คาน 28
เฆ ดูอี อาโมยว อาเอพารีม อี เดียง ป็อห เซเซ บอ ปีคึก น็อห เฆ, เฆ ดี ฌัม ดูก ตาง. บอ เฆ ดูอี อี กอย แคง ดีลัยะ อี มูห กาดาย บอด กาดาย หมึอม, เฆ ดูอี อี แฮะ ดึอม ชีด กาเซา ยี ปี โบห อี แกร ดี เฮียะ กาฮ็อห, เฆ อี เดียง ป็อห แตห เฆ ฮาว กาเกียง กาเกห, บอ เฆ ดี ฌัม ดูก ตาง.
2 แตห เบ ยอด, เฌาพรา แฮะ มึห ดูอี อี แฮณ อี มึห โปลม ตาง, อี แฮะ โพรม ดี กาโฆห ดี เฆ. เฆ ดี ตัห ปี ฆลาย ตาง บอ เบรีย บอ คูน ตาง อี แฮณ กาเซา. อึณ ดี บอ ปี อึม อี แฌว อี ฌูห บอ อึณปูน มืง. อัน ดี บอ ซัต แวน เฆ.
3 เฆ ดูอี อาเอพารีม อี ปีพูง เฆ, อี แฮะ ยึต ป็อห เซเซ, เฆ ดี วี แบน ปี แณต ปี ซีฆวัะ อี เฮา.
4 บอ เฆ ดูอี อี กอย แคง ดีลัยะ อี มูห กาดาย บอด กาดาย หมึอม, เฆ อี แฮะ ดึอม ชีด กาเซา, ยี ปี โบห อี แกร ดี เฮียะ กาฮ็อห, เฆ ดี ปี เบล ดีปู อี มูห เบล ดัง อาต ฌัม อาคราว ดียาง. เซ อี เฮา ฮี ยึร, เฆ ดี บอ เบต โฮม อู เฌณ.
5 ดอ อัน ตี, เฆ อี ซี ฆีด ซี อีม ตึอน, เฆ ดี มาด เฌาพรา อี อึบ โตต ดอน โมยว มึห อาพูง ดังโคว ตาง ปี มังฆึม.
6 อัน เฌา ดี บอ ดัว อางยาน ดี เฆ ดา ตาง อี ซูงพยาด ดารา, แตห เฆ นับ ดี ซูงพยาด โดบ นา หมาน. อัน เฌา ดี บอ ดัว โปลม เฆ แฮณ ดี เฆ อี บัร มาโลห มืง อี บัร ดี กาโฆห ดี รันซู เฆ อี ซี ลึบ.
7 โอว ดี บอ กาลาง ดี เฆ ลอง ดูอี อี แฮะ เดียง ป็อห บอ ฮาว กาเกียง กาเกห. อึณ บอ มูห ดา อี หลู ดี เฌาพรา, ดา อี บยาน โฆรห เฌาพรา. เฆ แฮะ ยึต ป็อห, แกวะ แตห เฆ ซี ปึอน ฮาว ซีคยา โดบ อึณเตณ, แกวะ แตห เฆ นับ ซีคยา ปี ซี บยัะ, ปี ซี กาลาง เฌาพรา ดี เฆ. เฆ แฮะ ยึต ป็อห, แกวะ แตห เฆ นับ ดี ซูงพยาด อามู อี แตห อึณ กาฌี.
8 โคว, กาโช็ง โดง เดียง เฆ ป็อห ตี, แฮะ มูห ฮึร เฆ ดีโลย, อาว มึห กาซืร อี ตู กาดาต.
9 ดูอี วี ตี อัน บอ ทาง อัน ดี ปึอน มาโนว อาเซ? อัน ดี แตห อาเซ นับ อางยาน อัน ตี? อึณ มูห ฆอน งัะ อี ซี ล็อะ ฆ็อห ปู?
10 อัน บอ นับ ดี ดึห ดารา แบน ณ็อง แบน ณ็อง. ดึห แบน อึณแปรง อึณแปรง. ดึห อู โปละ อี แจก อี แจก.
11 เฌาพรา ยี ตู แตห เฆ มาโนว ปาย ตี. เฌาพรา ดี วี จัร ดูอี ปอ อู โมยว อี กาลาง โฆรห อี ลาย บลืง ดี เบ, แตห เฆ วี ตัห มาโนว เบ.
12 อัน เฌา แฮะ ดึอม ต็อห, “โอว แฮะ กาเว เบ, แตห เบ ปึอน ดี ดีเหลา, แตห เบ ปึอน ดี วี โดม โปลม เบ เฆ แฮณ เบ.” มาแล, เฆ แฮะ วี แวน ตู ดึห ดี โทม โฆรห เฌาพรา.
13 ปาย ตี เฌาพรา ดี แตห เฆ วี โทม ดารา แบน ณ็อง แบน ณ็อง, แบน อึณแปรง แบน อึณแปรง, ดึห อู โปละ อี แจก อี แจก, แตห อึณ ปี เฆ ฮาว ดีปลาด เกห. เฆ ดี บอ ลึร ชึม, แตห อึณ ปี เฆ กอย แคง ยอต, แตห อี เฮา ปึอน ดี เหมต ฮาว เฆ.
14 โกบ อึณ ปาย ตี เบ ดูอี อี ซีมา ปึณ ซีมา เอห, เบ อี มูห ดา ตาง อี แยต อี แคง มืง เยรูซาแลม, แตห เบ วี โทม โฆรห เฌาพรา.
15 เบ แฮะ ปีพูง เบ ต็อห, “เย แฮะ ฮอต ลาย แบน อู ฆึก, แฮะ ลาย กาล็อะ ดี โบว อี แตห อี ยัม. เย แฮะ ลาย ดึอม ดี เฌา มารานัะ. อาเพ อาเร อี นับ ดี แตห อี ลึร ชึม ตี ปี บอ ตัห มืร, เย แฮะ นับ, เย ดี ลอด ดี อาเพ อาเร ตี. โคว, เย แฮะ บึง อี กาโลว. เย แฮะ หณึม อี ตู มูห ตู หมาน, แตห อึณ ปี เย แฮะ เครียง ครึม ทึบ.”
16 โกบ อึณ ปาย ตี เฌาพรา อี อึบ โตต ดอน โมยว แฮะ ต็อห, “โอว ดี เบลห อูน เจณ ร็อง อี มัน ซีคยา อี ง็อห ตาง กาเซา, แตห อึณ แบน ดัง ร็อง แคง มืง ฌีโอน. อาเซ หณึม บึง โอว ลอง อัน ตี, อัน ตู โลว เตา ฮาว แฮ แฮ.
17 โอว ดี แตห ดูอี ซูงพยาด โดบ ดารา, แตห อึณ ปี เซณ แมมี ปี ตา อี ดอ ซัม กาง, แตห อึณ กาซืร. ปี ซูงพยาด เฆ นา มูห นา หมาน, อัน บอ ปี เบล อาพัม ปี ตา อี ดอ ซัม กาง, แตห ร็อง จ็อง ซืร. เซ ฆลาย เฆ เบรีย ฮี ตัห, อึณ ยี ปยาต แวน อี ตู หมาน ปี บึง เบ ตึอน. อึม ดี บอ อึณปูน โดง เครียง เบ ตี.
18 แปะ แฮะ กาแซณ เบ ดี โบว อี แตห อี ยัม, อึณ ดี ลึร ชึม. บอ แปะ แฮะ ลาย กาล็อะ เบ ดี เฌา มารานัะ อึณ ดี กาปยาต ลึร. อึณ ดี ชึม ปัน ดี ตัห อาเพ อาเร อี นับ ดี แตห อี ลึร ชึม โตต.
19 ดอน เฌณ ดอ ตัห อาเพ อาเร ตี เบ ดี บอ โลว คัม โดบ อี เฮา. ดอน ซีแง ดอน ซีแง อึณ ดี ตัห ดอง คืน ดอง วัน.” เซ ซีเพา โฆรห เฌาพรา ตี กอ ลึห ดี เบ, อึณ ดี แบน กาจัว แบน กาปึณ ดี เบ.
20 เบ ปี บอ โบง, แตห เบ ลาย กาล็อะ ดี อี, อึณ ปี กาโช็ง อีด เบ แฮะ ดีเตียม, อาว โกบ กาณาด. ฮึบ เบ มืร แฮะ ดีแตด, อาว โกบ ปลึก ดี โดว เบ.
21 เฌาพรา ดี บอ กาโฆห แตห อึณ กอ ปี ปี ดึอม โบง อัน ดี นอน เบนราซีม บอ ดี ฆลัง กีปอง. เซ อัน เฌา ดี โบง ปาย ตี อึณ ดี บลืง ดี น็อห เบ. เซ อัน บอ โบง ปี คราม อัน ดี โบง, อึณ ตู โดบ ปี ทาง อี.
22 แกวะ แตห เบ กาณัห บอ ลูกตาย อัน. แกวะ แตห อึณ แว หณาบ ดี เบ. โอว แฮะ ยึร โฆรห เฌาพรา อี อึบ โตต ดอน โมยว. อัน เฌา แฮะ ซูงพยาด ดี ปยาต มืง บอ มืง, แตห อึณ ลึร ชึม โตต.
23 แตห เบ โทม โฆรห ปี กาลาง โอว นี. โฆรห ปี กาลาง โอว นี, แตห อึณ บอ ลึห ซีคยา ดี เบ.
24 ดูอี รัณ โดง นา, อัน ตู นับ ดี แท โดง นา อัน ดอน ซีแง ดอน ซีแง. อัน มืร ตู ฆึห กาดาย เซเซ.
25 อัน แฮะ ฮอต แท, แฮะ ฮอต ฟึร ซีคยอง ซีคยา, อัน กอ ดี วี บรัด ซีมา เดา ซามูง บอ ซีมา อึณกรึห หมี. แฮะ ฮอต, อัน ปี วี ดึห ซีมา เคาคยูง บรัด แบน อึณแปรง อึณแปรง, บอ ซีมา เคา บาลี แตห อึณ เลห โดง กอย อัน. ดี โคบ โดง นา ตี, อัน ดี บอ วี บรัด ซีมา ซีโฆ็งรา.
26 อัน แฮะ นับ ซีคยา ลอง อัน ตี. โคว, เฌาพรา แฮะ ฮอต มาโนว อัน.
27 อัน มืร ตู ดึห เฮ จัน ทีบ กาอาง เดา ซามูง. อัน มืร ตู ดึห กาเลณ ลักเลา, วี ลอย กาอาง อึณกรึห หมี. อัน บอ ดึห อึณเพียะ มัห กาอาง เดา ซามูง. อัน บอ ดึห อึณกรวน มัห กาอาง อึณกรึห หมี, แตห อึณ รัห.
28 เซ อึณ ยี มูห เฆา เคา คยูง บอ เฆา เคา บาลี โลว กรีด แตห อึณ แบน กาแปะ. อัน ยี ตู กรีด เซเซ. อัน บอ นับ ปี ดี ปาย ดี แตห มังปร็อง ลาก ลักเลา แดง เฆา ตี, ยี ตู แตห เฆา ตี กาลาต ลึร ชึม.
29 อางยาน ฌึร ตี ดอน โมยว บอ ตัห โตต ดี เฌาพรา อี อึบ โตต ดอน โมยว. อากยาม อางยาน ปี ดัว เฌาพรา ตี, บอ อางยาน อัน แฮะ บอด กาเซา.