1 เฆ ดูอี โมวอาบ บอ วี ดึห ฆอน มาบู, แตห อึณ แบน ลักซอง, วี ดัว ดี ดา กาณา อี อึบ มืง. เฆ อี กอย แคง มืง ซีลัะ บอ ตึย โดว ตี แตห อึณ กาโลห แปร กาฮ็อห, ฌัม มืง เยรูซาแลม, หมาณ แตห ดา กาณา ตี จอย เฆ.

2 เฆ อีบึณ อาโมยว โมวอาบ อี กอย ดี บาง กาโลห แบลง อึม อารานูน, เฆ อาว ฮู นับ ปี ดี ปาย. เฆ บอ ฮาว วีว ฮาว เวณ ปี มาซีม แปะ แฮะ ณอน เตา อี, แตห อัน เลห ตัะ กาฮูน อัน.

3 เฆ วี กาลาง ดี ดูอี อายูดา ต็อห, “เย อาว ฮู นับ ปี ดี ปาย, หมาณ แตห เบ ดัว อากยาม อางยาน ดี เย, แตห อี เฮา วี โบง ซืร ซืร หมาน หมาน ดี เย, แตห อึณ ปี เย กอย ครึม ยาบ เฮ, แตห อึณ กอ ปี แคง อับ ว็อง ดอ กาแต ซีแง. เย อี แฮะ เตา ดี รันซู เย, เย หมาณ, แตห เบ ดึห เครียง เย โดง ตู ปึอน ยึร เฆ.

4 เย หมาณ, แตห เย ปึอน ดี กอย แคง มืง เบ, แตห เบ บอ แคร เฆ อี ซี รัน ซี พยาก เย ตึอน, แตห อึณ กอ ฌัม ปัน ดี หราย เฆ อี แฮะ คาหนาบ เย บอ ปัน ดี จู เฆ ปยาต มืง.

5 ปัน อัน ตี อึณ วี มึห อู วี แคง หลูกหลาน อาดาวีด, อัน ดี แบน คูนดีคัม อี นับ ดี กาเว ดูอี. อัน ดี บอ อึบ ดูอี บอ โบง ซืร ซืร หมาน หมาน. อัน ดี โบง ครัน ครัน นา มูห นา หมาน บอ ซูงพยาด แตห อึณ การัม.”

6 เฆ ดูอี อายูดา ปี วี ลาย ต็อห, “เอ แฮะ ยึร ปี ปาย เฆ ดูอี โมวอาบ ดี ปีคึก เฆ. เอ แฮะ นับ เฆ แฮะ ปีคึก เฆ บอ น็อห ตาง ดี โดว บรีม เฆ. มาแล, ปี คราม เฆ บอ ปี ปีพูง เฆ ดี เฆ ตี, อาว มึห ดีโคว มาเซ.”

7 โคว, แตห เฆ ดูอี โมวอาบ ยาม ตาง. แตห เฆ บอกาเฆลียด ยาม โกบ มืง โมวอาบ. แตห เฆ ยาม โกบ แฮะ วี นัมโหลห เฆ ดอ แฮะ ปึอน เฆ ดี โฮม ซีแงห โฮม แพ ดอ กอย เฆ แคง มืง กีรัะเฮซีด.

8 โดง นา อี กอย แคง มืง เฮซาโพน บอ เฮ มางูน อี กอย แคง มืง ซีบามา แฮะ ฮอต กาฮ็อห. เฆ คูนดีคัม อาโมยว เฮา, แฮะ แดบ แวน รา อัน. อึณ ปี รา อัน ตี แฮะ ดึอม เลห โต็ง, กอ ฌัม ดี มืง ยาเฌรา, ฌัม บอ แคง แปร กาฮ็อห. รา อัน ปอ อู บลาก แฮะ โต็ง กอ ฌัม ดี อึม ดึง.

9 โคว อัน ตี, โอว มืร วี ยาม รึม โดบ เฆ ดูอี อี กอย แคง มืง ยาเฌรา อาดา เฮ มางูน อี กอย แคง มืง ซีบามา ตี. อึม งาย โอว มืร แฮะ รัห อาดา มืง เฮซาโพน บอ อาดา มืง เอเลอาเล. โคว, แคง มืง ตี, อาว ฮู มึห อี ปึอน ดี โซะ ปึอน ดี เบต ดอน โมยว ปี ซัม เฆ โกบ แฮะ ตัห รันซู.

10 อาว ฮู มึห ดูอี อี โบยว ดาคึย โกบ ปี ซัม ปี ปีด เฆ แฮะ เลห กืน แคง โดง นา อี มูห กาดาย บอด กาดาย หมึอม. อาว ฮู มึห อาเซ อี แฮะ แณต เบล มางูน, แตห อึณ แบน อึม มางูน. เฆ อี แฮะ ดึอม ดัด ซีนัน ซีนืง อี โบยว โบยว เกยา เกยา แคง มาน มางูน มืร แฮะ ฮอต เยน โตต.

11 โกบ อึณ ปาย ตี โอว บอ กลึร กาเซา อาดา มืง โมวอาบ. แคง น็อห โอว, โอว บอ หงูน ปี ฮัม ดีง อี แฮะ ทูน กาเซา. โอว บอ ยาม อาดา มืง กีรัะเฮซีด.

12 อึณ ดี บอ ดูก กาเซา แคง น็อห เฆ ดูอี โมวอาบ. เฆ ดี บอ โฮะ แดง นอน จา, วี ฮาว ลึบ แคง โฌง เฆ บอ โบง แตห เฆ นูน กาเซา, วี ซาคึร วี หมาณ ดี เฌา ปี กรึบ เฆ. มาแล, อึณ ยี ตู มึห ดีโคว มาเซ.

13 อาตี อึณ มูห ปี ดึอม บยัะ เฌาพรา ลอง แปะ แฮะ ปาย มืง โมวอาบ. 14 ดอ อัน ตี เฌาพรา แฮะ ต็อห, “ดูอี อู วี แฮะ กาแซณ ดี ฌาง ดี อี เฮา อาดา โอย ซีนัม, อัน ดี บอ ตีห ซีคยา ซีแง อัน. ปาย ตี โอว เฌาพรา มืร ดี ตีห ซีคยา. อาต โตต โอย ซีนัม โอว ดี โบง แตห โกรวกราม อี กอย แคง มืง โมวอาบ หราย โตต. เฆ ดูอี อี แฮะ กืน กาเซา, เฆ ดี วี ฆีด มี อี แจก, เฆ ดี บอ ดีหลัห กาเซา.”