เฆ บอ ต็อห, “ดอ อัน ตี เฌาพรา บอ โฆ็ง อาพูง ดังโคว อัน บอ มาปัวะ ลาง อี นับ ดี ง็อห อี. อัน วี ดัม หมาบ ดี มากราย อี มูห ฮัณ ตาง อี ครัน ดี ฮาว กาโฆะ กาแฆะ. อัน ดี ง็อห มากราย ตาง อี กอย แคง อึม นัมมูกซารา.”

2 ดอ อัน ตี เฌาพรา วี กาลาง ลอง มาน มางูน อัน. อัน ต็อห,

3 “โอว เฌาพรา ลึมลา บอ รึก อึม เซเซ ดี มาน มางูน โอว. โอว บอ บัร อัน ดอง คืน ดอน วัน, แกวะ แตห อึณ มึห อาเซ อี ปึอน ดี ตัห ปยาต อัน.

4 โอว มืร ตู มึห ดี รู โกบ อัน. เซ อึณ ดี มึห ดูอี อี ตัห บรัด เดา มาอาต, โอว ดี บอ กาโฆห ดี เฆ แตห อึณ ปี อี วี กาโนม โดะ เดา มาอาต ตี แคง เงา.

5 เซ อาว ปาย ตี มืร, เฆ อี แบน รันซู โอว, เซ เฆ ซี แตห โอว ฆ็อง แร เฆ, เฆ โลว ตัห แบน ฆึก โอว, ตัห ลาย กาล็อะ ดี โอว. แฮะ หมาน, เฆ โลว ตัห แบน อู ฆึก ดี โอว บอ ลาย กาล็อะ ดี โอว.”

6 วาย อัน ตี, เฆ ดูอี อีซาเรลัะ อี มูห ครึร อาโกบ ตึอน, เฆ ดี วี แบร กืน. เฆ ดี บอ ปี เฮ อี แฮะ วี มึห เรียห, วี มึห อึณโลห. บอ เบล เฮ ตี ดี บอ กืน, แตห อึณ กอ โนะ แดง กาดาย นี.

7 เฌาพรา มืร ตู ดึอม มาโนว กาเซา เฆ ดูอี อีซาเรลัะ, แตห อึณ ปี แคะ ปี โบง อัน ดี รันซู เฆ. อัน มืร ตู ดึอม แตห เฆ ยัม กืน, ตู แตห อึณ ปี อัน ง็อห ยัม รันซู เฆ.

8 แม เฌาพรา, แม มาโนว แล แตห เฆ คัม ดูก ดี ดูอี เฮา อี ตัห เหมต เฆ. แม เฌา แฮะ แตห เฆ กาดูห ดี เตา, แตห อึณ ปี คูน ตาง อี ตัห นา เลห ซีแง แฮะ ตัห บูด ฌูน ฮาว เฆ.

9 โกบ อึณ ปาย ตี เฌาพรา ดี บลัวะ แวน หมาบ เฆ ดูอี อีซาเรลัะ. อึณ ยี ลึห ซีคยา ลอง แฮะ ลอด เฆ ดอ แฮะ ปยาต เฆ ดี กาโช็ง หลู เฆ ดี เฌา ปี กรึบ อี เฮา. มาว ดี กาโช็ง หลู ตี, เฆ โลว กาบัก แตห อึณ ลึร ปี มาว ทูน, แกวะ แตห อึณ ซี มึห กาโช็ง หลู ดี นาง กานัม อี จืร เอซูรา, บอ กาโช็ง หลู ซีนัม อูห หงูน ดี เฌา แบน โมยว แบน โมยว.

10 มืง อี แฮะ มึห แรง อี มัน ซีคยา วี แบน โดง เยน โดง ง็อง. อึณ บอ ราม วี แบน นัง เฮ นัง แปร ดีโลย. อึณ ดี วี แบน โดง เบลห โดง เฮียง เฆ มามัก อี ดี อีด ดี ตี บอ กาบัก รา เฮ.

11 รา เฮ เฆ ตี บอ กาฮ็อห กาบัก โจห. เฆ อีบึณ ดี บอ วี ตัห เกด, แตห อึณ แบน เฮ โดะ เฆ. โคว, แคะ กอย เฆ ดูอี อาว มึห อาเซ อี มึห อางยาน. ปาย ตี เฌาพรา อี แฮะ พาน เบลห เฆ, อัน อาว ฮู กาเว เฆ, อาว ฮู แตห เฆ ยึร ปี เฆฌู อัน ดี เฆ.

12 ดอ อัน ตี เฌาพรา ดี วี แฆบ กาฌูะ เฆ ดูอี ปี อึบ อัน แบน วี แบน วี. อัน ดี จูห ดี แบลง อึม อูพาราด กอ ฌัม ดี อึม แบลง แอฆึบ. อึณ ดี ปี อี มัห โหงว, แตห เฆา อัน เลห. 13 ดอ อัน ตี อึณ ดี บอ มึห ฮัม เวา นึง แป อี ฮัม ตาง กาเซา, แตห อึณ แดะ ตัห เฆ ดูอี อีซาเรลัะ อี แฮะ โบยห แฮะ หราย แคง มืง อาซูรียา บอ เฆ อี แฮะ เลห เตา แคง มืง แอฆึบ. เฆ บอกาเฆลียด ดี วี ตัห โฆม กรึบ เฌาพรา แคง มืง เยรูซาแลม ดี นอน อี ซีงา บอด.