1 อึย เบ ดูอี แบน โมยว แบน โมยว, แตห เบ วี ตัห, แตห เบ บอกาเฆลียด ตัห โทม. แตห ดูอี บอ กาดาย บอ ดอน โมยว อี กอย แดง กาดาย บอ ปึอน ดี ยึร.

2 โคว, เฌาพรา แฮะ รู ดี เฆ ดูอี แบน โมยว แบน โมยว. อัน บอ จาว ดี ดา ซึก เฆ. อัน เฌา แฮะ ฮอต ซูงพยาด ดี แตห เฆ ชึม, แตห อี เฮา ง็อห ยัม เฆ.

3 โดว ยัม เฆ มืร, เฆ ตู เบลห แวน แตห อึณ อูห อัม ดอน โปละ. หนาม เฆ ดี บอ แหล แดง นอน ปี อึม.

4 ซีมัณ อี กอย แคง ฆางหราว ดี บอ อัม ลาต ปี เบล อี แฮะ ซีน ลูด. เบลณ มืร ดี หราย ปี อี ซีลอย อูน แปะ. บอ ซีมัณ ดี บอ โจห ปี หลา เฮ มางูน บอ หลา เฮ ดีปู.

5 โอว เฌาพรา มืร แฮะ แตห ซีมัณ แคง ฆางหราว หราย. อึณ ปี ดา ซึก แฮะ แดบ ยัม แคะ ปึอน อัน ดี แดบ. แฮะ ฮอต, อัน ดี วี โบง ฮาว ดี ดูอี แคง มืง เอโดม ปาย ตี แตห เฆ ดัม หมาบ ดี เฆ. โอว แฮะ ฮอต ซูงพยาด ดี แวน เฆ.

6 ดี มาปัวะ ลาง เฌาพรา ตี, หนาม แฮะ โนะ. อึณ มูห หนาม ฆอน มาบู บอ หนาม ฆอน มาแป. อึณ มูห บอ เบรียง อี ดึก ดี เบล ลัม โดว อาโล็ง แปะ แฮะ หลู เฆ. โคว, เฌาพรา ดี โบง บลอย หลู ตาง แคง มืง โบวฌารา. อัน ดี บอ ง็อห ยัม ดูอี แคง มืง เอโดม, ปี ง็อห เฆ โดว ซัด ดอ โบง เฆ บลอย หลู.

7 บอ ดูอี อี มึห ปวน ตาง ปี มัก แปร, เฆ ดี เกห ยัม โดบ อี เฮา. บอ ดา บาหนึม อี ปี มัก อาโล็ง บอ เฆ อี มึห โปลม มึห แฮณ ปี มัก ดีโซว, เฆ บอกาเฆลียด ดี ยัม. อึณ ดี ปี มืง บอ มืง มึห มี หนาม ดีโลย. กาดาย บอ กาดาย มึห มี เบรียง โดว เฆ ตี.

8 ลอง อัน ตี เฌาพรา ดี โบง เวียะ แปะ แฮะ โบง อี เฮา ดี ดูอี อีซาเรลัะ. อัน แฮะ ฮอต อูน อาคราว ปัน ดี วี คยอด อัน ดูอี แคง มืง ฌีโอน.

9 ปัน อัน ตี, อึม แบลง มืง เอโดม ดี บอ แบน ปี เบรียง อึณเก อี แฮะ โดะ ดี เงา. กาปูห แคง มืง ตี, อึณ ดี บอ แบน ฆันดืก. แคง มืง ตี บอ มืง, อึณ ดี บอ ปี เบรียง อึณเก อี กาซึม แคง เงา.

10 เงา ตี ดี บอ กูห ดอง คืน ดอง วัน. ดัก เงา ตี มืร บอ เลห เซเซ. มืง ตี ดี บอ ราม เซเซ ดอน โจว ดอน บาน ฮาว นา อาต. อาว มึห อาเซ อี ดี ตัห ลึบ ตัห ว็อะ คอ อู เฌณ.

11 มืง ตี, อึณ ดี วี มึห มี มาดีโบะ บอ มังฆึห อี กอย กอ โนะ นา แคง. อึณ ดี บอ มึห มาตีตูด บอ มากาอัะ. เฌาพรา ดี วี โบง แตห อึณ กาฟัร กาเฟียน, แตห อึณ ปี ดอ ง็อง อาต พาน เบลห อัน กาดาย นี. อึณ ปี เฌาพรา แฮะ ดึห ตัห เซณ แมมี ปี ตา อี ซัม กาง, ยี เฆา แคะ กืน อี กาฟัร กาเฟียน ตี. อึณ บอ ปี อัน เฌา แฮะ ดึห เบล อาพัม, แกวะ แตห อึณ มึห โดง กาซืร บอ โดง ซีคยา คอ อู โปละ.

12 ดอ อัน ตี อึณ มืร ตู มึห คูนดีคัม อี ดี อึบ มืง ตี. เฆ อามู อามาด มืร, อาว มึห คอ อู วี.

13 แคง แวง โฮว คูนดีคัม, อึณ ดี วี เลห เดา มาอาต เฆ ยวน มาอาต. แรง มืง มืร, แปร เฆ เปต แฮะ ฮอต วี โปะ โตต. อึณ ดี วี แบน โดง กอย มาตีตูด เฆ มาโซว แปร.

14 เฆ มาโดว แปร อี ฮาย ดี บอ ฮาว วีว ฮาว เวณ โดง ตี. เฆ มาโซว แปร ดี บอ กอย โปรห ดี ตี. เฆ มาโดว แปร ดี บอ กอย รึม โดบ มาโประ โดง ตี. บอ มาแป แปร ดี บอ แดะ ฆึก อัน, บอ เฆ โดว อี แล แคง หมึร ดี ตัห ดีเหลา ดี ตี.

15 เฆ มาตีตูด ดี บอ โบง กาฮูน เฆ ดี ตี. เฆ ดี วี ปึอน, วี กานัม ปึอน เฆ ตี, แตห อึณ กอ กัห. เฆ ดี บอ วี ลึมลา ฆอน เฆ ตี แตห เฆ กอ ตาง. เฆ มาฆลาง อาโม็ง ดี บอ ตัห กอย กาฌูะ ดี ตี แบน ฆู แบน ฆู.

16 แตห เบ เหรต ดี ตีห แคง บับ เฌาพรา ลอง อัน ตี, แฮะ ฮอต แดม อูน ลอง โดว เฆ ตี ดอน โดว. อาว มึห ปี ปีว ดี แดม คอ อู โดว. โดว อี ตู มึห ฆู มืร, อึณ ตู มึห คอ อู โดว. เฌาพรา แฮะ กาลาง อูน แตห อึณ แบน ปาย ตี. น็อห พึอม อัน แฮะ จัร แตห เฆ ตัห กาฌูะ ดี ตี.

17 เฌาพรา ยี ดี กาย็อห กาซาง กาดาย ตี ดี เฆ ดูอี อาโมยว อัน, แตห อึณ แบน คาฆูน เฆ โมยว เหมา โมยว อัน. เฆ ดี บอ กอย แคง มืง เฆ ตี เซเซ. อึณ ดี บอ แบน กาดาย โดง บึง โดง กอย เฆ ดอน โจว ดอน บาน.