1 อาอีซายัะ ปี วี ต็อห, “อึณ มูห ซีนัม ดอ ยัม คูนดีคัม อาอูฌียา ตึอน. ดอ อัน ตี โอว แฮะ ยึร เฌาพรา. อัน เฌา แฮะ ตูต แดง มาลาง อัน อี จา กาเซา บอ บยัะ แคะ ตาง ปวน อัน. โบรว ครึง ปี ตา อัน เฌา มืร, แฮะ โนะ แคง โฮว อัน. 2 เฆ อามู อามาด อัน อี จืร เซราบ แฮะ กอย นา แดง อัน เฌา. อามู อามาด เฆ ตี, อู กาดัง ปี วี มึห เพียง เดา โบ็ง. เพียง อาดา อา โบ็ง บอ ซีบลึก นา เฆ. อาดา ปอ อา โบ็ง บอ ซีบลึก เปลา เฆ. อาดา ปอ อา โบ็ง เฆ บอ บึณ. 3 เฆ ดอน กาดัง บอ ลาย แดะ ต็อห, ‘เฌาพรา อี อึบ โตต ดอน โมยว, อัน แฮะ ซีงา บอด, ซีงา บอด, ซีงา บอด. บอ อาพูง ดังโคว อัน เฌา กอ โนะ โตต แดง กาดาย.’

4 โฆรห ปี ลาย แดะ เฆ ตี, อึณ บอ แตห เจณ ร็อง แคง โฮว เฌาพรา ดียูห ดีเยณ. ดัก เงา มืร ตัห โนะ แคง โฮว บอ โฮว.”

5 โอว แฮะ ฮอต ยึร ลอง อัน ตี, โอว บอ วี ดัด ต็อห, “อาลึร, โอว แฮะ ฌัม ดูก ตาง. อาซาก โอว ดี ชึม. โคว, โอว มูห ดูอี อี นับ ดี กาลาง โฆรห อี ตู หมึอม. โอว มืร แฮะ กอย รึม โดบ เฆ ดูอี อี กาลาง โฆรห ตู หมึอม. โอว ยี แฮะ ยึร เฌาพรา อี มูห คูนดีคัม อี อึบ โตต ดอน โมยว.”

6 วาย อัน ตี อามู อามาด อู กาดัง อี จืร เซราบ, อัน วี ตัห โดง กอย โอว. แคง แด อัน, อัน บอ โฆ็ง อึณเกียบ อี แฮะ เกียบ อึณกึร เงา แปะ แฮะ ดึห อัน ดี กาโช็ง หลู. 7 อัน บอ ดึห อึณกึร เงา ตี ปีด ดี โมต โอว. อัน บอ ต็อห, “อานี แฮะ ฮอต ดึร ซีปึณ แม. อี ตู หมึอม อี กอย ดี แม, เฌาพรา แฮะ แตห อึณ หราย. หมาบ แปะ แฮะ โบง แม มืร, อัน เฌา แฮะ ฮอต ฆ็อห แวน.”

8 แฮะ ฮอต ปาย ตี โอว วี ยึร โฆรห เฌาพรา ต็อห, “อาเซ ดี คัม ดี แบน ดาลาม โอว บอ โบง ปี จัร โอว?” โอว มืร วี ต็อห, “โอว กอย ดี นี, แตห แม เฌา จัร โอว.”

9 อัน เฌา ปี วี ต็อห, “แตห แม ฮาว กาลาง ดี ดูอี เฆ นี ต็อห, ‘แตห เบ โทม เซเซ, ยี ตู แตห อึณ กาหลูห ดี น็อห เบ ดอ เหมา. แตห เบ บอ ยอด เซเซ, ยี ตู แตห เบ ยึร ดอ เหมา.’

10 แตห แม โบง แตห น็อห ดูอี เฆ ตี กอ ดืร กาเซา, แกวะ แตห เฆ ซี นับ ดี บยอง. แตห แม โบง แตห โหยะ เฆ กอ กาอาว. แตห แม กาดัห งาย เฆ. เซ แม ตู โบง ปาย ตี เฆ ดี บอ ปึอน ดี ยอด, บอ แตห อึณ ลึห ดี งาย เฆ. เฆ ดี บอ ปึอน ดี โทม, บอ แตห อึณ ลึห ซีคยา ดี โหยะ เฆ. แฮะ ฮอต, อึณ ดี บอ ลึบ แคง น็อห เฆ, บอ แตห เฆ บยอง น็อห. เซ อึณ ปาย ตี โอว ดี บอ บลัวะ แวน หมาบ เฆ, แตห อึณ ปี ดูอี เซา แฮะ วี แกน.”

11 โอว วี ต็อห ดี เฌาพรา, “อึณ ดี แบน ปาย ตี เหลณ แคะ เหมา?” อัน เฌา วี ต็อห ดี โอว, “อึณ ดี ฌัม ปัน ดี ลึร ราม โตต มืง อี กอย แคง กาดาย มืง อีซาเรลัะ. อึณ มืร อาว ฮู มึห ดูอี อี กอย แคง กาง เฆ ตี. บอ มาน มืง เฆ, อึณ ดี ลึร โตต.

12 โอว ดี ดึห แคะ กอย ดูอี, ตึย เฆ ฮาว โต็ง โต็ง, แกวะ แตห อึณ ซี มึห ดูอี คอ อู วี อี กอย ดี ตี.

13 แคง ดูอี ฆึร วี, อึณ ปี บอ วี ฆีด อู วี มืร, โอว ยี ดี วี โบง แตห เฆ กอ ลึร ชึม โตต. อึณ ดี แบน ปี โงย เฮ เทเรบ. วาย แฮะ ฆัร แวน เฆ เฮ ตี, โงย อัน อี ซี ฆีด ดี บอ วี อึณโลห.” แคะ ตี เฌาพรา แฮะ กาลาง ดี โอว.