1 อาอีซายัะ ปี วี ต็อห, “แตห เบ โทม โหมว ปี ต็อห โอว ลอง ฆึก ปี ร็อก โอว บอ ลอง มาน มางูน อัน. ‘ฆึก ปี ร็อก โอว แฮะ มึห ดี ซัม อูน เฮ มางูน โดง มูห กาดาย บอด กาดาย หมึอม.

2 อัน มืร แฮะ โละ แฮะ เชา, แตห กาดาย พูน. อัน แฮะ ทอน แวน บอ มาว บอ ซัม เฮ มางูน อี บอด อี หมึอม หลึอม โมยว เฮา. อัน ปี วี ซัม อูน บอ กาโช็ง จา อี บัร มาน ตี. อัน ปี วี โบง อูน บอ โดง ดี กรีด เบล มางูน ตี. แฮะ ฮอต, อัน บอ บัร แตห อึณ กอ ฌัม ปัน ดี ซีน เบล มางูน. มาแล, เบล มางูน ตี บอ ซีน, ยี วี ปราง กาเซา, อาว มึห ดีโคว มาเซ.’

3 แฮะ ฮอต ปาย ตี ฆึก ปี ร็อก โอว ตึอน วี ต็อห, ‘อึย เบ ดูอี อี กอย แคง มืง เยรูซาแลม บอ เบ อี กอย แคง มืง ยูดา, หมาณ แตห เบ ซูงพยาด ลอง มาน มางูน ตี บอ ลอง แปะ แฮะ โบง โอว.

4 อึณ ซี มึห โมยว เหมา ปี โลว โบง โอว แคง มาน มางูน ตี, ปี หณัม ปึอน โอว ดี โบง? เหมา อึณ ปาย ปี วี เบล มาน มางูน โอว มี เบล ปราง? เหมา อึณ ปาย ปี ตู เลห อัน เบล ซีแงห ปี หน็อะ อึณด็อะ โอว?

5 โอว ดี แค ดี เบ ลอง ปี ดี โบง โอว. โอว ดี ปยาต แวน โล็ง แวง มาน โอว ตี. โอว ดี รึต แวน บอ มาอาต อี แฮะ ซัม แบน โล็ง, วี แตห มาโดว แปร วี ตัห โฮม ตัห แณต มาน มางูน ตี.

6 โอว ดี เบลห แตห อัน แบน มาน ราม. อาว ฮู มึห อาเซ อี ดี โละ ดี โดห อัน. อึณ ดี วี ลัต มี เดา มาอาต ดอน โมยว นา แคง. โอว ดี บอ จัร อึณอูะ แกวะ แตห ฆลาย โจห แดง มาน ตี.’ ฆึก โอว แฮะ กาลาง ปาย ตี.”

7 โอว ยี ต็อห ดี เบ, เฆ ดูอี อีซาเรลัะ, เฆ ปี มาน มางูน ปี ซัม เฌาพรา อี อึบ โตต ดอน โมยว. เฆ ดูอี อายูดา เฆ บอ ปี เฮ มางูน ปี ซัม อูน อัน เฌา แตห น็อห อัน ดาคึย. อัน เฌา แฮะ ทาง เฆ ดี โบง ซืร ซืร หมาน หมาน. มาแล, เฆ ยี วี ง็อห ยัม อาซาก อี เฮา. อัน เฌา มืร แฮะ ทาง เฆ ดี โบง โดบ ดารา. มาแล, อัน วี ยึร อี ยาม โกบ แฮะ คาหนาบ อี ดี เฆ.

8 เบ ดูอี อี จึห กาง จึห โดง นา อี เฮา, แตห เบ แว มึห กาปัว, แกวะ ฮู แตห อึณ ซี มึห กาดาย โดง ดี กอย อี เฮา, แตห อึณ ฆีด มี เบ อี ดี กอย แคง มืง, เบ ดี ฌัม ดูก ตาง.

9 โอว แฮะ ยึร เฌาพรา อี อึบ โตต ดอน โมยว ต็อห, “โอว ต็อห อาคัร ดี เบ, กาง เบ อี แฮะ ตาง, เฆ บอกาเฆลียด ดี ลึร โตต. โฮว เบ อี แฮะ ชีด, เฆ ดี บอ ราม ลึร โตต, อาว ฮู มึห อี กอย นา แคง.

10 มาน มางูน อี แฮะ กาว็อห แคะ ปี แท มามัก อู ฆู อาดา ฆึร ซีแง, อึณ ดี บอ เลห อึม มางูน อู ปาด.^a โหงว ปี ซัม เฆ อาดา อู โอวมา,^b อึณ ดี วี ปึอน อู เอพา.” ^c เฌาพรา แฮะ ต็อห ปาย ตี.

11 เฆ ดูอี อี ยีต เดียง ป็อห ซีณ ซีณวัห เจว ปี วี เดียง แตห กอ ฌัม แคง หมึร, แตห เฆ กอ ยึต กาเซา, เฆ ดี ฌัม ดูก ตาง.

12 เฆ ดี บอ โบง บลอย บอ นับ ดี บัห ดีง แบน โมยว แบน โมยว. เฆ บอ กัร ฆรึง, บูด เวา บอ เดียง อึม มางูน. มาแล, เฆ ยี ตู วี นับ มาเซ ลอง ปี โบง เฌาพรา. เฆ มืร ตู โรวเซ แปะ แฮะ เบลห อูน อัน เฌา.

13 โกบ อึณ ปาย ตี เฆ ดูอี ปี อึบ โอว โลว คัม อี เฮา เหมต ฮาว เฆ. เฆ ดา ตาง ดี บอ ยัม โกบ เอต เฆ ปี ดี โฮม. เฆ ดูอี เรา ดูอี กาง ดี บอ ดีหลัห กาเซา โกบ เอต เฆ อึม.

14 อึณ ปี มืง มารานัะ แฮะ กาปราณ กาเซา เฆ. อัน ดี บอ อาง ตาง โมต อัน, แตห อัน ปึอน ดี แมง บลึอบ เฆ บอกาเฆลียด. บอ เฆ อี มึห ซาเร บอ เฆ ดูอี เรา ดูอี กาง เฆ อี โบง บลอย อี ซีนัน ซีนืง ตึอน, เฆ ดี ลึบ โลง โตต.

15 ดูอี ดอน อี ดี โจห เตียม. เฆ ดูอี อี ปีคึก มืร, เฆ ดี วี โลว โฆม โลว โยม.

16 มาแล, อึณ มูห เฌาพรา อี อึบ โตต ดอน โมยว. เฆ ดี อืบ มยูก อัน เฌา โกบ ปี ซูงพยาด อัน แฮะ โดบ นา มูห นา หมาน. อัน เฌา ดี บอ บยัะ แคะ ซีงา บอด อัน โกบ โบง อัน นา ซืร นา หมาน ดี อี.

17 ดอ อัน ตี มาบู ดี บอ โฮม เปต เฆ แปร แคง มืง อี แฮะ ลึร แฮะ กาปยาต ตี. บอ ฆอน มาบู ดี บอ เหรต ดี โฮม เปต ดี โอ็ง กาง ราม อี แฮะ ดึอม มูห กาง ดูอี ครัม.

18 เฆ ดูอี อี โบง หมาบ เซเซ, เฆ ปี ดูอี อี ดืด ลักเลา. วัน แมง ปี ชึบ เฆ ตี, อึณ ปี อี ตู หมาน อี ตู หมึอม ปี โบง เฆ เซเซ. เฆ ดูอี ฌึร ตี, เฆ ดี ฌัม ดูก ตาง.

19 บอ เฆ ดูอี อี ตู หณึม โฆรห เฌาพรา, เฆ ดี บอ ต็อห, “แตห เฌาพรา โบง แฮ แฮ, โบง ครัน ครัน ปี ต็อห อัน ดี โบง, แตห เย ยึร. แตห อึณ ตัห แคะ ปี คราม อัน ดี โบง. อัน เฌา อี บอด กาเซา, อี มูห เฌาพรา ปี กรึบ เฆ ดูอี อีซาเรลัะ, แตห อัน โบง แคะ ปี ซี โบง อัน, แตห เย ยึร, แตห เย นับ.”

20 มัง อี แฮะ นับ ลอง ปี โบง อี เฮา, อึณ ตู หมึอม. เฆ ยี ต็อห, อึณ หมึอม. บอ, เซ อึณ มึห อี หมึอม, เฆ นับ ต็อห, อึณ ตู หมึอม. บอ ดูอี ฌึร ตี ดี ฌัม ดูก ตาง. เฆ มืร นับ ต็อห, อี อับ ว็อง แฮะ บลาง. บอ อี บลาง แฮะ อับ ว็อง. เฆ บอ ดึห อี ซ็อง วี กาดาง อี งาม. เฆ บอ ดึห อี งาม วี กาดาง อี ซ็อง. เฆ ดูอี ฌึร ตี, เฆ ดี ฌัม ดูก ตาง.

21 บอ มัง อี เฆ ทาง เฆ มึห อางยาน. เฆ บอ ทาง เฆ แฮะ หล็อก แหลม. บอ เฆ ดี ฌัม ดูก ตาง.

22 มัง อี บอ มูห อาป็อห กัด. เฆ บอ นับ ซีคยา ดี ดึห ป็อห, กาวัร กาซู ซีนัม.

23 เซ อึณ มูห ดูอี อี แฮะ โบง หมาบ, เฆ ดา ตาง ยี ตู ดัม หมาบ ดี อัน โกบ แฮะ ดึห เฆ ดี โฮม คอซอง ปี ดัว อัน, เซ เฆ บอ วัห ดารา อี มูห อี หมาน, วี ดัม หมาบ ดี ดูอี อี ตู มึห หมาบ, บอ เฆ ดูอี ฌึร ตี, เฆ ดี ฌัม ดูก ตาง.

24 เฆ ดี ชึม ปี เฮ อี มึห เรียห กาฮ็อห. เฆ ชึม บอ ปี โบห กาฮ็อห ปี บูด คูน. ดูก ปี โลว คัม เฆ, อึณ บอ ปี เงา อี โฮม เหรียง กาฮ็อห บอ กาซึม แปร กาฮ็อห. โคว, เฆ แฮะ แวน เฌาพรา อี อึบ โตต ดอน โมยว, อี มูห เฌาพรา อี ซีงา บอด ปี กรึบ เฆ ดูอี อีซาเรลัะ.

25 โคว อัน ตี เฌาพรา แฮะ รู กาเซา ดี เฆ ดูอี ปี อึบ อัน. อึณ บอ ปี อัน แฮะ โซ็ง แด อัน บอ มัห ยัม เฆ. อึณ ดี บอ แตห นอน ดียูห ดีเยณ. โดว ยัม เฆ ดี บอ ปี กาอัห อี บูงบรัด โดบ อึณเตณ. ปี บอ แฮะ ปาย ตี มืร, น็อห รู เฌาพรา ยี ตู หราย. อึณ ปี อัน เฌา ยี ซี โซ็ง แด อัน, แตห อัน วี มัห เฆ ปอ อึณ ปัว.

26 อัน เฌา ดี บอ แดะ ดูอี อาโมยว เฮา อี กอย โต็ง. อึณ ปี อัน ซัม ร็อง อาลาม ปี ปึอน ยึร เฆ นา กาโต็ง. อัน เฌา ดี บอ กาโฮต แตห อึณ แดะ เฆ ตัห โดง ซืด กาดาย. เฆ มืร ดี บอ ตัห ครัน ครัน.

27 ดูอี เฆ ตี เฆ ยี ตู ดีหลัห ตู นูน. อาว มึห อี กาจัว อี เกห คอ อู วี. บอ อี แบน ซี อีด บอ อี อีด กอ ปีว โดว มืร อาว มึห. แซะ เฆ อี ลูด บอ วัน แคลบ อี กาดัด มืร อาว มึห.

28 บลา เฆ มืร บัต. อัะ เฆ มืร แฮะ ฮอต วีต. ฆีบ มังปร็อง เฆ มืร โปลม ปี มาว ซาว. กาเลณ ลักเลา เฆ มืร นับ ดี ฮาว แฮ แฮ ปี คูน ลาง.

29 โฆรห ปี ดัด เฆ ดา ซึก, อึณ บอ ปี ฮัม เรียง มาครังซี บอ ฮัม เรียง ฆอน มาครังซี. ดอ แฮะ ฮอต ก็อะ ยัม มาครังซี โดว ซัด, ดอ วี กาบ ฮาว อัน, อัน เรียง ปาย ตี แกวะ แตห อึณ มึห อี ยัะ ตัห พาด ดึห ดี อัน.

30 ดอ อัน ตี เฆ ดี บอ ซีนัน ซีนืง ดอ กาโฆห เฆ ดี ดูอี อีซาเรลัะ. อึณ บอ ปี ฮัม ดีงึณ อึม นัมมูกซารา. เซ อี ยอด แคง มืง ตี แฮะ มึห มี อี ดูก อี อับ ว็อง ดีโลย. อึณอูะ บอ วี กาดัห แคะ กอย บลาง. ลอง อัน ตี อาอีซายัะ แฮะ กาลาง ดี เฆ ดูอี แคง มืง ยูดา บอ มืง เยรูซาแลม.