1 อานี อึณ บอ มูห ปี วี บยัะ เฌาพรา ดี อาอีซายัะ อี มูห ฆอน อาโมด. เฌาพรา วี บยัะ ดี อัน ลอง มืง บาแบ.

2 อัน ต็อห, “แดง นอน อี แฮะ กาฆลัะ ซีคยา ตึอน, แตห เบ เบลห อูน อาลาม อี บยัะ ดา ซึก ดี โลว กาโฆห. แดะ แคะ กอย ดา ซึก บอกาเฆลียด, แตห เฆ โซ็ง แด เฆ, แตห อึณ แบน ลักซานา เฆ ดี ลึบ โดง กอย เฆ ดา ตาง อี อึบ มืง.”

3 เฌาพรา มืร ต็อห, “โอว แฮะ ดัว อามีง ดี ดูอี อี โบง ฆาน โอว. โอว มืร แฮะ แดะ กาฌูะ เฆ ดา ซึก อี กยัะ อี ยัะ ดี โบง แตห น็อห รู โอว วี เบระ. เฆ อี มูห ดูอี อี โคย ดาคึย ดี โบง, แตห อึณ วี ลึห อาพูง ดังโคว โอว.

4 แตห เบ โทม อี ซีนัน ซีนืง แดง นอน, อี ปี ซีนัน ซีนืง ดอ ตัห กาฌูะ ดูอี กืน. แฮะ ปี ดูอี แบน มืง แบน มืง แฮะ ตัห กาฌูะ. เฌาพรา แฮะ ร็อห ดา ซึก อัน, บัร ดี กาโฆห.

5 ดูอี เฆ ตี เฆ ตัห นา กาโต็ง กาเซา. เฆ บอ ตัห โดง ซืด กาดาย. เฌาพรา มืร บยัะ ปี ปาย อัน ดี รู, แตห อัน วี โบง แตห กาดาย ลึร ชึม โตต.

6 แตห เบ กลึร แคง น็อห เบ บอ ยาม. โคว, อาคราว ดี โบง เฌาพรา ฌึร ตี, อึณ แฮะ กาตัด ดี ฌัม. เฌาพรา อี อึบ โตต ดอน โมยว, อัน ดี แตห กาดาย ลึร ชึม อาคัร หมาน.

7 ดูอี ดอน อี ดี บอ ดีหลัห อึณจัม. น็อห ยัะ เฆ ดี บอ หราย โตต ดอน อี.

8 เฆ ดี บอ โยว กาเซา บอ แบน ดูก ตาง แคง น็อห เฆ. อึณ ดี บอ ปี เซา อีบึณ อี ดี มึห ฆอน. เฆ ดี บอ คาหม็อง, วี ลาย ยอด ปี ปาย เฆ. นา เฆ มืร ดี เรณ ดีเรียง โกบ แฮะ โยว แฮะ ซาย เฆ.

9 แตห เบ บัร ดี ยอด, ซีแง ดี โบง เฌาพรา ตี, อึณ ดี บอ ตัห. ดอ อัน ตี อัน เฌา ดี โบง แตห อึณ กาเซา ดี อี, แตห อึณ โดบ แคะ แฮะ รู กาเซา อัน. อัน ดี โบง แตห มืง แดง กาดาย วี แบน ปี แปร กาฮ็อห. อัน ดี แตห เฆ ดูอี อี มึห หมาบ ยัม โตต ดอน อี.

10 ซีมัณ อี กอย แคง ฆางหราว บอ ซีมัณ อี ปี ราง แบน โมยว แบน โมยว, อาว ฮู ปึอน ยึร คอ อู โบ็ง. ซีแง มืร ดี อับ ว็อง ซีณ ดอ เลห อัน. มาเฆียน มืร อาว ฮู บลาง.

11 โอว ดี ดัม หมาบ ดี ดูอี แดง กาดาย นี. โอว ดี ดัม หมาบ ดี เฆ ดูอี อี ตู โดบ ดารา โกบ อี ตู หมึอม แปะ แฮะ โบง เฆ. โอว ดี แวน เฆ อี ปีคึก ปีจา เฆ, วี โบง แตห เฆ โจห เตียม.

12 วาย อัน ตี เฆ อี ซี ฆีด ซี กอย เฆ ดี เปรต กาเซา, เฆ วี มึห ดี ง็อห ดีคัน ตาง ปี ครีว แฌด. เฆ อาโมยว ดูอี ดี มึห ง็อห ตาง หลึอม ครีว อี ตัห แคง มืง โอวพี.

13 ซีแง ดี รู กาเซา โอว เฌาพรา อี อึบ โตต ดอน โมยว, โอว ดี บอ โบง แตห เบลณ เฆ ฆางหราว รัร ดียูห ดีเยณ. กาดาย มืร ดี บอ รัร ดียูห ดีเยณ บอ กาโทะ โดง กอย อัน.

14 เฆ ดูอี ดี บอ วี เตา ปี มาฌัะ โดว มา อี เตา ดี ดูอี แล แปร. เฆ ดี บอ เตา กาย็อห กาเรห ปี มาบู อี ตู มึห ดา กาณา อี เฮียง เฆ. ดอน อี ดี วี เตา เวณ มืง บรีม เฆ, ราง อาเซ ราง อัน.

15 ดูอี ปี กาตูณ รันซู ตี, เฆ ดี โลว คัม รันซู ซัด ยัม เฆ. ดูอี แปะ แฮะ ปึอน รันซู ดี เหมต, เฆ ดี บอ ยัม ดี มาปัวะ ลาง.

16 ฆอน ดีแตด เฆ มืร อี ดี บอ มัห ยัม ดี อาต เฆ. โกรวกราม แคง กาง เฆ, อี ดี บอ พาด ดึห โตต. บอ อีบึณ เฆ ดี บอ โลว คัม อี ลูต อี ลาย เฆ.

17 บัร เบ ยอด, โอว แฮะ กาซูห ดูอี อาโมยว มีดี, แตห เฆ ตัห กาโฆห ดี ดูอี อี กอย แคง มืง บาแบ. ดูอี เฆ ตี, เฆ ตู แตห รึอน แบน อี อาเร ตาง ดี เฆ. ครีว มืร เฆ ตู โลว.

18 เฆ ดี ดึห อัะ เฆ บอ บลา เฆ บัณ ดูอี หนึม แตห เฆ บอกาเฆลียด ยัม. ดูอี เฆ ตี เฆ มืร ตู มึห น็อห กาเว ฆอน งัะ ดีแตด. ฆอน ดีรอย มืร, เฆ ตู หลัยะ.

19 มืง บาแบ บอ มึห อาพูง ดังโคว ตาง หลึอม มืง อี เฮา. อาพูง ดังโคว ฌึร ตี, แฮะ แตห ดูอี อี กอย แคง มืง บาแบ, วี แบน น็อห เลห น็อห ตาง ดี เฆ. มาแล, โอว เฌาพรา ยี ดี ปยาต แวน เฆ, แตห อึณ ปี ดอ ปยาต แวน โอว มืง โซวโดม ฆาย มืง โฆวโมว ตึอน.

20 โดง ตี, อาว ฮู มึห อี กอย ดอ เหมา. บอ นา อาต ฮาว ดอน โจว ดอน บาน, อาว ฮู มึห อี กอย. เฆ ดูอี อาโมยว อาราบ อี แฮะ ดึอม ฮาว วีว ฮาว เวณ โดง ตี, เฆ มืร อาว ฮู กอย, อาว ฮู ซัม ทึบ เฆ ดอ เหมา. เฆ ดา อี เฮียง มาบู มืร เฆ อาว ฮู ตัห เฮียง ดี ตี.

21 อึณ ดี วี แบน โดง กอย เฆ มาโดว แปร ฮาย. แคง กาง เฆ ตี มาดีโบะ ดี บอ โบง กาฮูน อัน. มาซีม กาฮาต ดี บอ กอย ดี ตี. มาแป แปร ดี บอ แดน วีว แดน เวณ โดง แฮะ กาปยาต ลึร ตี.

22 มาโซว แปร เฆ มาโประ ดี บอ กอย โดง กอย โฮว จา บอ โดง กอย โฮว คูนดีคัม เฆ ตึอน. ซีแง ดี ลึร ชึม มืง บาแบ แฮะ กาตัด ดี ฌัม. อาคราว ดี โตต อาซาก มืง บาแบ อาว ฮู เหลณ.”