1 ดอ มูห โจว บาน คูนดีคัม อาคาด อี มูห ฆอน อาโยวทาม บอ หลาน อาอูฌียา อี แฮะ แบน คูนดีคัม อี อึบ มืง ยูดา, อึณ บอ มึห รันซู อี ตัห ฌัม ดี มืง เยรูซาแลม. อึณ มูห อาเรซีน อี มูห คูนดีคัม แคง มืง อาราม บอ คูนดีคัม อาเบคา อี มูห ฆอน คูนดีคัม อาเรมาลี อี อึบ มืง อีซาเรลัะ. ฆาย แฮะ ตัห กาโฆห ดี มืง เยรูซาแลม, ยี ตู แป เฆ.

2 คูนดีคัม อี อึบ มืง ยูดา บอ ยึร ลอง คูนดีคัม อี อึบ มืง อาราม ฆาย คูนดีคัม อี อึบ มืง อีซาเรลัะ แฮะ กาโพรม ดี ตัห กาโฆห ดี มืง ยูดา. อึณ แตห บอ อัน บอ เฆ ดูอี อัน บอกาเฆลียด บอ โยว ดียูห ดีเยณ. อึณ ปี เฮ เฆ แปร ดียูห ดีเยณ ดอ ตัห บูด คูน.

3 ดอ อัน ตี เฌาพรา วี กาลาง ดี อาอีซายัะ ต็อห, “แตห แม แดะ บอ ฆอน แม อี จืร อาซาพาโซบ, แตห บาย ฮาว กาตูณ คูนดีคัม อาคาด. บาย ดี ฮาว กาตูณ อัน โดบ อึณเตณ อี ฌัม โดง ลัห เฆ ครึง อี กอย บาง อึม ดึง นา กัว. อึณ บอ มูห โดง อี กอย กาตัด ดี โมต โรง อึม ตึอน. 4 แตห แม กาลาง ดี อัน ต็อห, ‘แตห แม ซาดีก บอ กอย หนีม หนีม. แกวะ แตห แม โยว, แกวะ แตห แม กาจัว วี แบน น็อห ดีแตด ดี แม โกบ น็อห รู คูนดีคัม อาเรซีน บอ เฆ ดูอี อาราม, บอ โกบ น็อห รู คูนดีคัม อี มูห ฆอน อาเรมาลี ตี. เฆ ปี มาซีบลาว อี แฮะ รีน ดี ยัด. 5 เฆ ดูอี อาราม บอ เฆ ดูอี อีซาเรลัะ บอ คูนดีคัม เฆ แฮะ คราม ดี แตห แม ชึม.’ 6 เฆ แฮะ ต็อห, ‘แตห เอ ฮาว ลึบ แคง มืง ยูดา, แตห เอ ฮาว กาย็อห มืง ตี แบน โปละ แบน โปละ, แตห เอ วี กาซาง ดี เอ. แฮะ ฮอต, แตห เอ วี ดาง ฆอน อาตาบีลา, แตห อัน วี แบน คูนดีคัม อี อึบ มืง เยรูซาแลม.’ ”

7 มาแล, เฌาพรา ปี วี ต็อห ปาย นี, “ลอง อัน ตี อึณ ตู แบน ดอ เหมา. ปี คราม เฆ ตี, เฆ ตู ปึอน โบง.

8 โคว, ดูอี แคง มืง ตาง อี มูห มืง อาราม, เฆ มึห มี โปลม เฆ แฮณ แคะ ปี มึห เฆ ดูอี อี กอย แคง มืง ดามาคู. ปาย ตี บอ ดูอี แคง มืง ดามาคู เฆ มึห โปลม แคะ ปี มึห คูนดีคัม อาเรซีน. อี มูห เฆ ดูอี อีซาเรลัะ, อาต โนะ เดา ฆึร ดี พัน ซีนัม, เฆ ดี บอ กาย็อห กาเรห, อาว ฮู แบน เรา แบน มืง.

9 เฆ ดูอี แคง มืง อีซาเรลัะ บอ มืง มืร เฆ ตู มึห โปลม เฆ แฮณ หลึอม เฆ ดูอี แคง มืง ซามารี. บอ ดูอี แคง มืง ซามารี มืร เฆ มึห โปลม เฆ แฮณ แคะ ปี มึห ฆอน อาเรมาลี ตึอน. โคว, เซ เบ ตู หณึม ซีคยา, เบ ดี บอ ชึม, อาว ปึอน กอย เหลณ.”

10 วาย อัน ตี เฌาพรา ปี วี กาลาง ดี คูนดีคัม อาคาด ต็อห, 11 “แตห แม หมาณ ดี โอว อี มูห เฌาพรา ปี กรึบ แม, แตห โอว โบง อู โมยว อี ดี จอย แตห แม หณึม โอว. อึณ บอ มูห ปี โบง โอว แคง โดง ลึก กาเซา กอ ฌัม แคง มืง มารานัะ. เซ อาว ปาย ตี, อึณ บอ มูห ปี โบง โอว โดง จา กาเซา กอ ฌัม แคง ฆางหราว, แตห แม หมาณ.”

12 คูนดีคัม อาคาด วี ต็อห, “โอว ตู ซี หมาณ ลักซานา มาเซ ดี เฌาพรา. โอว ตู ซี เทว เฌาพรา โยว อึณ ดี แบน ตู แบน ปี ต็อห อัน.”

13 อาอีซายัะ วี ต็อห, “อึย เบ ครึร คูนดีคัม อาดาวีด แตห เบ บอกาเฆลียด โทม. เบ แฮะ ออน ดี โบง แตห ดูอี กอ ฌาน กอ ปึร เบ, อึณ หณัม เบระ ดี น็อห เบ. เบ ปี วี โบง แตห บอ เฌาพรา อี มูห เฌาพรา ปี กรึบ โอว กอ ฌาน กอ ปึร เบ. 14 โคว, อัน เฌา ยี ดี บยัะ ดี เบ ปี ดี โบง อัน. อึณ ดี มึห ดีบยา อู วี, อัน ดี แด บาดีก ซันเท. อัน ดี มึห ฆอน อีมาย. เฆ ดี บอ แตห อัน จืร อามานูเอน. 15 ปัน ดี นับ อัน ดี ร็อห อี หมึอม บอ แวน อี ตู หมึอม, อัน ดี โฮม มี อึม ปู มัก อี ปราง โฆระ บอ งาม มาเพียน. 16 อึณ ยี มูห อาต นับ อัน ดี ร็อห อี หมึอม บอ แวน อี ตู หมึอม, มืง คูนดีคัม อา กาดัง ปี โยว เบ ดอ ตี นี, เฆ ดี แบน มืง อี กาปยาต ลึร, มืง ปี แวน อี. 17 เฌาพรา ดี แตห เบ คัม ดูก ตาง, แตห อึณ หลึอม ดูก ปี ดึอม กาดูห เบ ดอ กาฆ็อห เฆ ดูอี อีซาเรลัะ ดี ดูอี อายูดา. เบ ดี คัม ดูก ตาง ดี คูนดีคัม อี อึบ มืง อาซูรา. บอ แม, บอ ดูอี ปี อึบ แม, บอ ดูอี แคง อึณโฮม แม, เบ บอกาเฆลียด โลว คัม ดูก ตี.

18 ดอ อัน ตี เฌาพรา ดี กาโฮต แดะ เฆ ดูอี แอฆึบ ตัห. เฆ ดี ปี มารอย อี ตัห ดี แบลง อึม แคง มืง แอฆึบ. เฌาพรา ดี แดะ บอ เฆ ดูอี อาโมยว อาซูรา, แตห เฆ ตัห, แตห เฆ กอ ปี พึง มาเพียน. 19 เฆ ดี บอ ตัห กอย ดอน นา ดอน โปละ. เฆ ดี กอย โดบ ดีลัยะ โดง ง็อง ดูอี. เฆ ดี บอ ตัห กอย บอ แคง มาอัะ ดาอาง, บอ ดี เฮ มาอาต เฆ ดี แปร เงียน. 20 ดอ อัน ตี เฌาพรา ดี ตัห แดะ ดูอี อี กอย นา ดอย อึม แบลง อูพาราด อี มูห ดูอี ปี อึบ คูนดีคัม แคง มืง อาซูรา. อึณ ปี อัน ฌาง เฆ, แตห เฆ ตัห, แตห เฆ ฆาะ แวน ดีโมห เบ บอ ฮึก ฆีณ เบ บอ ฮึก ดี โดว เบ. 21 ดอ อัน ตี ดูอี อู วี ดี บอ มึห ดี เฮียง มี มามัก อู โดว บอ มาแป มี อา โดว. 22 มาโดว ซัด เฆ ตี ยี มึห อึม ปู กืน กาเซา, แตห อัน ปึอน ดี โบง อึม ปู อี ปราง โฆระ. โคว, เฆ ดูอี อี ซี ฆีด ซี กอย แคง มืง ตี มืร, เฆ ดี บอ ปึอน ดี โฮม อึม ปู ปราง โฆระ ตี บอ งาม มาเพียน. 23 ดอ อัน ตี แคง มาน มางูน อี แฮะ ดึอม มึห เฮ มางูน อู แหรณ กาดัง, บอ มึห ดีง็อห ดีคัน รึอน อู แหรณ โบ็ง, อึณ ดี วี แบน โตต ยวน มาอาต. 24 เฆ ดูอี ดี บอ โฆ็ง อัะ เฆ บลา เซ เฆ ฮาว โดง ตี. โคว, กาดาย ดี ตี แฮะ วี เลห โตต ยวน มาอาต ดีโลย. 25 ดอน โปละ อี มูห โดง ปี ดึอม โละ เฆ ดี วี เลห โตต เดา มาอาต. อาว มึห อี ยัะ ฮาว กาตัด. อึณ วี แบน โดง เบลห เฆ มามัก บอ มาบู เฆ มาแป, แตห เฆ ปึอน ดี โฮม เปต.” แคะ ตี อาอีซายัะ แฮะ กาลาง ดี คูนดีคัม อาคาด บอ เฆ อี โดบ อัน.