัน ดี คยอด เอ.

23 เบ ดูอี แบน โมยว แบน โมยว, อึณ ปี วัน ปี ปัก เบ ดี รึร เบ อาว ฮู รีด. บอ ร็อง แคง รึร เบ, อาว ฮู มัน. อึณ ตู แตห บีก อัน อึณ บลัห ซีคยา, อึณ แตห เบ ชึม. รันซู เบ ดี พาด ดึห โกรวกราม เบ บอ กาซาง กาแต เฆ. ดูอี เปลา แฆะ มืร ดี บอ ปึอน ดี ดึห.

24 เฆ อี กอย แคง มืง เยรูซาแลม อาว ฮู มึห ดูอี อี ต็อห, “โอว แฮะ เซา.” เฌาพรา ดี บอ ฆ็อห แวน โตต หมาบ เฆ ดูอี บอกาเฆลียด อี กอย แคง มืง ตี.