1 เฌาพรา ปี ดี วี มึห น็อห กาเว เฆ อี มูห หลูกหลาน อาโกบ, อี มูห ดูอี อาโมยว อัน. อึณ ปี อัน ดี วี ร็อห เฆ, แตห เฆ วี แบน ดูอี อาโมยว อัน. อัน ดี วี แตห เฆ ตัห กอย โดง กอย บรีม เฆ. บอ ดูอี อาโมยว เฮา ดี วี ตัห โดบ เฆ บอ กอย เครียะ เฆ.

2 เฆ ดูอี อาโมยว เฮา ดี บอ จอย เฆ ดูอี อีซาเรลัะ, แตห เฆ เจว ฌัม โดง กอย บรีม เฆ. ปัน ตี เฆ ดูอี อาโมยว เฮา ดี บอ โลว คัม ดี แบน หมาย เฆ ดูอี อีซาเรลัะ. ดูอี อี แฮะ ดึอม เหมต เฆ ดูอี อีซาเรลัะ เฆ ดี วี คัม ดูอี อีซาเรลัะ เหมต เฆ, แตห เฆ ดูอี อีซาเรลัะ วี ปึอน ดี อึบ ดูอี อี ดึอม คาหนาบ เฆ.

3 อึย เบ ดูอี อีซาเรลัะ, เฌาพรา ดี วี แตห เบ เลห แคง ดูก อี แฮะ แตห เบ โยว กาเซา. อัน ดี บอ แตห เบ เลห แคง แปะ แฮะ คาหนาบ อี เฮา ดี เบ.

4 เฌาพรา ฮี ฮอต โบง ปาย ตี เบ ดี วี ปึอน ดี แนนัะ คูนดีคัม อี อึบ มืง บาแบ ต็อห, “อาลึร, อี แฮะ ดึอม คาหนาบ อี, อัน อาว ฮู ปึอน ดี โบง ปี อึง อัน. ปวน เฆ ดูอี ฮาย, แฮะ ฮอต หราย บอ น็อห รู เฆ แฮะ ฮอต โตต.

5 เฌาพรา แฮะ โบง แตห โปลม เฆ แฮณ อี ฮาย กาเซา ตี หราย โตต. แตห อึณ ปี อัน แฮะ กาบัก แวน อึณกรวน เฆ บอ บลา เลียห เฆ.

6 คูนดีคัม ตี แฮะ ปยาต ดูอี แบน โมยว แบน โมยว ดอ เลห ดอซัะ อัน. อัน มืร คาหนาบ เฆ ตู แตห อึณ เยน ดอ เหมา.

7 ดอ ตี นี อึณ ยี วี เยน ดาคึย แดง กาดาย ดอน นา ดอน โปละ. เฆ ดูอี บอกาเฆลียด บอ โบยว ดาคึย ต็อห โหมว.

8 เฮ อึณเก บอ เฮ อารีด อี กอย ดี นอน เลบานูน ดี ดาคึย กาเซา โกบ แฮะ ชึม คูนดีคัม. เฆ ดี บอ ต็อห, ‘อาว ฮู มึห อาเซ อี ดี ตัห ฆัร เย, แตห เย เกห. อาว ฮู มึห อาเซ อี ดี ตัห ปยาต ตัห บลัต เย.’

9 มืง มารานัะ อี กอย นา ครึม มืร แฮะ บัร ดี รวห แม คูนดีคัม แคง มืง บาแบ. ดูอี แคง มืง มารานัะ อี แฮะ ดึอม มึห ปวน แดง กาดาย, เฆ บอ ดืน บอกาเฆลียด. ดูอี แคง มืง มารานัะ อี ดึอม แบน คูนดีคัม, เฆ บอ ยีต แดง มาลาง เฆ.

10 เฆ มืร กาโพรม ดี ต็อห, ‘ดอ ตี นี, แม มืร อาว ฮู มึห โปลม เฆ แฮณ ปี เย. แม มืร แฮะ แบน ปี เย.

11 แม ปี บอ แฮะ ดึอม มึห อาพูง ดังโคว, อึณ แฮะ หราย โตต ดอน โมยว. บอ ดีง แบน โมยว แบน โมยว, อาว ฮู มึห. ดอ ตี นี, มาวัะ แฮะ วี แบน กาโช็ง อีด แม. บอ มา อึณปรัต แฮะ วี แบน ฮึบ แม.’

12 อึย แม มาลาง หณา อี บลาง ซีณวัห เจว, แม แฮะ ฮอต โจห ดี เบลณ. อาต นี แม แฮะ มูห คูนดีคัม อี อึบ ดูอี แบน โมยว แบน โมยว. ดอ ตี นี, แม แฮะ วี กาดูห ดี โจห แดง กาดาย.

13 แม แฮะ คราม ดี โฮะ แคง ฆางหราว, คราม ดี เบลห มาลาง แม แดง ซีมัณ แปะ แฮะ เบลห อูน เฌาพรา อี กอย จา กาเซา. แม แฮะ คราม ดี แตห แม ปึอน ดี ตูต ปี เฆ คูนดีคัม อี ตูต แดง นอน อี กอย นา กัว ซืด, อี มูห โดง ตัห กาฌูะ เฆ เฌา ปี กรึบ อี เฮา.

14 แม มืร แฮะ คราม ดี โฮะ โดง จา อี กอย แดง อึณอูะ. แม บอ ซี แบน ปี เฌาพรา อี อึบ โตต ดอน โมยว.

15 มาแล, แม ยี แฮะ วี กาดูห ดี โจห โลง แคง มืง มารานัะ อี ปี กาเดา ฮูเลา อี ลึก กาเซา.

16 เฆ อี ยึร แม, เฆ ดี บอ อาง โมต เฆ ยอด แม ต็อห, ‘วี นี แฮะ หมาน มูห อัน วี อี แฮะ โบง แตห อึณ กาฟัร กาเฟียน แดง กาดาย, แตห ดูอี แบน มืง แบน มืง กอ โยว ดียูห ดีเยณ?’

17 แฮะ หมาน มูห อัน ดูอี อี แฮะ ปยาต มืง ดี ตาง บอ โบง แตห กาดาย วี แบน โตต แปร กาฮ็อห? แฮะ หมาน มูห อัน อี แฮะ โบง ตู แตห เฆ อี โจห กาปึม วี ปึอน ดี เลห เวณ ดี กาง เฆ?

18 แคะ กอย เฆ คูนดีคัม ดอน มาน ดอน มืง, เฆ แฮะ ยัม กอย แคง บาเรว วี เหมา วี อัน. เฆ ปี บอ แฮะ กอย แคง บาเรว มืร, อาพูง ซาเร เฆ ยี ซี มึห.

19 อี มูห แม, บาเรว มืร แม ตู มึห. โดว ยัม แม เฆ แฮะ ลาก ฮาว แวน นา เรต, แตห อึณ ปี รา เฮ ปี กาอีห กาเซา ดูอี. เฆ ดา ซึก อี แฮะ ยัม ดี มาปัวะ ลาง, เฆ บอ ดีเฆต โดว แม ปี อี ปลึก ฮึบ. อึณ บอ ปี เบ โจห โลง แคง กาเดา มาว เฆ กาเดา ดาอาง, ปี โดว ยัม ปี แณต อี เฮา.

20 โกบ แฮะ วี ปยาต แม มาน มืง แม, แฮะ วี ง็อห ยัม บอ ดูอี ปี อึบ แม, เฆ ตู ดีบ โดว ยัม แม ปี คูนดีคัม กาดัง เฮา. อึณ มืร ตู มึห ดูอี อี นัมโหลห หลูกหลาน ดูอี ฮาย ฌึร ตี.

21 แตห เบ แรน บลอย ง็อห ยัม หลูกหลาน คูนดีคัม โกบ หมาบ แปะ แฮะ โบง เฆ ฆูณ ดัง เฆ. เซ อาว ปาย ตี, โยว เฆ ดี วี อึบ กาดาย, วี แด มืง แดง กาดาย นี ดอน นา ดอน โปละ.” แคะ ตี โหมว ปี ต็อห เฆ ลอง คูนดีคัม อี อึบ มืง บาแบ.

22 เฌาพรา อี อึบ โตต ดอน โมยว ปี วี ต็อห, “โอว ดี กาโฆห ดี มืง บาแบ แตห อึณ กอ ลึร โตต. แกวะ ฮู แตห อึณ มึห ดูอี อี อึบ มืง ตี. โอว มืร ตู อูน ตู แตห อึณ มึห หลูกหลาน อัน คอ อู วี. โอว เฌาพรา แฮะ ต็อห ปาย ตี.

23 โอว ดี โบง แคง มืง บาแบ แตห อึณ แบน โดง กอย มังฆึห บอ เลห โณะ. โอว ดี ดึห แวน โตต ดอน โมยว, แตห อึณ ปี อี ดึห อึณบีห บีห แวน กาอัห. โอว เฌาพรา อี อึบ โตต ดอน โมยว แฮะ ต็อห ปาย ตี.”

24 เฌาพรา อี อึบ โตต ดอน โมยว แฮะ ดืง ต็อห, “แคะ ปี คราม โอว ดี โบง, อึณ ดี แบน. แคะ ปี ซูงพยาด น็อห โอว ดี โบง, อึณ ดี แบน โตต ดอน โมยว.

25 โอว ดี ปยาต แวน คูนดีคัม อาซูรียา อี แฮะ ตัห กอย แคง มืง อีซาเรลัะ อี มูห มืง โอว. โอว ดี แณต พูพลัม เฆ ดูอี อาโมยว อัน แดง นอน โดง กอย โอว. โอว ดี แตห เฆ ดูอี ปี อึบ โอว ลอด ดี ดูอี อาซูรียา ตี. อึณ ดี ปี โกรว จัน ปี โลว ฆอด เฆ ดี โจห ดี เฆ บอ มัง ฆอด เฆ ดี เลห ตัะ ยัะ เฆ.

26 ปี คราม โอว ดี โบง ตี, อึณ บอ บาะ โตต ดอน โมยว แดง กาดาย นี. อึณ ปี โอว ดี โซ็ง แด โอว, แตห อึณ ดัม หมาบ ดี ดูอี ดอน ฌึร ดอน ครึร.”

27 เฌาพรา อี อึบ โตต ดอน โมยว แฮะ ซูงพยาด ดี โบง ปาย ตี. อัน แฮะ คราม ดี ดัม หมาบ ดี ดูอี, อาว ฮู มึห อาเซ อี ปึอน แคร. อึณ ปี อัน แฮะ ฮอต โซ็ง แด อัน, อาว มึห อาเซ อี ปึอน บาก แวน.

28 ซีนัม ดอ ยัม คูนดีคัม อาคาด, เฌาพรา ปี วี กาลาง ต็อห,

29 “อึย เบ ดูอี พีลีที, อึณ ปี อึณเพียะ อี ดี มัห เบ แฮะ ฮอต กาบัก ลึร. มาแล, เบ แกวะ โคย. โคว, เซ มาฮัณ อู โดว แฮะ ยัม, มาฮัณ โดว อี ฮาย หลึอม ตี บอ นับ ดี วี ตัห ปลูะ อัน. ปึอน มาฮัณ โดว ตี ดี บอ วี กัห แบน มาฮัณ อี ครัน อี ฮาย กาเซา.

30 โอว ดี เฮียง เฆ ดูอี ปี อึบ โอว อี มูห เฆ ดูอี อี ดูก อี ฆีน, แตห อึณ ปี อี เฮียง มาบู. โอว ดี แตห เฆ กอย ดาคึย. มาแล, โอว ยี ดี วี แตห เบ ดูอี พีลีที เอต ปี ดี โฮม, แกวะ แตห เบ ลอด ยัม คอ อู วี, แตห อึณ ปี อี รึต เลห เรียห เฮ.

31 อึย เบ ดูอี พีลีที บอกาเฆลียด, แตห เบ ยาม ตาง บอ หงูน. อึย เบ ดูอี บอกาเฆลียด, แตห เบ โยว บอ ดียูห ดีเยณ. โคว, อึณ ดี มึห ดา ซึก อี ตัห นา กัว. อึณ ดี บอ ปี ดัก เงา ตาง ดี ตัห. แคง ดับ ดา ซึก เฆ ตี, อาว มึห อาเซ อี แกร ดี โดบ ดี ปัน.” ปาย ตี เฌาพรา แฮะ กาลาง ลอง เฆ ดูอี พีลีที.

32 เซ อึณ มึห ดาลาม อี ตัห แคง มืง ดูอี อาโมยว เฮา, วี ดีหมอด ลอง ดูอี อีซาเรลัะ, แตห เบ ต็อห ปาย นี. “เฌาพรา แฮะ แด มืง ฌีโอน. เฆ ดูอี ปี อึบ อัน อี มูห ดูอี ดูก ดูอี ฆีน, อัน แฮะ แตห เฆ วี กอย แคง มืง ตี, แตห เฆ ลอด อาเพ อาเร.”