1 เฌาพรา วี กาลาง ดี โอว ต็อห, “แตห แม ดึห ตัห แบน ตาง อู ดีพลัะ, แดม นา แดง, แตห อึณ ลึห ซีคยา ดี อี. ปี โลว แดม แม ตี, แตห อึณ ต็อห, ‘มาเฮ ซาลา ฮาซาบาด.’” (อึณ บอ มูห จืร ดูอี อี เลห “พาด ดึห แฮ แฮ, ปยาต แวน ครัน ครัน.”) 2 เฌาพรา ต็อห, “แตห แม บอ วี แดะ ดา อี หลู ดี เฌาพรา อี จืร อาอูรียา บอ อาซาคารา อี มูห ฆอน อาเบนราคี, แตห ฆาย ยึร ปี โบง แม, แตห ฆาย แบน ซักเซ อี นับ ดี วี กาลาง ลอง อัน ตี ดี อี.”

3 วาย อัน ตี โอว บอ วี ฮาว กอย โดบ ยา อี บยาน โฆรห เฌาพรา อี มูห อีบึณ โอว. อัน บอ วี แด บาดีก ซันเท บอ มึห ฆอน อีมาย. เฌาพรา บอ วี ต็อห ดี โอว, “แตห แม แตห ฆอน แม ตี จืร มาเฮ ซาลา ฮาซาบาด. 4 โคว, อาต นับ ฆอน แม ดี ต็อห, “ฆูณ ฆาย มา” คูนดีคัม อี อึบ มืง อาซูรียา ดี บอ พาด ดึห ฮาว โตต แคะ กอย โกรวกราม อี กอย แคง มืง ดามาคู บอ แคะ ปี ปึอน ดึห ตัห เฆ แคง มืง ซามารี ตึอน.

5 เฌาพรา ปี วี กาลาง ดี โอว ปอ อู จึบ ต็อห,

6 “ดูอี เฆ นี แฮะ แวน โอว. อึณ ปี เฆ ตู ดึห อึม แบลง ซีลอง อี แหล ฮาว หนีม หนีม. เฆ มืร แฮะ โบยว ดี โดบ คูนดีคัม อาเรซีน บอ คูนดีคัม อี มูห ฆอน อาเรมาลี ตึอน.

7 โคว อัน ตี, โอว ดี แตห คูนดีคัม อี อึบ มืง อาซูรียา ตัห. อัน ดี แดะ กาฌูะ โตต แคะ กอย ดา ซึก อัน บอกาเฆลียด, แตห อี ยึร แคะ ตาง อาพูง ดังโคว อัน. โอว ดี แตห เฆ ตัห กาโฆห บอ แป ดูอี แคง มืง ยูดา นี. เฆ ดี บอ ปี อึม ตาง อี มูห แบลง อึม อูพาราด อี แฮะ อึณปูน โตต บอ ดีลัยะ. อึณ ดี อึณปูน บอ บาง อัน ดอน โปละ.

8 อึณ ปี อึม ตี ดี บอ ตัห ฌัม แคง มืง ยูดา บอ ฌูห บอ แฌว กาเซา, อัน ดี อึณปูน มืง บอ มืง, แตห อึณ กอ บีน ฌัม แมง เฆ. ดา ซึก เฆ ตี บอ ปี มาซีม ตาง อี แฮะ บลัห เพียง อัน อี ปึอน ปลึก มืง ยูดา บอ มืง.” โกบ อึณ ปาย ตี แตห อามานูเอน จอย เย.

9 อึย เบ ดูอี อี กอย แคง มืง แบน มืง, แตห เบ โบง ฮาว อี ตู หมึอม, แตห อึณ แตห เบ กาปยาต ลึร. อึย เบ อี กอย มืง โต็ง, แตห เบ โทม, แตห แบ แรน โดว เบ, บัร ดี กาโฆห, แตห อึณ แตห เบ กาปยาต ลึร. แตห เบ บอ แรน โดว เบ บอ กาปยาต ลึร.

10 แตห เบ ลาย กามวน ซังคยาง แคะ ปี นับ เบ. มาแล, อากยาม อางยาน เบ ยี ดี ลึร โตต. แตห เบ กาลาง โฆรห แคะ ปี ซี กาลาง เบ. มาแล, อึณ ยี ตู มึห ดีโคว มาเซ. โคว, เฌาพรา กอย รึม โดบ เย.

11 ดอ วี กาลาง เฌาพรา โฆรห อัน ดี โอว, อึณ ปี อัน แฮะ ปา โอว ตา แด อัน อี มึห โปลม ตาง. อัน ดัม ซาดีก ดี โอว, แกวะ แตห เย โดบ เฆ ดูอี เฮา แคง มืง เฆ ตึอน. อัน ต็อห,

12 “เซ อี เฮา พยาก เบ, ต็อห เบ แฮะ คราม ดี ปรา ดี โบง นา ตู หมึอม, แกวะ แตห อึณ ดึร น็อห เบ. เบ แกวะ โยว ปี โยว เฆ.

13 แตห เบ โหลห แล, โอว มูห เฌาพรา อี อึบ โตต ดอน โมยว. โอว บอ มูห บอ เฌาพรา อี ซีงา บอด บอ มูห เฌาพรา ปี โลว โยว, โลว โรวเซ เบ.

14 โอว ดี กอย รึม โดบ เบ, แตห เบ มึห โดง ซีงา บอด กาแต เบ. แคง ดูอี อีซาเรลัะ อี กอย บอ อา มืง โอว บอ ปี มาว อี แตห ดูอี ตัห กาฟัห เกห. แคง มืง เยรูซาแลม โอว บอ ปี บอ ยอต เฆ คืม อี ดี เหมต เฆ.

15 ดูอี กืน ดี บอ ตัห กาฟัห เกห. เฆ ดี บอ กาปยาต ลึร. เฆ ดี บอ ตัห เคร ยอต บอ คัม อี เฮา เหมต เฆ.”

16 เฌาพรา แฮะ ฮอต กาลาง ปาย ตี อาอีซายัะ วี ต็อห. “อึย เบ อี มูห ดีแบ โอว, แตห เบ กาบัน อูน ซีคยา แปะ แฮะ แดม อูน โอว โฆรห ปี กาลาง เฌาพรา ดี โอว. แตห เบ ดีแบ โอว กาบีด ซีคยา บับ ตี, ดอก ฌึม, แกวะ แตห อึณ โบยห.

17 โอว ดี บอ บัร ดี ยอด เฌาพรา อี แฮะ เบลห อูน ดูอี อี มูห ครึร อาโกบ. โอว ดี บอ หน็อะ อึณด็อะ บอ บึง อัน เฌา.

18 แตห เบ ยอด บอ โอว บอ ฆอน ปี อาบ เฌาพรา ดี โอว. เฌาพรา อี อึบ โตต ดอน โมยว, อี กอย แดง นอน ฌีโอน ตึอน, อัน แฮะ แตห เย แบน ลักซานา อี บยัะ อี หมึอม อาม ปี ดี โบง อัน ดี เฆ ดูอี อีซาเรลัะ.

19 แกวะ แตห เบ โทม เซ อึณ มึห ดูอี อี กาลาง ดี เบ, แตห เบ ฮาว ดีหมอด ดูอี มึห เปร บอ ดูอี อี แดะ กานัม, อี นับ ดี พูพีบ พูพาบ บอ กาลาง โฆรห อี ตู ลึห บรี. เบ โลว วี ต็อห, “อาโมยว ดูอี แฮะ กาอาบ ดี บึง เฌาพรา บอ ดีหมอด อัน เฌา อี มูห เฌาพรา ปี กรึบ เฆ. อาว กาอาบ ดูอี อีม วี ฮาว บึง กาเปรา ดูอี ยัม.” 20 เบ ยี โลว โดบ ดารา แปะ แฮะ มาโนว เฌาพรา ดี เบ. เซ เฆ ตู กาลาง โฆรห ตี, อึณ ตู แตห เฆ ยึร บลาง ซีณวัห. 21 ดูอี เฆ ตี ดี บอ ฮาว วีว ฮาว เวณ. เฆ ตู ดาคึย แคง น็อห บอ เอต ปี ดี โฮม. ปี กาปราณ เฆ ปี ดี โฮม, อึณ แตห เฆ รู กาเซา. เฆ ดี บอ ซากึห ยอด นา แดง, บอ เอห คูนดีคัม อี อึบ เฆ บอ เฌาพรา ปี กรึบ เฆ. 22 เฆ ปี ดี วี มูด ยอด บอ แดง กาดาย, เฆ ดี บอ ยึร มี อี อับ ว็อง ดีตีณ บอ ดูก อี หมึอม โยว กาเซา. ปาย ตี เฆ ดี โจห แคง อับ ว็อง อี ตู แตห เฆ ยึร มาเซ.