1 อึย แม เฌาพรา, แม มูห เฌาพรา ปี กรึบ โอว. โอว ดี อืบ มยูก แม เฌา. โอว อืบ แคะ ตาง ปวน แม เฌา. แม เฌา แฮะ โบง อี หมึอม อาม กาเซา. แม เฌา บอ มึห น็อห ซืร น็อห หมาน บอ โบง โดบ แคะ แปะ แฮะ คราม แม ดี โบง ซีณ ดอ มึอน.

2 แม เฌา แฮะ โบง แตห มืง ตาง ลึร กาปยาต, แตห มืง อี มัน ซีคยา กาบัก ลึร โตต. โฮว คูนดีคัม ปี ดาง เฆ รันซู แม เฌา แม แฮะ แตห อึณ หราย โตต, แกวะ แตห เฆ ปึอน ดี วี ซัม ดอ เหมา.

3 โกบ แฮะ โบง แม ปาย ตี, เฆ ดูอี อี กอย แคง มืง อี มึห โปลม ตาง เฆ วี อืบ แม เฌา. เฆ อาโมยว ดูอี ฮาย เฆ ยี โยว แม เฌา.

4 โคว, เฆ ดูอี ดูก ดูอี ฆีน เฆ วี เตา ฮาว บึง แม เฌา, แตห เฆ วี ปึอน ดี กอย ดาคึย, อาว ฮู โลว โยว มาเซ ดอ มึห อาคราว ดูก. แม เฌา บอ ฆ็อง แร เฆ, แตห อึณ ปี เฆ แฮะ ลอด ดี คูน ตาง บอ ฆลาย ตาง, แตห อึณ บอ ปี เฆ แฮะ ปึอน ดี กอย โดง อับ, แกวะ แตห อึณ ซอดาด กาเซา ดี เฆ. เฆ ดูอี ฮาย ดูอี มืก เฆ นับ ดี โบง ปี ฆลาย เฆ เบรีย อี โจห อาคราว ฆัด.

5 อึณ บอ ปี บอ ซอดาด อี ซึอน โดง กาดาย กาฮ็อห. อี ซีนัน ซีนืง ปี โบง ดูอี เฮา แม เฌา ยี วี แตห อึณ เยน. บอ โหมว ปี ต็อห เฆ ดูอี ฮาย ดูอี มืก, แม วี แตห อึณ เยน, แตห อึณ หราย ปี ซอดาด แฮะ หราย ดอ วี มึห อึณอูะ เฆ ฆลาย.

6 แดง นอน ตี เฌาพรา อี อึบ โตต ดอน โมยว อัน ดี บอ แรน บลอย ตาง, เฮียง เฆ ดูอี บอกาเฆลียด. อัน เฌา ดี บอ ดึห ปี ดี โฮม อี หมึอม อี ซีแงห บอ อึม มางูน อี หมึอม อี ซีแงห หลึอม โมยว เฮา, วี เฮียง เฆ โฮม.

7 แดง นอน ตี อัน เฌา ดี บอ ดึห แวน อี ดูก อี หณาบ ดี น็อห เฆ อี ปี บีก อี กาโหมะ นา เฆ. อัน ดี บอ ดึห แวน อี ปลึก เฆ ดูอี ดอน โมยว.

8 เฌาพรา อี อึบ โตต ดอน โมยว ดี บอ ดึห แวน เฌา มารานัะ, แกวะ แตห อี ยัม ดอ เหมา. อัน เฌา ดี บอ คูด แวน อึม งาย เฆ ดูอี ดอน อี. อัน มืร ตู แตห อี แนนัะ เฆ ดูอี ปี อึบ อัน, แกวะ แตห อึณ มึห อาเซ แดง กาดาย อี ปึอน ดี คาหนาบ เฆ. เฌาพรา แฮะ กาลาง อูน ปาย ตี.

9 ดอ อัน ตี เฆ ดูอี ดอน อี ดี บอ ต็อห, “อัน เฌา มูห เฌาพรา ปี กรึบ เอ. เอ แฮะ บึง อัน เฌา, แตห อัน คยอด เอ. อัน เฌา มืร มูห เฌาพรา ปี หน็อะ อึณด็อะ เอ, แตห เอ โคย ดาคึย โกบ แฮะ คยอด อัน เฌา ดี เอ.”

10 เฌาพรา ดี บอ ฆ็อง แร นอน ฌีโอน. อี มูห ดูอี แคง มืง โมวอาบ, เฆ ยี โลว คัม อี แณต เฆ, แตห อึณ ปี อี แณต เหรียง แคง กาเดา เอียง มัก.

11 เฆ ปี บอ บยาก ดี เลห, แตห อึณ ปี ดูอี อี โฆยวฆยา ดี วาย อึม มืร, เฌาพรา ยี ดี แตห เฆ โจห โดง เตียม. อัน ดี ดึห แวน โตต ดอน โมยว ปี โฆยวฆยา เฆ ดี โบง บอ แคะ กยัะ เฆ.

12 อัน เฌา ดี บอ ปยาต แวน โฮว จา บอ แรง มืง, แตห เฆ โจห, บูง บรัด ดอน โปละ, วี แบน โตต กาปูห.