1 อึย มืง อาเรลัะ,^a แม มูห มืง โดง ดึอม คยัะ อาดาวีด ตึอน, แม ดี ฌัม ดูก ตาง. แปะ แฮะ โบง เบ เซเซ ตึอน, แตห เบ โบง ฮาว ดอน ซีนัม ดอน ซีนัม. บลอย แปะ แฮะ ดึอม โบง เบ, แตห เบ บอ โบง ฮาว.

2 โอว เฌาพรา ยี แตห มืง ตี ฌัม ดูก. เบ ดี บอ ยาม บอ หงูน โกบ แฮะ คัม เบ ดูก ตาง. มืง ตี บอ มืง ดี บอ ปี กาโช็ง หลู ดี โอว อี มึห มี เงา เฆ หนาม.

3 โอว ดี บอ แตห รันซู เบ ตัห แวง โรบ เบ. แตห เฆ ซัม กาโช็ง จา บอ ฆึห กาดาย โบง บล็อะ อึณแตง ดี แรง มืง, แตห เฆ ปึอน ดี ลึบ.

4 เบ ดูอี แคง มืง เยรูซาแลม, เบ ดี กาลาง โฆรห ปี ดูอี อี กอย แคง กาเดา กาดาย. โฆรห เบ ดี เลห แคง กาปูห. อึณ ปี โฆรห กาเปรา อี พูพาบ, เลห นา ครึม.

5 เฆ ดูอี อาโมยว เฮา อี ดี กาโฆห ดี เบ ตี, เฆ ดี กืน กาเซา ปี กาปูห ปี บูด คูน. ดับ ดา ซึก อี หมึอม โยว กาเซา ตี, เฆ บอ ปี เดียบ โหงว ปี บูด คูน. ลอง อัน ตี, อึณ ดี บอ แบน กาเตา กาตึะ ดี เบ อู เฌณ.

6 เฌาพรา อี อึบ โตต ดอน โมยว, อัน ดี ตัห ดัม หมาบ ดี เบ, แตห อึณ มึห ฮัม กานัม, แตห มาอีม เยณ บอ มึห ซีนัน ซีนืง. อัน เฌา ดี จัร คูน ลาง ตัห บูด, แตห บอ ฆลาย ตาง โจห โดบ คูน ตาง. แตห บอ เงา กาซึม โตต.

7 แคะ กอย รันซู อี มูห ดูอี อาโมยว เฮา อี กาโฆห อี ปยาต มืง อาเรลัะ ตี บอ ครึง กาโฆห ปี ตา เฆ บอ ดอน โมยว, อึณ ดี หราย โตต อู เฌณ, แตห อึณ ปี ปี อึณบาว อี บอ ปี ยึร เฆ ดอ อึณบาว เฆ แคง หมึร.

8 เฆ ดูอี ตี ดี บอ ปี ดูอี อี กาปราณ ปี ดี โฮม. ดอ อีด เฆ, เฆ บอ อึณบาว แฮะ ปึอน ดี โฮม แพ. ดอ วี อึณซึห เฆ, เฆ ยี ซี กาปราณ ปี บรีม. เฆ บอ ปี ดูอี อี แฮะ ซี เดียง กาเซา อึม. ดอ อีด เฆ, เฆ บอ อึณบาว แฮะ ปึอน ดี เดียง แพ. ดอ วี อึณซึห เฆ, เฆ ยี ซี เดียง ปี บรีม.

9 แตห เบ โบง ฮาว นา ฮาย นา จีจีว อี แตห เบ โยว บอ กาปึณ. แตห เบ โบง ฮาว อี แตห งาย เบ อับ. แตห เบ ยึต, ยี ตู มูห โกบ เดียง เบ อึม มางูน. แตห เบ กาเกียง กาเกห, ยี ตู มูห โกบ เดียง เบ ป็อห อี บราง กาเซา.

10 โคว, อึณ ปี เฌาพรา แฮะ โบง แตห เบ อีด ลึก บอ ปีว โดว, แตห อึณ ปี กานัม แฮะ ปลึก เบ. เบ ดา อี บยาน โฆรห เฌาพรา, อัน เฌา แฮะ กาบีด งาย เบ. เบ ดา อี ยึร อาโรง ปี บยัะ เฌาพรา, อัน เฌา แฮะ ซีบลึก ฆีณ เบ.

11 ปี บยัะ ปี กาลาง เฌาพรา ดอน โมยว, อึณ ตู ลึห ดี เบ. อึณ ดี บอ ปี ซีลอย แปะ อี แฮะ ดอก อูน ฌึม. เบ ปี บอ ดึห ซีลอย ตี ฮาว โดง กอย ดูอี อี นับ ดี ตีห, หมาณ แตห อัน ตีห เบ โทม มืร, อัน ยี วี ต็อห ดี เบ, “โอว ตู ปึอน ตีห. ซีลอย แปะ ตี, แฮะ ฮอต ดอก ฌึม. อาว ปึอน วึห.”

12 เซ เบ ปี วี ดึห ฮาว ณืร ดูอี อี ตู นับ แปะ แตห อัน ตีห, อัน ปี ดี วี ต็อห ดี เบ, “โอว ตู นับ ดี ตีห, โอว ตู นับ แปะ.” ปาย ตี. อาว มึห อาเซ อี นับ ปี อึง เฌาพรา.

13 เฌาพรา ปี วี ต็อห, “ดูอี อาโมยว นี, เฆ ปี บอ ซาคึร ดี โอว มืร, อึณ มูห มี โฆรห ปีเยณ, อาว มึห ดีโคว มาเซ. น็อห พึอม เฆ ยี ตู นัมโหลห โอว. ปี กรึบ เฆ ดี โอว, อึณ โดบ มี ฮีด เฆ ดูอี, ยี ตู โดบ ดารา โอว.

14 โกบ อึณ ปาย ตี โอว ดี วี โบง แตห อึณ หมึอม อาม บอ หมึอม โยว กาเซา. เฆ ดูอี อี มึห อางยาน, อาว ฮู นับ ปี ปาย เฆ. อางยาน เฆ ตี, อาว ฮู มึห ดีโคว มาเซ. บอ ดูอี อี นับ แบน โมยว แบน โมยว, เฆ อาว นับ ดี กาพา ลอง ปี ดี โบง เฌาพรา ตี.”

15 เฆ ดูอี อี เครียง ปี คราม เฆ ดี โบง, แกวะ แตห เฌาพรา นับ ลอง อัน ตี, เฆ ดี โลว คัม ดูก ตาง. โคว, อึณ ปี ปี คราม เฆ ดี โบง ตี, เฆ แฮะ เครียง โดง ลึก กาเซา. เฆ กอย แคง อับ ว็อง. เฆ บอ ทาง อาว มึห อาเซ อี ดี นับ อี ดี ยึร ปี คราม เฆ ตี.

16 เบ ดูอี ฌึร ตี, เบ นับ ดี โบง กาเบลียะ โตต ดอน โมยว. เซ อึณ มูห ดูอี อี นับ ดี โบง กาโละ กาดาย, เบ ตู ปึอน มาด อัน ปี ดีกลวน กาดาย ตี. อาโมยว แปะ แฮะ โบง ดูอี, อาว ปึอน วี ต็อห ดี ดูอี อี แฮะ โบง อัน, “อาว มูห แม อี โบง โอว.” อาว ปึอน ต็อห, “แม ตู มึห อางยาน, ตู นับ ดี โบง มาเซ.”

17 อึณ ดี แบน ปี โฆรห กาโบย อี ต็อห, “อาว เหลณ นอน เลบานูน ดี วี แบน มาน เฆ โดง นา อี มึห เบล กืน. มาน เฆ โดง นา ดี วี ปี โอ็ง เฮ.”

18 อาคราว ดอ อัน เฆ ดูอี โหยะ กาอาว, เฆ ดี บอ วี ปึอน ยึร โฆรห ปี ตีห อี แคง ซีลอย แปะ ตึอน. บอ ดูอี งาย อับ อี กอย แคง อับ ว็อง, งาย เฆ ดี วี บลาง, วี ปึอน ยึร.

19 เฆ ดูอี อี มึห น็อห เตียม, เฆ ดี วี แบน น็อห โบยว ดาคึย ปี ดัว เฌาพรา. บอ เฆ ดูอี ฆีน ดูอี พลาน, เฆ ดี วี โคย ดาคึย. โคว, เฌาพรา อี ซีงา บอด, อี มูห เฌาพรา ปี กรึบ เฆ ดูอี อีซาเรลัะ อัน กาเว เฆ.

20 อึณ มูห อาคราว ดี โตต ฌาด เฆ อี คาหนาบ อี เฮา บอ เฆ อี ลูกตาย เฌาพรา. เฆ อี ซี โบง หมาบ, เฆ บอกาเฆลียด ดี โลว คัม ดี ลึร ชึม.

21 เฌาพรา ดี บอ ปยาต แวน เฆ อี กาย็อง อี เฮา บอ เฆ อี แคร ดูอี อี โลว ซูงพยาด อามู อี, บอ เฆ อี โบง แตห ดูอี ตู มึห หมาบ วี ลึร ชึม.

22 โคว, เฌาพรา อี มูห เฌาพรา ปี กรึบ เฆ ดูอี อีซาเรลัะ, เฌาพรา อี แฮะ คยอด อาบราฮัม ตึอน, อัน แฮะ กาลาง ลอง เฆ ดูอี อาโมยว อาโกบ ต็อห, “อึย เบ ดูอี ปี อึบ โอว, วาย นี เบ อาว ฮู โลว ซาย อี. นา เบ มืร, อาว ฮู กาฮ็อห ต็อง, อาว ฮู โหมง.

23 โคว, เบ ดี บอ ยึร ฆอน ปี ดี ดัว โอว ดี เบ, แตห เบ โหลห แคะ บอด โอว. ปัน อัน ตี เบ ดี บอ นับ, โอว มูห เฌาพรา อี ซีงา บอด, อี มูห เฌาพรา ปี กรึบ เฆ ดูอี อีซาเรลัะ. เบ ดี บอ วี โรวเซ โอว บอ อาม แคะ บอด โอว.

24 เฆ อี แฮะ กาพา กาลึบ แคง น็อห แคง พึอม เฆ, เฆ ดี บอ วี นับ ซีคยา ลอง โอว. เฆ ดูอี อี ซีมา ปึณ ซีมา เอห, เฆ ดี วี โทม ปี มาโนว อี เฮา, แตห อึณ กาหลูห ดี น็อห เฆ.”