1 อานี อึณ บอ มูห ลอง ดีลัยะ ปี บยัะ เฌาพรา แบน โมยว แบน โมยว. “อึย เบ ดูอี บอ มืง, เหมา อึณ ปาย ปี ซอ กาโพรม เบ ดี กอย แดง กาตูะ กาง เบ?^a เบ มึห ดูก โมยว เหมา?

2 เบ บอ โบง ซีนัน ซีนืง, โบง แตห อึณ โบยว, แตห อึณ เกยา. เบ ยี ตู วี นับ, ดูอี เบ แฮะ ยัม. อาว มูห เฆ ยัม โกบ ลาย กาโฆห เฆ ดี ดา ซึก. เฆ ตู ยัม ดี มาปัวะ ลาง.”

3 เฆ ดา กาณา เบ แฮะ ฮอต เตา โตต. ซีณ อาต บัณ เฆ บลา คอ อู ณ็อง, อี เฮา แฮะ ฮอต วี ปึอน ดี เหมต โตต เฆ. ดูอี เบ ปี บอ แฮะ เตา เครียง มืร, แคะ ปี ยึร เฆ, เฆ แฮะ ฮอต เหมต โตต.

4 โคว อัน ตี, โอว แฮะ ต็อห, “แกวะ แตห เบ ยอด โอว. แตห เบ อูน มี โอว อู วี กอย, แตห โอว ปึอน ดี ยาม อาดา เฆ ดูอี อาโมยว โอว อี แฮะ ยัม ตี. แกวะ แตห เบ โฆยวฆยา ดี โบง มาเซ อี ดี เหลา น็อห โอว.”

5 อาคราว นี อึณ มูห อาคราว ดี โลว คัม ดูก, อาคราว ดี ชึม ดา ซึก. อาคราว ดี แบน น็อห กาฟัร กาเฟียน แคง ดีลัยะ โดง ปี บยัะ เฌาพรา แบน โมยว แบน โมยว. เฌาพรา อี อึบ โตต ดอน โมยว แฮะ แตห อึณ แบน ปาย ตี ดี เอ. แรง มืง เอ มืร เฆ แฮะ บลูห แตห อึณ กาเดา, แตห อึณ ซาฆลูห โจห. เฆ บอ ดัด แดะ ดี นอน, แตห อึณ มึห อี ตัห จอย เฆ.

6 เฆ ดา ซึก อี แฮะ ตัห แคง มืง เอลัม แฮะ ดึห ตัห อัะ เฆ บอ บลา เฆ, ดึห ตัห บอ ดา ซึก อี ป็อะ ลักเลา บอ อี ป็อะ อึณปร็อง. เฆ ดา ซึก อี ตัห แคง มืง กีรัะ มืร แฮะ โฆ็ง มัง ฆ็อง เฆ.

7 ดีลัยะ แคง มืง เบ อี มูห กาดาย บอด กาดาย หมึอม ตึอน, แฮะ มูห โตต โดง ตัห กอย ดา ซึก อี ป็อะ ลักเลา เฆ อี ป็อะ อึณปร็อง. บอ นา อาต มาโลห มืง เฆ แฮะ คยัะ กอย.

8 โมยว อี ดี แร ดี ฆ็อง เฆ ดูอี อายูดา, อัน เฌา แฮะ ฮอต ดึห ฮาว โตต. ดอ อัน ตี เบ แฮะ น็อห ตาง ดี ครึง กาโฆห ปี เครียง ปี อูน เบ แคง โฮว อี จืร โฮว แคง แปร ตึอน.

9 เบ ดี บอ วี ยึร แรง มืง เยรูซาแลม อี มูห มืง อาดาวีด. อึณ แฮะ วี โลว อึณปราย แบน โปละ แบน โปละ. เบ ดี บอ แตห อึม ตัห กาฌูะ แคง อึม ดึง อี กอย นา เตต.

10 ดอ อัน ตี เบ ดี บอ วี ตีห ดี ยอด กาง แคง มืง เยรูซาแลม. เบ ดี บอ วี ปยาต กาง เฆ ตี, วี ดึห ตัห มาว เฆ แตห เบ ปึอน ดี อึณปราย แรง มืง.

11 ดี กาแต แรง มืง บอ อา บลาก, เบ ดี บอ ฆึห อึม ดึง, แตห เบ ปึอน ดี แฆบ อูน อึม อี แหล ตัห ดี อึม ดึง โบ็ง บรีม ตึอน. เบ ปี บอ แฮะ โบง ปาย ตี มืร, เบ ยี ตู มาด ตู ซวง ดา กาณา อี แฮะ แด อูน มืง ตี. เบ มืร ตู โรวเซ ดา กาณา อี แฮะ คราม ดี โบง ลอง อัน ตี ซีณ อาต นี.

12 ดอ อัน ตี เฌาพรา อี อึบ โตต ดอน โมยว, อัน ดี แดะ เบ, แตห เบ ตัห ยาม ตัห กลึร, แตห เบ ฆาะ แวน บอ ฮึก ฆีณ เบ, ชึบ บอ ครึง จาน.

13 ปี บอ แฮะ ปาย ตี มืร, เบ ยี วี โบง บลอย บอ โบยว โบยว เกยา เกยา. เบ บอ วี ง็อห มามัก เฆ มาบู, วี โฮม ยัง, เดียง อึม มางูน. เบ บอ ต็อห, “โฮม แพ แพ, เดียง แพ แพ, แคหณา โยว เอ ปี ดี ยัม.”

14 เฌาพรา อี อึบ โตต ดอน โมยว แฮะ วี ต็อห ดี โอว, “หมาบ เบ ตี โอว ตู ฆ็อห แวน, แตห อึณ กอ ฌัม ปัน ดี ยัม โตต เบ.”

15 เฌาพรา อี อึบ โตต ดอน โมยว, อัน วี จัร โอว ฮาว โดง กอย อาเซบานา อี อึบ โกรวกราม แคง โฮว คูนดีคัม, แตห โอว กาลาง ดี อัน ต็อห,

16 “แม ทาง แม มูห อาเซ? อาเซ มูห วอแว แม อี กอย ดี นี, แตห แม ฆึห กาเดา บาเรว อาดา แม ดี นี, แตห แม บอ โบลห ดาอาง มาว อี กอย โดง จา นี, โบง แตห อึณ วี แบน โดง อวน แม?

17 บัร แม ยอด, แม อี แฮะ มึห ปวน เฆ แฮณ, เฌาพรา ดี โฮว เลห แม, โบง แตห อึณ กาเซา ดี แม.

18 เฌาพรา ดี ปา รีด แม บอ มาวัด แม ปี อี มาวัด เบล อาปืะ. เฌาพรา ดี วึณ ฮาว แม, แตห แม ฌัม แคง มืง ตาง, มืง กาว็อห. แม ดี บอ ยัม แคง มืง ตี โคบ ลักเลา แม แปะ แฮะ ปีพูง แม ดี แม ตึอน. โกบ ปี ปาย แม ตี, บอ ดูอี อี กอย แคง โฮว ดา กาณา แม ดี หมึอม ซาย.

19 เฌาพรา ดี บลัวะ โจห แม, ดึห แวน บอ ปวน แม. แม อี แฮะ ดึอม กอย โดง จา, แม ดี วี โจห โลง.

20 ซีแง อัน ตี โอว ดี แดะ ตัห แดเจณ โอว อี จืร อาเอยาคีม อี มูห ฆอน อาฮีลาคี. 21 โอว ดี วี ดึห ซีโตว ตูน แม บอ แซะ แม, วี ชึบ ดี อัน, แตห อึณ แบน โปลม แบน แฮณ ดี อัน. โอว ดี ดึห ปวน แม, วี อาบ ดี อัน. อัน ดี วี แบน ปี ฆูณ เฆ อี กอย แคง มืง เยรูซาแลม บอ แคง มืง ยูดา บอกาเฆลียด. 22 โอว ดี อาบ แตห อัน มึห ปวน, แตห อัน แบน คูนดีคัม แคง หลูกหลาน อาดาวีด, แตห อึณ ปี โอว ดึห ลัะคัดเซา แปะ แฮะ ดึอม ดัว โอว ดี คูนดีคัม อาดาวีด ตึอน, วี ดัว ดี อัน. แคะ ปี วึห อัน, อาว มึห อี ปึอน กาบีด. แคะ แปะ แฮะ กาบีด อัน, อาว มึห อี ปึอน วี วึห. 23 โอว ดี แตห อัน กอย มัน ซีคยา เซเซ, แตห อึณ ปี มาฮีน อี ดอก ดี ร็อง อี แฮะ มัน ซีคยา. แคง ครึร อัน, อัน บอ มึห อาพูง ซาเร ดี อาต อี เฮา. 24 เฆ บีนอง วอแว อัน บอ เฆ อี หณึม บึง อัน บอกาเฆลียด อึณ บอ ปี เฆ แตห อัน ปัห โกรว อี จัน กาเซา. อึณ ปี บอ อี ดึห ก็อก อึม, ดึห ซีลัยะ เฆ กาโละ ฮอย อูน ดี มาฮีน อี แฮะ ดอก ดี ร็อง ตึอน.

25 แฮะ ฮอต ปัน ตี มาฮีน แปะ แฮะ ดอก อูน เฆ ดี ร็อง อี แฮะ มัน ซีคยา ตี, อัน ดี บอ ลูด โจห อู เฌณ. ปาย ตี โกรว ปี ฮอย อูน เฆ ดี อัน ตึอน บอกาเฆลียด, อึณ ดี บอ ชึม โตต.” เฌาพรา แฮะ กาลาง ปาย ตี.