1 ครึร อาเยเซ แฮะ ปี เฮ ตาง ปี ฆัร แวน อี. อึณ ยี ดี วี มึห ดูอี อู วี อี ปี อึณโลห กามาย อี วี เลห ดี ดัง บรีม อัน ตี. อัน บอ ปี รา กามาย อี เลห แคง เรียห เฮ ตี ดี วี มึห เบล.

2 น็อห พึอม เฌาพรา ดี บอ แตห อัน มึห อางยาน บอด, แตห อัน นับ ปี ปาย แบน โมยว แบน โมยว, มึห บอ อากยาม อางยาน บอ โปลม เฆ แฮณ. อัน ดี บอ อึบ เฆ ดูอี อัน บอกาเฆลียด. อัน ดี บอ นับ บอ โรวเซ เฌาพรา.

3 อัน ดี บอ โบยว ดาคึย ดี โรวเซ เฌาพรา. อัน ตู ซูงพยาด โดบ แปะ แฮะ ยึร อัน. อัน มืร ตู แตห ดัม โดบ ปี โทม อัน.

4 อัน ดี ซูงพยาด ดารา ดี เฆ ดูอี ฆีน, แตห อึณ การัม. อัน บอ ฆ็อง แร เฆ อี ตู มึห โปลม เฆ แฮณ อี กอย แดง กาดาย. โฆรห อี ดัม หมาบ ดี เฆ ดูอี, อึณ ดี ปี อัน ตา อึณกรวน อัน, มัห เฆ ดูอี แดง กาดาย. เฆ ดูอี ฮาย ดูอี มืก ดี บอ โลว ยัม โกบ อามีง ปี ดัว อัน.

5 อัน ดี บอ มึห น็อห ซืร น็อห หมาน เซเซ ปี ดูอี อี แฮะ รีด แซะ ดี ณอย อัน. อัน ดี บอ โบง นา มูห นา หมาน เซเซ ปี ดูอี อี รีด ซีบรอด ดี ณอย อัน เซเซ.

6 มาโซว แปร เฆ มาบู ดีแตด ดี บอ ปึอน ดี กอย รึม กอย ดาคึย. มาดีวาย เฆ ฆอน มาแป ดี บอ ปึอน กอย รึม อีด รึม. บอ ฆอน มัก เฆ ฆอน มาครังซี ดี บอ กาโดบ เหรต ดี โฮม เปต. เฆ ฆอน ดีแตด ดี บอ แบน อี เฮียง เฆ.

7 มามัก เฆ มาเฆรห ดี บอ โฮม รึม อู โปละ. ฆอน เฆ ดี บอ อีด รึม กอย รึม ดาคึย. แคะ กอย มาครังซี ดี บอ โฮม เปต ปี มามัก.

8 ฆอน งัะ อี ซี ปู ดี บอ ดีลาว โคบ กาเดา ฮัณ เฆรา. ฆอน อี แฮะ ฆ็อห ปู ดี บอ โจก แคง กาเดา มาฮัณ อี ฮาย กาเซา. อึณ ยี ตู แบน อาเพ อาเร ดี อัน.

9 ดี นอน ฌีโอน อี มูห นอน ซีงา บอด โดง กอย เฌาพรา, อาว ฮู มึห อาเพ อาเร, อาว มึห อี ฮาย อี มืก ดอ เหมา. แดง กาดาย นี ดอน โปละ เฆ ดูอี บอกาเฆลียด ดี บอ นับ ลอง เฌาพรา. อึณ ดี บอ ปี นัมมูกซารา แฮะ มึห มี อึม ดอน นา ดอน โปละ.

10 ดอ อัน ตี ดูอี อี ดี โบว ตัห แคง ครึร อาเยเซ, อี ปี รา กามาย อี เลห แคง เรียห เฮ ตึอน, อัน ดี กอย ปี อาลาม ปี ปึอน ยึร ดอน อี. เฆ ดูอี แบน โมยว แบน โมยว ดี บอ เหรต อัน. โดง กอย อัน ดี บอ มึห อาพูง ดังโคว ตาง. 11 ซีแง อัน ตี เฌาพรา ดี วี แดะ กาฌูะ เฆ ดูอี อาโมยว อัน อี ซี ฆีด ซี กอย แคง มืง อาซูรียา, มืง แอฆึบ นา เตต, มืง แอฆึบ นา กัว, มืง กูซา, มืง เอลัม, มืง บาแบ, มืง ฮามาด, มืง อี กอย โคบ อึม นัมมูกซารา บอ เฆ อี กอย ดี ฆูน อึม.

12 เฌาพรา ดี เบลห อูน อาลาม, แตห ดูอี ดอน โมยว แดง กาดาย ปึอน ดี ยึร ดอ วี แดะ กาฌูะ อัน เฌา เฆ ดูอี อาโมยว อัน. อัน ดี แดะ กาฌูะ เฆ ดูอี อาโมยว ยูดา อี แฮะ กาย็อห กอย ดอน นา ดอน โปละ แดง กาดาย นี.

13 เฆ ดูอี อีซาเรลัะ, เฆ มืร อาว ฮู หลัยะ ดูอี อาโมยว เฮา. เฆ ดูอี อาโมยว เฮา อี โบง นา จีจีว ดี ดูอี อายูดา มืร, เฆ ดี หราย โตต. เฆ ดูอี อีซาเรลัะ อาว ฮู หลัยะ เฆ ดูอี อายูดา. บอ ดูอี อายูดา อาว ฮู โบง นา จีจีว ดี ดูอี อีซาเรลัะ.

14 เฆ ดี วี ลาย โพรม รึม, ฮาว กาโฆห ดี ดูอี พีลีที อี กอย บลาก นา เฆต ซีแง. เฆ ดี วี ลาย โพรม รึม, วี ฮาว พาด ดึห โกรวกราม เฆ อี กอย บลาก นา เลห ซีแง. เฆ ดี บอ แป บอ ออง ดูอี เอโดม บอ ดูอี โมวอาบ. ดูอี อาโมยว อัมโมน ดี บอ คัม ดี โทม โฆรห เฆ บอ โบง ปี จัร เฆ.

15 อึม อี กอย ดี กาโตะ อึม อี จืร อึม ดีโหนง เฌาพรา ดี แตห อึณ ฮีด. อัน บอ แตห คูน ตาง ตัห บูด อึม ตาง อี จืร อูพาราด, แตห อึณ กาย็อห แบน บู แบลง, แตห เฆ ดูอี ปึอน ดี กาโลห ฮาว ดี เปลา เฆ.

16 อึณ ดี บอ มึห อึณเตณ ตาง แตห เฆ ดูอี อีซาเรลัะ ปึอน ดี เลห แคง มืง อาซูรียา. เฆ ดูอี อี มูห ดูอี ปี อึบ เฌาพรา อี ซี ฆืด, เฆ ดี บอ วี ตัห แคง มืง เฆ, แตห อึณ ปี ดอ เลห ฆูณ ดัง เฆ แคง มืง แอฆึบ ตึอน.