คาน 21
ลอง มืง บาแบ ดี ลึร ชึม
1 คา นี ดี วี กาลาง ลอง อี ดี ปาย แคง แปร กาฮ็อห อี กอย โคบ อึม นัมมูกซารา. คูน ลาง นับ ดี บูด แคง แปร กาฮ็อห, นับ ดี ปยาต ลึร โตต. ปาย ตี ดูก อี ตาง กาเซา ดี ตัห แคง แปร กาฮ็อห. อึณ ดี ตัห แคง กาดาย มืง อี หมึอม โยว กาเซา.
2 เฌาพรา วี บยัะ แตห โอว ยึร อี หณาบ กาเซา. อึณ บอ มูห ลอง ดูอี อี ตู ปึอน หณึม, อัน โบง แตห อึณ แบน ดูก ดี อี, บอ ลอง ดา โฌน อี พาด ดึห โกรวกราม อี. อึย เบ ดูอี แคง มืง เอลัม, แตห แบ กาโฆห. เบ ดูอี แคง มืง เมดี, แตห เบ ฮาว แวง โรบ มืง ตี. ดูก ปี ดึอม ดัว มืง ตี ดี อี, เฌาพรา ดี แตห อึณ วี เยน.
3 แคะ ปี ยึร โอว แตห อึณ แบน ดูก ดี โอว, แตห อึณ เซา กาเซา ดี โอว. อึณ กอ ปี อีบึณ เซา ดี มึห ฆอน. อึณ แฮะ จัน กาเซา ดี น็อห โอว โกบ แปะ แฮะ โทม โอว. อึณ แฮะ ดูก ตืก ดี น็อห โอว โกบ แปะ แฮะ ยึร โอว.
4 ฆีณ โอว มืร กอ บัด กอ รึร โกบ โยว กาเซา โอว. โอว บอ กาปรา แตห อึณ ฌัม บา ดี อับ อี ดาคึย. อึณ ยี ตู แบน อาฆยึร มาเซ. อึณ วี แตห มี น็อห โยว น็อห กาปึณ ดี โอว.
5 แคะ ปี ยึร โอว ตี, เฆ แฮะ แรน ปี ดี โฮม. เฆ แฮะ ดัะ อูน บอ อึณเบว อาดา โดง ดี ตัห ตูต แคต. แฮะ ฮอต, เฆ บอ โฮม บอ เดียง. ดอ อัน ตี อู เฌณ, อึณ วี มึห โฆรห ต็อห, “อึย เบ ดา กาณา, แตห เบ แรน อูน ครึง กาโฆห เบ.”
6 ดอ อัน ตี เฌาพรา ปี วี กาลาง ดี โอว ต็อห, “แตห แม ฮาว ดาง แตห อึณ มึห ดูอี อี บัร มืง อู วี, แตห อัน วี กาลาง แคะ ปี ยึร อัน.
7 เซ อัน บอ ยึร ดูอี อี ป็อะ อึณปร็อง อี ป็อะ แบน ฆู แบน ฆู, เซ อัน ยึร บอ ดูอี อี ป็อะ มาลา เฆ มังปร็อง กาฮาต, แตห อัน ซาดีก บอ ยอด ซีคยา บอ โทม โตต ดอน โมยว.”
8 ดอ อัน ตี ดา อี บัร มืง ดี วี แดะ ต็อห, “อึย แม เฌา, โอว แฮะ กอย ดี นี, บัร โดง บัร โอว นี ดอง วัน ดอง คืน.
9 ดอ ตี นี โอว แฮะ ยึร เฆ อี ป็อะ อึณปร็อง แบน ฆู แบน ฆู แฮะ ตัห.” อู วี บอ แดะ ต็อห, “มืง บาแบ แฮะ ฮอต กาปยาต ลึร โตต. แคะ กอย อารึบ ราง ปี กรึบ เฆ มืร แฮะ ฮอต กาบัก โจห โตต แดง กาดาย.”
10 อึย เบ ดูอี อาโมยว โอว, โอว แฮะ แตห เบ คัม ดูก แบน โมยว แบน โมยว ปี อี มัห โหงว บอ กึม ดีฆาว. ดอ ตี นี แคะ ปี ยึร โอว ปี กาลาง เฌาพรา อี อึบ โตต ดอน โมยว อี มูห เฌาพรา ปี กรึบ ดูอี อีซาเรลัะ, โอว วี กาลาง ฮาว ดี เบ ปาย ตี.
ลอง มืง อี ง็อง
11 อานี อึณ วี มูห ลอง มืง อี ง็อง.a ดูอี อู วี กอย แดง นอน เซอี, อัน วี แดะ ดี กาลาง ต็อห, “อึย แม อี บัร แคง หมึร, หมึร นี อึณ ดี ปวน ดอ เหมา? หมึร นี ปัน เหมา อัน ดี โตต? แตห แม กาลาง ดี โอว.”
12 ดา อี บัร แคง หมึร วี ต็อห ดี อัน, “ซีณวัห ดืน ดี ตัห. มาแล, แคง หมึร ปี ดี วี ตัห. เซ แม ซี ดีหมอด ปอ อึณ ปัว วาย อัน ตี, แตห แม วี ตัห ดีหมอด.”
ลอง มืง อาราบ
13 อานี อึณ มูห ลอง มืง อาราบ. “อึย เบ ดูอี แคง มืง แดดาน อี ฮาว แบน พึง, ฮาว โดบ อึณเตณ โต็ง, เบ โลว คยัะ โลว เครียง เบ แคง มืง อาราบ โดง มึห มี ยวน เฆ แปร กาฮ็อห.
14 อึย เบ อี กอย ดี โดง จืร เทมา, แตห เบ ดัว อึม ดี เฆ อี ซี เดียง อึม อี แฮะ ตัห โดง กอย เบ. แตห เบ ดัว ปี ดี โฮม ดี เฆ อี แฮะ เตา เลห โดง กาโฆห ดา ซึก.
15 โคว, ดูอี เฆ ตี, เฆ แฮะ เตา แตห เฆ ลอด ดี มาปัวะ ลาง อี แฮะ ฮอต ทอด อูน บอ ดี บลา อัะ อี แฮะ ฮอต วีต อูน. เฆ แฮะ เตา บอ ดี อาเพ อาเร ดอน โมยว โดง กาโฆห ดา ซึก.”