1 อาอีซายัะ ปี วี ต็อห, “มาแล, เฆ ดูอี อี แฮะ ฮอต คัม ดูก ตี, เฆ อาว ฮู โลว กอย แคง อับ ว็อง ฌึร ตี. อัน เฌา แฮะ โบง แตห กาดาย มืง เฌบูโลน บอ กาดาย มืง นาบทาลี โจห เตียม. วาย อัน ตี อัน เฌา ดี วี โบง แตห อืง ฆาลีเล วี มึห ซาเร. อึณ บอ กอย โคบ อึณเตณ อี ฌัม โดง กอย อึม ตาง บอ ดี โคบ แบลง อึม ยอดาน. อืง ฆาลีเล ตี บอ มูห โดง กอย ดูอี อาโมยว เฮา.

2 เฌาพรา แฮะ แตห โอว ยึร อี ดี ปาย นา อาต. โอว ยึร เฆ ดูอี อี กอย แคง อับ ว็อง. เฆ แฮะ วี ยึร บลาง อี ตาง กาเซา. บลาง ตี แฮะ ทอง เฆ ดูอี อี กอย แคง อี อับ ว็อง ดีตีณ ตึอน.

3 เฌาพรา แฮะ วี แตห เฆ ดูอี อีซาเรลัะ แบร กืน กาเซา, แตห เฆ โบยว ดาคึย กาเซา. เฆ แฮะ โคย ดี อาต อัน เฌา กอ ปี ดอ แฮะ ดาคึย อี ดอ มูห อาคราว แฮะ ฮอต โซะ, แฮะ ฮอต มัห เฆ โหงว. อึณ บอ ปี ดอ แฮะ โบยว ดาคึย ดา ซึก ดอ ลาย กาซาง เฆ โกรวกราม แปะ แฮะ พาด ตัห เฆ.

4 โคว, อึณ ปี แม เฌา แฮะ กาบัก แวน มัง ฆอด เฆ, บอ แอะเมา อี ชึบ ดี ยัะ เฆ. แม แฮะ ดึห แวน บอ อึณเพียะ เฆ ดูอี อี คาหนาบ เฆ. แม เฌา แฮะ โบง ปาย ตี แตห อึณ ปี ดอ แฮะ กาโฆห ออง แม เฌา เฆ ดูอี แคง มืง มีดีอาน ตึอน.

5 คูดีณ ปี ชึบ ดา ซึก ดอ กาโฆห เฆ ดี อี บอ ครึง ตา เฆ อี แฮะ แบ หนาม, บอกาเฆลียด ดี กาซึม โตต แคง เงา.

6 โคว, แฮะ มึห ฆอน ดีแตด อี แฮะ ฆึอด ตัห, แตห อัน จอย เอ. อึณ มูห ฆอน อีมาย แปะ แฮะ ดัว เฌาพรา ดี เอ. ฆอน ตี, อัน ดี แบน ดา กาณา ตาง อี อึบ เอ. อัน ดี บอ จืร อี ดัว อากยาม อางยาน อี หมึอม อาม. อัน บอ มูห เฌาพรา อี มึห ปวน ตาง บอ ฆูณ เอ อี กอย เซเซ บอ อี นับ ดี ดัว น็อห เฆียด เยน.

7 อาพูง ดังโคว อัน, อึณ ดี บอ แกร ดี ตาง กาเซา. มาน มืง ปี ดี อึบ อัน, อึณ ดี บอ ดาคึย ฆัด เฆียด เซเซ. อาคราว ปี อึบ อัน ตู โตต ดอ เหมา. อัน ดี บอ อึบ มืง ปี ดึอม อึบ คูนดีคัม อาดาวีด. อัน ดี แตห มืง ตี กอย มัน ซีคยา โกบ โบง อัน นา ซืร นา หมาน บอ ซูงพยาด โดบ ดารา. อัน ดี โบง ปาย ตี ซีณ ดอ ตี นี กอ ฌัม นา อาต ฮาว ดอน โจว ดอน บาน. อึณ มูห เฌาพรา อี อึบ โตต ดอน โมยว, อัน แฮะ ดีงัณ ดี โบง แตห อึณ กอ ฮอต โตต ดอน โมยว.”

8 วาย อัน ตี, อาอีซายัะ ปี วี กาลาง ฮาว ต็อห, “เฌาพรา แฮะ ตึย โฆรห อี ดัม ซาดีก ดี เฆ ดูอี อีซาเรลัะ บอกาเฆลียด อี มูห ครึร อาโกบ. อึณ ดี บอ แบน แคะ ปี กาลาง อัน.

9 เฆ ดูอี อีซาเรลัะ บอกาเฆลียด, เฆ อี กอย แคง มืง อาเอพารีม บอ เฆ อี กอย แคง มืง ซามารี ดี บอ นับ ลอง ปี ดี โบง อัน เฌา ตี. เฆ แฮะ วี ปีจา เฆ บอ มึห น็อห ปีคึก. เฆ บอ กาลาง ต็อห,

10 ‘แรง มาว มาอูด ตาง ปี บอ แฮะ เกห มืร, เย ดี วี โฆว ตา มาว แปะ แฮะ ด็อห อี. เฮ เบล ดีปู ปี บอ แฮะ ฆัร เกห โตต มืร, เย ดี วี ดึห เฮ อารีด วี ซัม ปลูะ.’

11 มาแล, เฌาพรา แฮะ จอย เฆ รันซู คูนดีคัม อาเรซีน ตึอน, แตห เฆ แบน น็อห ซี ตัห กาโฆห ดี มืง อาราม ปี อึบ คูนดีคัม อาเรซีน. อัน เฌา มืร แฮะ กาซูห รันซู เฆ ตี.

12 เฆ ดูอี อาราม อี ตัห นา เลห ซีแง บอ ดูอี พีลีที อี ตัห นา เฆต ซีแง ดี บอ แป เฆ ดูอี อีซาเรลัะ. อึณ ปี เฆ แฮะ อาง โมต เฆ, แมง บลึอบ เฆ บอกาเฆลียด. ปี บอ แฮะ ปาย ตี มืร, น็อห รู เฌาพรา ยี ตู เยน. อึณ ปี อัน ยี ซี โซ็ง แด อัน, แตห อัน มัห เฆ ปอ อึณปัว.

13 เฆ ดูอี อีซาเรลัะ ยี ตู โหลห หมาบ เฆ, ตู โหลห เฌาพรา อี แฮะ แตห เฆ คัม ดูก ตี. เฌาพรา อี อึบ โตต ดอน โมยว ปี บอ แฮะ ดัม หมาบ ดี เฆ มืร, เฆ ตู บยอง น็อห เฆ, แตห เฆ วี โดบ เฌาพรา.

14 โกบ อึณ ปาย ตี เฌาพรา ดี แวน เฆ ดูอี อี ปี ฆีณ เฆ ซีดา แคง มืง อีซาเรลัะ. อึณ บอ ปี อัน ดี แดบ แวน บอ รา เฮ จึก บอ โฆล็ง อี กอย แคง มืง อีซาเรลัะ, แตห อึณ กอ โตต อู ซีแง.

15 เฆ ดา ตาง แคง มืง บอ เฆ ดูอี กัด ดูอี แฆ, เฆ ปี ฆีณ เฆ. เฆ ดูอี อี กาโลว ดี บยาน โฆรห เฌาพรา, เฆ บอ ปี ซีดา เฆ ดูอี อีซาเรลัะ.

16 เฆ ดา ตาง อี แฮะ แยต ดูอี กืน, เฆ แฮะ แยต แตห ดูอี กาลึบ. บอ ดูอี ปี แยต เฆ ตี, เฆ แฮะ ลึร ชึม โตต.

17 โกบ อึณ ปาย ตี เฌาพรา ตู กาเว ดูอี หนึม คอ อู วี. อัน เฌา มืร ตู มึห น็อห กาเว เฆ ยา ซีปรัห บอ ฆอน ซีปรัห. โคว, แคะ กอย ดูอี บอกาเฆลียด, อาว ฮู นับ ดารา เฌาพรา. เฆ แฮะ ฮาย กาเซา. เฆ ดอน อี บอ กาลาง มี โฆรห กาโลว บอ โฆรห ตู หมาน ดีโลย. โกบ ปาย ตี อึณ ตู แตห น็อห รู เฌาพรา เยน. อึณ ปี อัน ยี ซี โซ็ง แด อัน, แตห อัน มัห เฆ ปอ อึณปัว.

18 อี ฮาย อี มืก ปี โบง ดูอี เฆ ตี, อึณ บอ ปี เงา อี กาซึม เดา มาอาต บอ ยวน เฆ แปร. อึณ บอ กูห ปี เงา กาซึม แปร, แตห ดัก เงา กอ เฮต กาเซา.

19 อึณ ยี มูห เฌาพรา อี อึบ โตต ดอน โมยว, อัน แฮะ รู กาเซา. อัน เฌา ดี แตห เงา กาซึม โตต มืง เฆ, แตห ดูอี บอกาเฆลียด ชึม. อาว มึห อาเซ อี ปึอน จอย บีนอง วอแว อัน.

20 เฆ ดี บอ เหรต ปี ดี โฮม, บอ ฮาว อู โปละ, ปึอน ดี บาว โฮม แคะ ปึอน เฆ อี แจก. อึณ ยี ตู แตห เฆ แพ. เฆ ปี วี ฮาว ปอ อู บลาก, ปี วี ปึอน ดี โฮม อี แจก, กาปราณ เฆ ยี ตู หราย. เฆ ดี บอ วี โฮม ยัง ฆอน เฆ.

21 ดูอี อามานาเซ ดี บอ กาโฆห ดี ดูอี อาเอพารีม. เฆ บอ อา โมยว ปี ดี วี ลาย โพรม, วี กาโฆห ดี ดูอี อายูดา. ปี บอ แฮะ ปาย ตี มืร, น็อห รู เฌาพรา ยี ตู เยน. อึณ ปี อัน ซี โซ็ง แด อัน, แตห อัน มัห เฆ ปอ อึณปัว.”