1 เฌาพรา ปี วี ต็อห, “เฆ ฆอน โอว อี โบง กาบัห ดี โอว, เฆ ดี ฌัม ดูก. เฆ บอ โบง โดบ ปี คราม เฆ. อึณ ยี ตู มูห ปี คราม โอว. เฆ บอ โบง ปี ลาย กาแซณ ดี อี, ยี ตู โดบ ปี อึง โอว. ปาย ตี เฆ โบง แตห หมาบ เฆ แว กืน.

2 เฆ ตู หมาณ อากยาม อางยาน ดี โอว. เฆ ยี วี ฮาว ดี มืง แอฆึบ, วี ฮาว บึง คูนดีคัม พาโรว แคง มืง แอฆึบ, แตห อัน วี จอย ฆ็อง แร เฆ, แตห อึณ ปี เฆ กอย ครึม ยาบ เฮ.

3 มาแล, คูนดีคัม มืง แอฆึบ ตี อัน ยี ตู มึห ปวน เฆ แฮณ ดี จอย เบ. ปี ดี จอย คูนดีคัม มืง แอฆึบ ดี เบ อึณ ดี วี แบน อี หมึอม ซาย ดี เบ. ปี เหรต เบ ดี บึง แคง มืง แอฆึบ, อึณ ดี วี แตห เบ ชึม ซาเร.

4 ดา ตาง เฆ ปี บอ ฌัม แคง มืง แอฆึบ ดี มืง จอนา บอ อามู อามาด เฆ ปี บอ ฌัม ดี มืง ฮานีด มืร,

5 เฆ ยี วี หมึอม ซาย โกบ แฮะ บึง เฆ ดูอี อี ตู มึห ดีโคว, ดูอี อี ตู ปึอน จอย, อี ตู ปึอน เฆฌู เฆ ดอ ดี โลว เฆ. อึณ แตห มี เฆ ชึม ซาเร.”

6 เฌาพรา วี กาลาง ลอง โดว ซัดดาวา ปี ดาง เฆ โกรว อี กอย ดี มืง นา เตต. เฆ อามู อามาด ตึอน แฮะ ฮาว โดบ อึณเตณ อี กาโลห โดง มึห ดูก บอ อาเพ อาเร, มึห มาครังซี โดว อาโล็ง บอ โดว มา, มึห บอ มาฮัณ เฆรา บอ มาฮัณ อี ครัน อี ฮาย กาเซา. เฆ บอ ดึห โกรวกราม เฆ อี มึห ดีง็อห ดีคัน, วี ดาง แดง กาตูะ มาลา, ดาง บอ แดง กาตูะ มังปร็อง กาฮาต, แตห เฆ ฮาว ดัว ดี เฆ ดูอี อี ตู ปึอน จอย ตู ปึอน เฆฌู เฆ.

7 เฆ ดูอี แคง มืง แอฆึบ ตี เฆ ยี ตู ปึอน จอย มาเซ. โคว, โอว แฮะ ต็อห, แตห เฆ จืร ‘ราฮาบ กอย ซีต็อง ตู รัร.^a

8 เฌาพรา ปี วี จัร โอว ต็อห, “แตห แม แดม อูน แคง บับ ลอง ดูอี เฆ ตี, ลอง เฆ ดี ปาย เหมา, แตห เฆ อี ดี ฆึอด นา อาต ฮาว มึห ดี โนว เซเซ ลอง แคะ แฮะ โบง เฆ อี ตู หมึอม.

9 โคว, เฆ บอ โบง อี กาบัห ดี เฌาพรา เซเซ. เฆ ปี ฆอน โอว อี กาลาง โฆรห กาโลว เซเซ. เฆ มืร ตู ซี โทม ดารา โอว ดอ เหมา.

10 เฆ บอ กาลาง ดี เฆ ดูอี อี ยึร อาโรง ปี บยัะ เฌาพรา ต็อห, ‘แกวะ ยอด.’ เฆ บอ กาลาง ดี ดา อี บยาน โฆรห เฌาพรา ต็อห, ‘เบ แกวะ กาลาง โฆรห ซืร โฆรห หมาน ดี เย. แตห เบ กาลาง โฆรห ปี อึง เย, ปี ซี โทม เย. แตห เบ ดึห โฆรห อี ตู มูห อี ตู หมาน, วี กาลาง ดี เย.

11 แตห เบ วัห อึณเตณ. เย มืร ตู ซี โทม ลอง เฌาพรา อี มูห เฌาพรา อี ซีงา บอด, เฌาพรา ปี กรึบ เฆ ดูอี อีซาเรลัะ ตี.’”

12 โกบ อึณ ปาย ตี เฌาพรา อี ซีงา บอด, อี มูห เฌาพรา ปี กรึบ เฆ ดูอี อีซาเรลัะ, อัน วี ต็อห, “เบ แฮะ แวน โฆรห เฌาพรา, บอ วี โดบ ดูอี อี คาหนาบ อี เฮา, โดบ บอ ดูอี อี มึห น็อห โฆะ แฆะ.

13 โกบ โบง เบ ปาย ตี เบ มึห หมาบ. อึณ ปี แรง อี จา อี แฮะ วี มึห ปัน ดัห, ปัน มาตูห อี แฮะ รีน ดี เกห. อึณ ดี บอ มาตูห ดีฆล็อห โจห โตต อู เฌณ.

14 อึณ ดี บอ กาลาต ปี กาโละ กาดาย ปี ซัต แวน ดูอี. แตห อึณ กามูน กาลาต, แกวะ แตห อึณ ซี ปึอน วี ดึห โดณ อัน, วี แบน มัง โซก อึณกึร เงา, บอ ก็อก ปลัก อึม แคง อึณปาน อึม.”

15 เฌาพรา อี อึบ โตต ดอน โมยว, อี มูห เฌาพรา อี ซีงา บอด, เฌาพรา ปี กรึบ เฆ ดูอี อีซาเรลัะ, อัน วี กาลาง ต็อห, “เซ เบ ดี วี ตัห บึง โอว บอ กอย หนีม หนีม, โอว ดี คยอด เบ. เซ เบ ปีหนีม น็อห เบ บอ หณึม โอว, เบ ดี วี มึห โปลม มึห แฮณ.” มาแล, เบ ยี แฮะ แวน โฆรห ตี, ตู โบง โดบ.

16 เบ แฮะ ต็อห ดี ป็อะ มังปร็อง เบ, เลห ฮาว ครัน ครัน, แตห เบ ลอด ดี รันซู เบ. โกบ อึณ ปาย ตี เบ ดี บอ เลห เตา ครัน ครัน. เบ มืร แฮะ ต็อห, “เย ดี ป็อะ โดว อี ครัน อี แฮ.” ปาย ตี บอ เฆ อี คูงครัห เบ, เฆ มืร ดี ครัน ดี แฮ.

17 รันซู เบ อู วี ดี บอ กาชัวะ, แตห เบ อู แหรณ วี เตา. รันซู เบ พัน วี, เฆ ดี บอ กาโบยว เบ บอกาเฆลียด เตา ฮาว. แฮะ ฮอต, เฆ อี ซี ฆีด, เฆ ปี อาลาม ปี ซัม เฆ แดง นอน.

18 มาแล, เฌาพรา ยี ซี หน็อะ ดี เฆฌู เบ. น็อห ร็อก อัน แตห อัน กาเว เบ. โคว, อัน โบง นา มูห นา หมาน เซเซ. เฆ อี บึง เฌาพรา, เฆ ดี โบยว ดาคึย.

19 อึย เบ อี กอย แดง นอน ฌีโอน แคง มืง เยรูซาแลม, เบ อาว ฮู กาดูห ดี กลึร, อาว ฮู โลว ยาม. เฌาพรา อี นับ ดี ร็อก กาเว เบ. ดอ ซาคึร แดะ เบ ดี อัน, อัน ดี โทม โฆรห เบ อู เฌณ. 20 เฌาพรา ปี บอ แตห อึณ หณาบ ดี น็อห เบ, แตห อึณ ปี ปี ดี โฮม เบ, บอ ดัว ดูก ดี เบ อี ปี ปี ดี เดียง เบ มืร, อัน ยี ดี จอย เบ. ดา ซารา อี ดี มาโนว เบ, อาว ฮู โลว เครียง ดี เบ. เฆ ดี วี กอย โดบ เบ, แตห เบ ปึอน ดี วี ยึร เฆ. 21 เบ ดี บอ ยึร โฆรห อี ต็อห ดี ปัน เบ, “อึณเตณ กอย ดี นี, แตห เบ ฮาว ซืร ซืร โดบ อึณเตณ ตี.” อัน ดี บอ กาลาง ปัน เหมา โลว วัห นา อัห บอ วัห นา ฆัะ. 22 เบ ดี บอ วี ดึห แวน อารึบ ราง แปะ แฮะ หลึบ เบ รึอน, บอ อารึบ ราง แปะ แฮะ หลึบ เบ ครีว. เบ ดี บอ วี มาด อึณ มูห โกรว อี กาดาต. เบ ดี บอ วี กาลาง ต็อห, “อึร, แฮะ ฮอต แวน. อาว ฮู โลว หณาบ โกบ อัน.”

23 เซ เบ แฮะ ฮอต ซัม ครึง ซีมา ดอน โมยว, เฌาพรา ดี บอ แตห ฆลาย โจห, แตห ปี ซัม เบ นับ ดี เหรห นับ ดี ตาง บอ มึห เบล กืน. อัน ดี แตห บอ พึง มาบู เฆ มามัก เบ ปึอน ดี โฮม เปต โดง กาว็อห ดาคึย.

24 มามัก เบ บอ มาลา อี แท มาน แท โดง นา เบ ตึอน มืร, เฆ ดี บอ ปึอน ดี โฮม เปต อี แจ กาซู ซัยะ บอ โหงว อี แฮะ ครึง แตห อึณ ซีคยา.

25 ซีแง ตี อึม แบลง ดี บอ ตัห ดอน นอน ดอน ดีลัยะ. ดอ อัน ตี อึณ ดี บอ มึห ดูอี กืน อี ลาย กาโฆห, ลาย กาง็อห.

26 บอ มาเฆียน ดี บลาง กาเซา ปี ซีแง. ซีแง ดี บอ แว บลาง หลึอม ดอ ตี นี อึณ มูห ปอ บู บูน. บลาง ซีแง ตี, อึณ ดี บอ ปี อี บลาง บู ซีแง, แฮะ วี กาฌูะ แบน อู ซีแง. ลอง อัน ตี, อึณ ดี บอ แบน ซีแง ปัน ดี ซีนัม เฌาพรา ดี เฆ ดูอี ปี อึบ อัน. อัน แฮะ ดึอม มาโนว เฆ, แตห เฆ มึห เซา มึห ดีม. อัน ยี วี แตห เฆ แกน ปัน อัน ตี.

27 แตห เบ โหลห แฮะ เหลณ กาเซา ดอ กาลาง เฌาพรา จืร อัน ดี เบ, แตห เบ นับ. ปัน ดี ตัห อัน คา นี, น็อห อัน ดี รู ดี เฆ อี ตู นัมโหลห อัน. บอ ดัก เงา ว็อง ดี กอย โรบ อัน, แตห เบ นับ แคะ รู อัน. บอ โฆรห ปี กาลาง อัน เฌา, อึณ ดี บอ ปี เงา อี แตห อึณ ลึห แคะ จาว อัน.

28 พึอม ปี ฮึห เลห อัน, อึณ ปี อึม อี อึณปูน โตต ดอน โมยว. ปาย ตี อัน บอ กาย็อห ดูอี, แตห อึณ ปี ดูอี ครึง เลห คาม. อัน มืร โบง แตห อึณ ปี ดูอี ฮับ อึณก็อะ แคง โมต อึณปร็อง, แตห อี ตึณ ฮาว ปอ โปละ.

29 มาแล, เบ อี มูห ดูอี ปี อึบ เฌาพรา, เบ ยี ดี วี โคย ดาคึย บอ ต็อห โหมว แคง หมึร, แตห อึณ ปี ดอ ลาย เฮียง เบ แคง บลอย อี ซีงา บอด ตึอน. เบ ดี บอ โบยว ดาคึย, แตห อึณ ปี วี อี บูด เวา อี ฮาว ดี นอน เฌาพรา, เฌาพรา อี ปี ดาอาง มาว อี ฆ็อง แร เฆ ดูอี อีซาเรลัะ ตึอน.

30 เฌาพรา ดี บอ แตห เฆ ยึร โฆรห อัน อี มึห ปวน ตาง. เฆ ดี บอ โลว คัม แคะ รู อัน เฌา ตี. อึณ ดี มึห บอ เงา บอ คูน ตาง, ฆลาย ตาง บอ เบรีย.

31 ปาย ตี เฆ ดูอี อาซูรียา ดี บอ กาจัว ดอ ยึร เฆ โฆรห อัน เฌา อี มึห ปวน ตาง ตี. อึณ ดี บอ ปี อัน ดี มัห เฆ ตา อึณกรวน.

32 เฌาพรา ดี มัห เฆ ตา แด อัน. ดอ มัห เฌาพรา ดี เฆ ดอน เฌณ, เฆ ดูอี ปี อึบ เฌาพรา, เฆ ดี บอ กัร ฆรึง บัห ดีง. เฌาพรา ดี บอ กาโฆห ดี เฆ ดูอี อาซูรียา ปาย ตี.

33 โคว, โดง ปี โดะ กาซึม เฆ แบน โมยว แบน โมยว แฮะ กอย เหลณ. เงา อี ดี โดะ กาซึม เฌาพรา คูนดีคัม อาซูรียา ตี, แฮะ ฮอต แรน อูน ปาย ตี. เฆ แฮะ คับ อูน เฮ กืน, แตห อึณ แบน กาโนม ตาง. เฌาพรา ดี ฮึห พึอม อัน, แตห อึณ เลห แบน เงา อี กูห แฮณ กาเซา.