เฆ ดูอี อี แฮะ แดม อูน ดารา อี ตู หมาน อี นับ ดี คาหนาบ ดูอี ปี อึบ โอว, เฆ โลว คัม ดูก ตาง.

2 ดารา เฆ ตี, อึณ ดี บอ แคร ดูอี ฆีน ดูอี เอต, ตู แตห เฆ มึห ปวน มาเซ. ดูอี เฆ ตี, เฆ มืร ตู ซูงพยาด แตห อึณ การัม. เฆ บอ พาด ดึห โกรวกราม ยา ซีปรัห เฆ ฆอน อี ตู มึห ฆูณ.

3 “เบ อี โบง ฌึร ตี, เหมา เบ ดี ปาย เซ ฮี ฌัม ซีแง ดี ดัม เฌาพรา หมาบ ดี เบ, ปัน ดี ตัห อาเพ อาเร นา กาโต็ง, ตัห ปยาต เบ? เบ ทาง เบ ดี ลอด? เบ ดี เตา ฮาว นา เหมา, เหรต อี จอย เบ? บอ โกรวกราม เบ, เบ ดี ดึห ฮาว เครียง ดี เหมา?

4 เบ ยี ตู ลอด ดอ เหมา. เบ ดี โลว คัม อี เหมต คร็อง เบ แคง กาปึม โดบ อี เฮา. เซ ดา ซึก ง็อห ยัม อี เฮา, อึณ บอ บาะ บอ เบ. ปี บอ แฮะ ปาย ตี มืร, น็อห รู เฌาพรา ยี ตู หราย, อัน เฌา ยี ซี แนะ ดัม หมาบ ดี เบ.” แคะ ตี อาอีซายัะ แฮะ กาลาง.

5 เฌาพรา วี ต็อห, “อึย เบ ดูอี อาซูรียา, เบ ปี อึณกรวน บอ มัง มัห โอว. โอว ดี แตห เบ มัห ดูอี อี แฮะ โบง แตห โอว รู กาเซา.

6 โอว ดี จัร ดูอี อาซูรียา ฮาว โดง กอย เฆ ดูอี อี ตู โรวเซ เฌาพรา, แตห เฆ กาโฆห ดี ดูอี อี ตู โดบ ดารา, อี แฮะ โบง แตห โอว รู กาเซา. โอว ดี แตห เบ พาด ดึห โตต โกรวกราม เฆ, แตห เบ อึบ ดูอี เฆ ตี บอกาเฆลียด, แตห อึณ ปี ดูอี แณต โณะ โดบ อึณเตณ.

7 มาแล, คูนดีคัม อี อึบ มืง อาซูรียา ตู วี ทาง อึณ มูห โอว เฌาพรา อี แฮะ จัร อัน. อัน มึห ปี คราม แคง น็อห อัน ราง อัน. อัน วี คราม ดี ปยาต ดูอี แบน โมยว แบน โมยว.

8 อัน ดี บอ ปีพูง อัน ต็อห, ‘อามู อามาด โอว ดอน อี, เฆ ดี แบน โตต คูนดีคัม.

9 โอว ดี บอ กาโฆห ปึอน มืง กาลานอ ปี ดอ แฮะ ปึอน โอว มืง คาเซมีด. มืง ฮามาด, อึณ ดี บอ ปี มืง อาราพาด. มืง ซามารี ดี บอ ปี มืง ดามาคู.

10 โอว แฮะ ปยาต มาน มืง อี มึห อารึบ ราง อี มยาด หลึอม อารึบ ราง อี กอย แคง มืง เยรูซาแลม ฆาย มืง ซามารี.

11 โอว มืร ดี ปยาต มืง ซามารี บอ อารึบ ราง อี กอย แคง มืง ตี. ปาย ตี โอว ปี ดี วี ปยาต แวน บอ มืง เยรูซาแลม บอ อารึบ ราง อี กอย แคง มืง ตี.’” แคะ ตี เฌาพรา แฮะ ต็อห ลอง คูนดีคัม อาซูรียา.

12 มาแล, เฌาพรา วี กาลาง ลอง ปัน แฮะ ฮอต โบง อัน แคะ ปี ซี โบง อัน ดี นอน ฌีโอน ฆาย มืง เยรูซาแลม. อัน ปี วี ต็อห, “โอว ดี วี ดัม หมาบ ดี คูนดีคัม อาซูรียา.”

13 โคว, เฌาพรา ต็อห, “ปวน โอว ปึอน โบง ปาย ตี โอว จัร อึณเตณ นับ โอว, จัร อึณเตณ กยัะ โอว. โอว แฮะ ปยาต แวน โตต กาอูน กาดาย อี กาคัน โดง กอย เฆ ดูอี. โอว แฮะ พาด ดึห โตต โกรวกราม ปี อูน เฆ. โปลม โอว แฮะ ปี โปลม มัก ดีโซว, อึณ แฮะ แตห เฆ ดูอี อี กอย แดง มาลาง โจห โลง, ชึม โตต. โอว ดี แณต ดูอี เฆ ตี บอกาเฆลียด.

14 โกรวกราม เฆ ดูอี แดง กาดาย อี มึห ดีง็อห ดีคัน, อึณ ปี กาฮูน มาซีม. โอว มืร แฮะ แฆบ กาฌูะ โตต ดี โอว. โอว แฮะ ปึอน ดึห หงึย หงึย แคะ มึห โกรวกราม แดง กาดาย ปี ดูอี อี ปรา ปึอน มาซีม. อาว มึห อาเซ อี ยัะ แคร โอว, กาโบยว โอว.” เฌาพรา ปี บอ แฮะ ต็อห ปาย ตี มืร, 15 “เบ ทาง มึย ดี บอ ปึอน ต็อห, อัน ตาง หลึอม ดา กาณา อี จัร อัน? เบ ทาง เลกลึร ดี บอ บอด บอ คึกคัม หลึอม ดูอี อี ปา อี กาซัวะ อัน? บอ อึณกรวน ตู นับ ดี โฆ็ง ดูอี. มัง มัห มืร ตู นับ ดี มัห อี โฆ็ง อัน.

16 โกบ คูนดีคัม ปีพูง อัน ปาย ตี เฌาพรา อี อึบ โตต ดอน โมยว, อัน ดี บอ ดึห เซา รอฆา ฮับ ดี เฆ ดา ซึก คูนดีคัม อี มึห โปลม มึห แฮณ. บอ อาพูง ดังโคว อัน ดี หราย ปี ดูอี แฮะ เบลห เงา นา ครึม แตห อึณ กาซึม.

17 เฌาพรา อี ปี บลาง ดี เฆ ดูอี อีซาเรลัะ, อัน ดี แบน ปี เงา. เฌาพรา อี ซีงา บอด อี มูห เฌาพรา ปี กรึบ เฆ ดูอี อีซาเรลัะ, อัน ดี บอ แบน ปี แปละ เงา. อัน เฌา ดี แตห อึณ กาซึม บอ ยวน มาอาต บอ เปต เฆ แปร แตห อึณ กาซึม โตต กานัร อู ซีแง.

18 บอ นัง เฮ อี มึห ซาเร ตาง บอ มาน เฆ โดง นา อี บอด กาเซา ดี บอ ลึร ชึม โตต ปี ดูอี อี มึห เซา รอฆา อี แตห อัน ลึร ชึม.

19 นัง เฮ อี ซี ฆืด ซี กอย วาย อัน ตี ดี บอ เปรต กาเซา. ฆอน ดีรอย มืร ดี บอ แป ดี ตีห บอ แดม อูน ลอง อัน.” แคะ ตี แปะ แฮะ กาลาง เฌาพรา.

20 วาย อัน ตี เฌาพรา ปี วี ต็อห, “อาคราว ดอ อัน ตี เฆ ดูอี อีซาเรลัะ อี ซี ฆีด บอ อาโมยว อาโกบ อี ลอด อาเพ อาเร, เฆ ตู วี โทม โฆรห ดูอี อี แฮะ ดึอม คาหนาบ เฆ. เฆ ดี วี บึง อาคัร หมาน เฌาพรา อี ซีงา บอด อี อึบ ดูอี อีซาเรลัะ.

21 เฆ ดูอี อีซาเรลัะ อี ซี ฆีด ตี, เฆ ดี วี ตัห บึง เฌาพรา อี มึห อาพูง ดังโคว ตาง.

22 ดอ ตี นี, เฆ ดูอี อีซาเรลัะ ปี บอ แฮะ กืน กอ ปี กาฮาต อี กอย โคบ อึม นัมมูกซารา มืร, อึณ ยี ดี ฆีด มี มัง อี อี ดี วี ตัห. เฆ ดูอี บอกาเฆลียด ดี โลว คัม อี แตห เฆ ลึร ชึม. เฆ ดี โลว คัม แคะ กาอาบ เฆ คัม.

23 ปาย ตี เฌาพรา อี อึบ โตต ดอน โมยว, อัน ดี บอ ปยาต แวน โตต บอ เรา บอ มืง, แตห อึณ โดบ ปี ต็อห อัน ดี โบง.”

24 เฌาพรา อี อึบ โตต ดอน โมยว, อัน วี ต็อห, “อึย เบ ดูอี ปี อึบ โอว อี กอย แคง มืง ฌีโอน, เฆ ดูอี อาซูรียา ปี บอ แฮะ คาหนาบ เบ ปี เฆ แฮะ คาหนาบ ดูอี แคง มืง แอฆึบ มืร, แกวะ แตห เบ โยว.

25 อาว ฮู บอ เหลณ, น็อห รู บอ น็อห จาว โอว ดี เบ, อึณ ดี โตต. โอว ยี ดี วี โบง แตห เฆ ดูอี อาซูรียา วี ลึร ชึม.

26 เฌาพรา อี อึบ โตต ดอน โมยว, อัน ดี ดึห อึณเพียะ มัห เฆ, แตห อึณ ปี ดอ มัห อัน ดูอี มีดีอาน ดอ กอย เฆ โคบ ดาอาง มาว อี จืร ออราพัะ ตึอน. อัน ดี ดัม หมาบ ดี เฆ ดูอี อาซูรียา, แตห อึณ ปี ดอ ดัม อัน หมาบ ดี เฆ ดูอี แคง มืง แอฆึบ ตึอน.

27 ดอ อัน ตี โกรว จัน ปี ฆอด เบ, อาว ฮู มึห. บอ มัง ฆอด เบ ดี กาบัก ลึร. อึณ ดี กาบัก ลึร โกบ แฮะ วี โปลม คัะ เบ.” แคะ ตี เฌาพรา แฮะ กาลาง.

28 ปัน ดี ตัห กาโฆห รันซู อึณ ดี ปาย นี. รันซู เบ ดี บอ กาโฆห ปึอน มืง อายาด. เฆ ดี บอ วี กาโลห ฌัม มืง มีโครน. ปี วี คยัะ อูน โกรวกราม เฆ ดี มืง มีกมาด.

29 เฆ ดี ตัห โดบ อึณเตณ อี ฮาว ดี กาแต นอน, วี ตัห คยัะ ดี มืง ฆีบา อาดา อู หมึร. แฮะ ฮอต, เฆ ดูอี แคง มืง รามา บอกาเฆลียด ดี บอ โยว ดียูห ดีเยณ. ดูอี แคง มืง ฆีบียา อี มูห มืง โดง กอย คูนดีคัม อาซอลู ตึอน, เฆ ดี บอ วี เตา.

30 อึย เบ ดูอี อี กอย แคง มืง กาลีม, แตห เบ ดัด ตาง ตาง. เบ ดูอี อี กอย แคง มืง เลซา, แตห เบ โทม. เบ ดูอี อี กอย แคง มืง อานาโทด, แตห เบ เวียะ โฆรห เฆ ตี.

31 เฆ ดูอี อี กอย แคง มืง มาตาแมนา ดี บอ เตา เฆ. เฆ ดูอี แคง มืง เฆบีม ดี บอ เหรต โดง ดี เตา ฮาว เฆ, แตห เฆ ลอด ยัม.

32 ซีแง ตี, แคะ กอย รันซู บอกาเฆลียด ดี ฆืด โตต ดี มืง โนวบัะ. เฆ ดี บอ ตา กาลึม เฆ หงา ดี ดูอี อี กอย แดง นอน ฌีโอน อี มูห นอน มืง เยรูซาแลม.

33 เฌาพรา อี อึบ โตต ดอน โมยว, อัน ยี ดี โบง แตห รันซู เฆ ตี ลึร ชึม, แตห อึณ ปี อี แดบ โจห รา เฮ อี ตาง กาเซา. กาแต ดูอี เฆ ตี, วี เหมา อี กยัะ, วี เหมา อี ตาง หลึอม อี เฮา, อัน ดี วี โจห เตียม ปี อี ฆัร เกห เฮ ตาง.

34 เฮ อี บอด อี หมึอม อี กอย แคง แปร, เฌาพรา ดี บอ ฆัร แวน ตา มึย. เฮ ตาง อี กอย ดี นอน เลบานูน, อัน เฌา อี มึห ปวน ตาง กาเซา ดี บอ ฆัร แตห อึณ เกห.