1 เฌาพรา วี กาลาง ลอง อี ดี ปาย มืง ดามาคู ต็อห, “บัร เบ ยอด, มืง ดามาคู อาว ฮู วี แบน มืง ดอ เหมา. อึณ ดี มึห มี โมยว อี กาปยาต ลึร.

2 มืง แบน มืง แบน มืง อี กอย โคบ มืง ตาง อารอ, เฆ ดี บอ ราม โตต. แคง มืง เฆ ตี, อึณ ดี วี ลัต มี เปต, แตห อึณ วี แบน โดง ตัห โฮม มาบู เฆ มามัก. เซ เฆ ดี บอ อีด ดีเหลา, อาว มึห อาเซ อี ตัห ณอน เตา เฆ คอ อู วี.

3 เฆ ดูอี แคง มืง อีซาเรลัะ บอ เฆ ดูอี แคง มืง ดามาคู อาว ฮู มึห โดง ดี ปึอน บึง ปึอน เครียง. เฆ ดูอี อาราม อี ซี ฆีด ซี กอย, เฆ ปี ดูอี อีซาเรลัะ อี แฮะ ดึอม มึห อาพูง ดังโคว อี แฮะ ฮอต หราย. โอว เฌาพรา อี อึบ โตต ดอน โมยว, โอว แฮะ กาลาง อูน ปาย ตี.”

4 เฌาพรา ปี วี ต็อห, “ซีแง อัน ตี อาพูง ดังโคว เฆ ดูอี อีซาเรลัะ ดี โยม โลง. เฆ แฮะ ดึอม มูห ดูอี อี แฮะ ฆลัณ, ยี แฮะ วี คยา กาเซา.

5 อึณ ดี บอ ปี บอ ดูอี อี โซะ โหงว, อี แฮะ โฆรบ อูน แคง แด อัน. อึณ ดี ปี บอ ดูอี ฆีน อี แฆบ กาโย็ง โหงว วาย แฮะ ฮอต อี โซะ. อึณ ดี ฆีด มี อี แจก.

6 เฆ ดูอี อีซาเรลัะ, เฆ ดี บอ ปี เฮ เบล นามัน แปะ แฮะ ครัห โจห อี แตห อึณ รัห. อึณ ดี ฆีด มี อา โอย โบ็ง ดี กาแดะ อัน. เซ อาว ปาย ตี มืร, อึณ ดี ปี รา อี แฮะ มึห เบล มึก เบล กืน, ยี แฮะ วี ฆีด พวน พัน โบ็ง ดี รา ตี. โอว เฌาพรา อี มูห เฌาพรา ปี กรึบ เฆ ดูอี อีซาเรลัะ, แฮะ กาลาง อูน ปาย ตี.”

7 อาคราว ดอ อัน ตี แคะ กอย ดูอี บอกาเฆลียด, เฆ ดี บอ วี น็อห ตาง, วี บึง อัน เฌา อี พาน เบลห เฆ อี มูห เฌาพรา อี ซีงา บอด, เฌาพรา ปี กรึบ เฆ ดูอี อีซาเรลัะ.

8 เฆ มืร อาว ฮู รีมาด กาโช็ง หลู ปี โบง เฆ ดี แด เฆ. เฆ อาว ฮู โรวเซ อี มูห อารึบ ราง ปี โบง เฆ. บอ อารึบ นาง กานัม อี จืร เอซูรา บอ กาโช็ง โดง โดะ เฆ อึณกรึห อูห หงูน เฆ อาว ฮู กรึบ.

9 ดอ อัน ตี มืง ดี ตาง อี แฮะ มัน ซีคยา, เฆ ดี เบลห แวน, แตห อึณ กาปยาต ลึร, แตห อึณ ปี มืง ดูอี อาโมยว ฮีวีด บอ มืง ดูอี อาโมยว อาโมวรีด แปะ แฮะ เบลห แวน เฆ ดอ เตา เฆ ดี ดูอี อีซาเรลัะ ตึอน.

10 โคว, เบ ดูอี อีซาเรลัะ, เบ แฮะ ปีว เฌาพรา อี ปี ดาอาง มาว, อี แฮะ คยอด เบ, อี แฮะ ฆ็อง แร เบ. เบ แฮะ วี ซัม เฮ อี บอด อี มยาด บอ กรึบ ปี กรึบ ดูอี อาโมยว เฮา.

11 เบ ปี บอ แฮะ โบง, แตห อัน โบห อัน ลัต หณา ซัม เบ ตี อู เฌณ มืร, เบ ยี ตู ปึอน ดี เบต เบล อัน. อึณ ยี ดี วี แบน อี ดูก อี หณาบ กาเซา ดี เบ.

12 อึณ ดี มึห ดูอี กืน, เฆ ดี บอ ซีนัน ซีนืง, แตห อึณ กอ ปี ดีงึณ ฮัม อึม นัมมูกซารา. เฆ ดี บอ ปี มาอึม อี แฮะ โฮะ แฮณ กาเซา บอ ครัน ดี ซีลอย ปลึก.

13 ฆรัณ เฆ ดูอี กืน ดี บอ ปี ฮัม มาอึม ตาง. เฌาพรา ยี ดี วี แคร เฆ, แตห เฆ วี กาดูห ดี เตา ฮาว โต็ง, กาดูห บอ อี คูงครัห เฆ, แตห เฆ กอ ปี กาปูห อี แฮะ กาฮึง แดง นอน, บอ กาอัห แปะ แฮะ บูด คูน.

14 เฆ โบง แตห อาเพ อาเร ตัห ดี เฆ ดอ มูห ฆีณ หมึร. แปร หณัม ดัน วัห, เฆ แฮะ ฮอต วี หราย โตต. อาตี ดี แบน ดี เฆ ดูอี อี แฮะ พาด ดึห โกรวกราม เย.