1 เฌาพรา วี กาลาง ลอง อี ดี ปาย มืง โมวอาบ ปาย นี. “อู หมึร มืง อารา อี กอย แคง มืง โมวอาบ ดี บอ ลึร ชึม. อู หมึร บอ มืง กีรัะ อี กอย แคง มืง โมวอาบ ดี บอ ลึร หราย.

2 เฆ ดูอี อี กอย แคง มืง ดีโพน, เฆ ดี บอ โฮะ กอย แดง นอน จา, แตห เฆ ปึอน ดี ยาม ดี ตี. เฆ ดูอี แคง มืง โมวอาบ ดี บอ กลึร บอ หงูน โกบ มืง เนปอ ฆาย มืง เมเดพา. เฆ บอกาเฆลียด ดี บอ ฆาะ ฮึก ฆีณ เฆ, ฆาะ บอ ดีโมห ดี กูงกาบ เฆ โกบ แฮะ กลึร กาเซา เฆ.

3 เฆ ดูอี อี ฮาว โดบ อึณเตณ, เฆ ดี บอ ชึบ ดี ตา ครึง จาน. เฆ ดูอี อี กอย ดีฆลัะ บอ เฆ อี กอย แดง กาง,^a เฆ ดี บอ ยาม บอ หงูน ตาง.

4 เฆ ดูอี อี กอย แคง มืง เฮซาโพน บอ แคง มืง เอเลอาเล, เฆ ดี บอ โลว ยาม แตห อึณ กอ ลึห ฌัม มืง ยาฮาด. เฆ ดา ซึก แคง มืง โมวอาบ เฆ ดี บอ มึห น็อห โยว ดียูห ดีเยณ.

5 อึณ แฮะ ดูก กาเซา บอ ดี น็อห โอว ดาง เฆ ดูอี แคง มืง โมวอาบ. เฆ ดี บอ เตา ฮาว กอ ฌัม แคง มืง โฌวอาน บอ แคง มืง เอกาลัดเซลัะซียา. เฆ ดี บอ ยาม ดอ ฮาว เฆ โดบ อึณเตณ อี ฮาว ดี มืง ลูฮีด. เฆ ดี บอ กาโพรม ดี ยาม ตาง ดอ เตา ฮาว เฆ ดี มืง โฮวรานีม. เฆ ดี บอ หงูน ตาง ยาม ตาง โกบ แฮะ กาปยาต ลึร โตต มืง เฆ.

6 อึม แบลง นีมรีม มืร แฮะ ฮอต ฮีด. แปร เฆ เปต มืร แฮะ ฮอต กาฮ็อห ยัม โตต. อาว มึห แปร อี ซี อีม อี ซี เงียน คอ อู กาดัง.

7 โคว, เฆ ดี บอ วี ดึห โกรวกราม แปะ แฮะ ดึอม แฆบ อูน เฆ บอ เตา กาโลห โรง อึม อี มึห เฮ อาราบ.

8 ฮัม ยาม เฆ, อึณ กอ ดี ลึห กาลัต แคง มืง โมวอาบ, แฮะ ปึอน ยึร บอ แคง มืง เอกาลีม บอ แคง มืง บีราเอรีม.

9 แบลง อึม แคง มืง ดีโมน ดี บอ แบน โตต หนาม. ปี บอ แฮะ ปาย ตี มืร, โอว ยี ดี วี แตห อึณ แว ดูก ปอ อึณปัว แคง มืง ดีโมน. อึณ บอ มูห มาครังซี อี ดี ตัห ปยาต เฆ ดูอี โมวอาบ บอ เฆ ดูอี อี ซี ฆีด ซี กอย, อี แฮะ เตา แตห เฆ ลอด ดี รันซู เฆ ตึอน.” แคะ ตี เฌาพรา แฮะ กาลาง มืง โมวอาบ.