1 เฆ อี ฮาว หมาณ แตห ดูอี แอฆึบ จอย เฆ บอ เฆ อี บึง แฮณ มังปร็อง, เฆ ดี ฌัม ดูก ตาง. บอ เฆ อี วี น็อห ตาง ดี ดา ซึก แคง มืง แอฆึบ อี แฮะ กืน, อี มึห โปลม มึห แฮณ, อี แฮะ มึห บอ ลักเลา บอ อึณปร็อง, เฆ ดี ฌัม ดูก ตาง. เฆ อาว ฮู วี หน็อะ อึณด็อะ เฌาพรา อี ซีงา บอด. เฆ มืร ตู วี ดีหมอด อากยาม อางยาน อัน.

2 อัน เฌา แฮะ มึห อางยาน. อัน นับ ดี โบง แตห ดูอี ลึร ชึม. อัน เฌา มืร ตู กาวีว โฆรห แปะ แฮะ ดึอม กาลาง อัน. อัน ดี ดัม หมาบ ดี เฆ ดูอี อี ตู หมึอม บอ ดี ดูอี อี จอย เฆ.

3 เฆ ดูอี แอฆึบ ตี, เฆ บอ มูห แคะ ดูอี. เฆ ตู มูห เฌาพรา. อึณปร็อง เฆ มืร, มูห แคะ ยัง, อาว มูห น็อห พึอม. เซ เฌาพรา โซ็ง แด อัน, เฆ ดูอี ปี น็อห ตาง เบ, เฆ ดี ลึร ชึม. บอ เฆ ดูอี อี โลว อี จอย เฆ, เฆ ดี ลึร ชึม. เฆ บอ อา โมยว ดี ลึร ชึม ดี รึม อู เฌณ.

4 โคว, เฌาพรา แฮะ ต็อห, “เซ มาครังซี หนึม แฮะ ก็อะ ยัม มาบู, อัน ดี บอ กาอืน, บัร โดว ตี. เซ อึณ มึห พึง เฆ ดา อี เฮียง มาบู, เฆ ปี บอ ดัด เรียง แคะ เหมา มืร, มาครังซี ตี ยี ตู ดืน ตู เตา. ปาย ตี อาว มึห อาเซ อี ปึอน แคร เฌาพรา อี อึบ โตต ดอน โมยว ดอ ตัห กาโฆห อัน ดี รันซู อัน แดง นอน ฌีโอน.

5 อึณ บอ ปี มาซีม อี บึณ วีว บึณ เวณ แดง กาฮูน อัน, บัร ดี ฆ็อง แร ฆอน อัน. ปาย ตี เฌาพรา อี อึบ โตต ดอน โมยว มืร ดี ฆ็อง แร เฆ ดูอี แคง มืง เยรูซาแลม. อัน ดี บอ ฆ็อง แร เฆ บอ ทูด เลห เฆ บอ คยอด เฆ.”

6 “อึย เบ ดูอี อีซาเรลัะ, เบ แฮะ โบง หมาบ โบง อี ตู หมึอม บอ แฮะ กาบัห ดี อัน เฌา. มาแล, ดอ ตี นี, แตห เบ วี ตัห กาดึก กาด็อะ ดี อัน. 7 โคว, ซีแง อัน ตี, แคะ กอย เบ บอกาเฆลียด, เบ ดี บอ กาโพรม ดี แวน อารึบ ราง แปะ แฮะ หลึบ เบ ครีว เฆ รึอน ตึอน, แปะ แฮะ โบง เบ, แตห อึณ แบน หมาบ ดี เบ.

8 มืง อาซูรียา ดี บอ ลึร ชึม ดี มาปัวะ ลาง. มาแล, อึณ ยี ตู มูห มาปัวะ ลาง ปี ตา ดูอี. เฆ ดูอี อาซูรียา ดี บอ เตา ดา ซึก. ดูอี หนึม เฆ ดี บอ แบน หมาย อี เฮา.

9 คูนดีคัม ปี บึง เฆ มืร ดี บอ โยว กาเซา บอ เตา. เฆ อามู อามาด อัน ดี บอ กาจัว บอ เบลห แวน อาลาม ปี โฆ็ง เฆ.” เฌาพรา ปี กรึบ ดูอี แดง นอน ฌีโอน, อี แฮะ แตห เงา กาซึม ปี หลู เฆ แคง มืง เยรูซาแลม, อัน แฮะ กาลาง อูน ปาย ตี.