โฆรห กาโณม

1 อึย แม ฆอน ดา กาณา, เปลา แม อี แฮะ ชึบ แคลบ แฮะ ชีด กาเซา. ฆึม แม นาง มืร แฮะ ปี แซณ บอด อี มูห ปี โบง ดูอี อี แหลว ดี โบง.

2 กาตีณ แม นาง แฮะ ปี ก็อก อี แฮะ ฮับ โนะ อึม มางูน. วัต แม แฮะ ปี อึณปึม โหงว แปะ แฮะ อึณปราย อูน อี, แฮะ วี ดาง บอ โบห คัมซอน.

3 เบล ปู แม อา โบ็ง ตี บอ ปี มาฌัะ ฆอน ราบ.

4 แมง แม นาง แฮะ ปี โฮว จา แปละ มาซาง. งาย แม มืร แฮะ ปี อึม ดึง แคง มืง เฮซาโพน บอ อี กอย โคบ มาโลห มืง อี จืร บาซาราเบม. ฆูงมูห แม นาง แฮะ ปี โฮว จา อี กอย ดี นอน เลบานูน, อี วี มางัห ฮาว นา มืง ดามาคู.

5 ฆีณ แม บอ ปี นอน ฆาเมลัะ. ฮึก ฆีณ แม มืร ดีปลาย บอ ว็อง กาลัะ. ปี ปาย อารึบ ฮึก ฆีณ แม ดี ชีด, อึณ บอ ล็อะ กาเซา น็อห คูนดีคัม.

6 อึย แม ปาว ปี ร็อก กาเซา โอว, แม แฮะ ชีด กาเซา. อึณ บอ แตห โอว โบยว ดาคึย โกบ ร็อก โอว ดี แม.

7 แม นาง บอ จา ดีเฮียว ปี เฮ นัมทาน. เบล ปู แม บอ ปี อึณโป็ง เบล อัน.

8 โอว แฮะ ต็อห, “โอว ดี โฮะ เฮ นัมทาน บอ ปา เบล อัน.” แตห เบล ปู แม ปี อึณโป็ง เบล มางูน. พึอม ปี ฮึห แม, แตห อึณ บอ อูห หงูน ปี เบล ซีปึม.

9 บอ โมต แม แตห อึณ ปี อึม มางูน อี ซีแงห หลึอม โมยว เฮา.

เซ อึณ บอ ปาย ตี แตห อึม มางูน แหล ฮาว ซืร ซืร โดง กอย ปาว ปี ร็อก โอว ตี. แตห อึณ บอ แหล ฮาว กาโลห ซีปึณ อัน บอ หราง อัน.

10 ปาว ปี ร็อก กาเซา โอว ตี, โอว บอ มูห โดง บึง อัน. อัน บอ ซี กอย กาเซา รึม โดบ โอว.

11 อึย แม ปาว ปี ร็อก โอว, แตห แม ตัห. แตห อาย กาโดบ ฮาว ยอด มาน เฆ โดง นา. แตห อาย ฮาว ตัม แคง เรา แคง กาง เฆ ตี.

12 แตห อาย ยีต ซีณ ซีณวัห เจว, แตห อาย ฮาว ยอด มาน มางูน, โยว แฮะ กาโปว ดี โบห. แตห อาย ยอด โยว โบห แฮะ ฮอต บรัห. แตห อาย ยอด บอ เฮ เบล มาจัก, โยว แฮะ มึห โบห เฆ เบล อัน. โดง ตี, โอว ดี บยัะ แคะ ร็อก โอว ดี แม.

13 แม ดี ปึอน ดี ยึร อูห หงูน เบล อี แตห อี ลาย อึง บอ เบล อี ซีแงห ดอน โมยว อี กอย โคบ มาโลห กาง. อึณ แฮะ มึห บอ เบล บรีม เบล กามาย, โอว แฮะ แฆบ อูน อาดา แม, อึย แม ปาว ปี ร็อก โอว.