1 ดอ ซีแง อัน ตี เฆ ดูอี ดี วี ต็อห โหมว แคง มืง ยูดา ปาย นี. เฆ ต็อห, “มืง เอ แฮะ มูห มืง อี มัน ซีคยา. เฌาพรา ดี ฆ็อง แร มืง เอ, แตห อึณ ซีคยา ปี มืง อี มึห แรง เฆ โฮว จา.

2 แตห เบ วึห มาโลห มืง, แตห เฆ ดูอี อี มึห น็อห บอด น็อห หมึอม บอ เฆ อี มึห น็อห ซืร น็อห หมาน ปึอน ดี ตัห ลึบ.

3 แม เฌาพรา อี มูห ดา กาณา เย แม ดี ดัว น็อห ฆัด เฆียด ดี เฆ อี มึห น็อห ซี บึง ซีคยา แม.

4 แตห เอ บึง เฌาพรา เซเซ. อัน เฌา มูห โดง ปึอน บึง เซเซ. อัน ปี ดาอาง มาว อี กอย มัน เซเซ.

5 อัน เฌา แฮะ แตห เฆ อี มึห น็อห ปีคึก วี โจห โลง. อัน แฮะ ปยาต แวน บอ มืง อี มึห โปลม เฆ แฮณ กืน. อัน มืร แฮะ ปยาต แวน บอ แรง มืง เฆ, แตห อึณ กาปยาต ลึร, วี กอย แคง กาปูห.

6 เฆ ดูอี อี แฮะ คัม ปี คาหนาบ อี เฮา ตึอน เฆ อี ฆีน อี พลาน เฆ วี ปึอน ดี แณต มาว เฆ ตี.

7 อึย แม เฌาพรา, แม แฮะ จอย เฆ ดูอี อี มึห น็อห ซืร น็อห หมาน. แม เฌา แฮะ โบง แตห อึณเตณ ปี ว็อะ เฆ ตี ลืม ซีคยา บอ ฆลัง การัม.

8 เย แดเจณ แม เฌาพรา, ดอ โดบ เย อึณเตณ ปี อึง แม, เย บึง แม บอ หน็อะ อึณด็อะ แม เฌา. ปี ซี ปึอน เย ปี คราม เย อึณ บอ มูห มี ลอง แม เฌา.

9 แคง หมึร น็อห พึอม โอว บอ ฆาว ปวน แม เฌา. ปัน ดี ซูงพยาด แม เฌา อามู อี แดง กาดาย นี, อึณ ดี มาโนว เฆ, แตห เฆ นับ ลอง นา ซืร นา หมาน.

10 อี มูห ดูอี ตู หมึอม เฆ ปี บอ แฮะ ปึอน ปี เฆฌู แม เฌา มืร, อึณ ยี ตู กาหลูห ดี เฆ นา มูห นา หมาน ตี. เฆ บอ วี โบง นา ฮาย นา มืก แคง มืง ดูอี อี โดบ ดารา. เฆ มืร ตู โหลห ตู โรวเซ ปวน แม เฌา.

11 อึย แม เฌาพรา, แม แฮะ โจะ แด แม, แตห แม ดัม หมาบ ดี เฆ ดูอี มืก ดูอี ฮาย ตี. เฆ ยี ตู นับ ลอง อัน ตี. แตห แม เฌา แตห เฆ วี นับ แคะ ตาง น็อห ร็อก แม ดี ดูอี ปี อึบ แม, แตห เฆ วี ซาย อี. แตห แม เฌา ดัม หมาบ ดี เฆ, แตห อึณ ปี เฆ กาซึม แคง เงา.

12 อึย แม เฌาพรา, แตห แม แตห เย กอย ดาคึย, กอย ฆัด เฆียด. แคะ แปะ แฮะ มึห แปะ แฮะ ปึอน เย โตต ดอน โมยว, อึณ มูห แม เฌา อี แฮะ ดัว ดี เย.

13 อึย แม เฌาพรา อี มูห เฌาพรา ปี กรึบ เย, เย แฮะ ดึอม คัม อี เฮา อึบ เย. ปี บอ แฮะ ปาย ตี มืร, แม เฌา อู กาดัง นี ยี มูห เฌาพรา ปี กรึบ เย.

14 ดอ ตี นี เฆ อี ดึอม อึบ เย ตี แฮะ ฮอต ยัม โตต. เฆ มืร อาว ฮู ปึอน วี ยีต วี อีม ดอ เหมา. แม เฌา แฮะ ปยาต เฆ, แกวะ แตห อึณ มึห อาเซ อี วี นัมโหลห เฆ ดอ เหมา.

15 แม เฌาพรา, แม แฮะ แตห ดูอี อาโมยว เย วี ฮืง แบร กืน. แม เฌา แฮะ วี ปีว็อห ปีเลห มาน มืง ปี อึบ แม เฌา, แตห อาพูง ดังโคว แม เฌา แว ตาง.

16 แม เฌาพรา, ดอ แฮะ คัม เย ดูก, เย แฮะ โหลห แม. เย บอ ซาคึร บอ กาลาง ดี แม ดอ คัม เย ปี มาโนว กาเซา แม ดี เย.

17 แม เฌาพรา แฮะ โบง แตห เย แดเจณ แม กาดูห ดี ยาม เรียง ปี อีบึณ อี แฮะ วัต เซา ดี มึห ฆอน.

18 เย ปี บอ แฮะ คัม ดูก ฌึร ตี มืร, เย ยี ตู ฆึอด มาเซ. เย มืร ตู แป ดี คยอด ดูอี แคง มืง ปี อึบ แม เฌา. รันซู เย มืร ตู ชึม ตู ปาย เหมา.

19 เฆ แดเจณ แม เฌา อี แฮะ ยัม ตึอน, เฆ ดี วี ยีต วี อีม. โดว ยัม เฆ ดี วี ยีต วี อีม. อึย เบ อี แฮะ กอย แคง กาเดา บาเรว, แตห เบ วี โคย, ต็อห โหมว ดาคึย. ปี โบง แม เฌา, อึณ ดี ปี อึม ดีงาน อี โจห แดง กาดาย, แตห เปต เฆ แปร วี เงียน วี อีม. แม เฌา มืร ดี โบง แตห เฆ อี แฮะ ยัม อี แฮะ กอย แคง กาเดา บาเรว วี เลห.

20 เฌาพรา ดี บอ ต็อห, อึย เบ ดูอี ปี อึบ โอว, แตห เบ ตัห ลึบ แคง กาง เบ, วี กาบีด ซีคยา มาโลห กาง เบ. แตห เบ กอย หนีม หนีม อาดา อู กาจัน, แตห น็อห รู เฌาพรา กอ หราย โตต.

21 โคว, เฌาพรา แฮะ เลห ตัห โดง กอย อัน, แตห อัน ดัม หมาบ ดี ดูอี แดง กาดาย นี. ดอ อัน ตี, อึณ ดี ลึห ซีคยา แปะ แฮะ โบง ดูอี. อึณ ดี ปี กาดาย ดี บอ กาลาง บยัะ โตต ปี เครียง ปี ปรา อี ดี ง็อห ยัม. อึณ มืร ปี กาดาย ตู เครียง เฆ อี คัม อี เฮา ง็อห ยัม เฆ.”