โอว ซี แตห แม ปี อีกัด อีมาย อาราง โอว อี แฮะ ฆึอด ดี มา โอว. เซ อึณ ปาย ตี, ดอ กาตูณ โอว ดี แม กาแต เรา, โอว ปี บอ หณอด อูห แม มืร, อี เฮา ตู ปึอน แนนัะ โอว.

2 โอว มืร ดี ปา แด แม, ฮาว ฌัม แคง กาง มา โอว บอ แตห แม ลึบ แคง อีด โดง ฆึอด โอว. โอว มืร ดี วี ดึห อึม มางูน อี แฮะ กาวัร อึณกรึห หมี บอ อึม เบล มาจัก โอว, วี ดัว แตห แม เดียง.

3 แด แม บลาก อาฆัะ ดี แบน หมอน โอว. แด แม บลาก อาอัห บอ วี เงียม โอว.

4 อึย เบ ดีบยา อี กอย มืง เยรูซาแลม, โอว ซี แตห เบ ดืง, แกวะ แตห เบ ตัห ปยาต ตัห ดีแล น็อห ร็อก ยาย, แตห ยาย กอ อึณซึห ราง ยาย.

5 อีบึณ อี เน ดี ปาว ปี ร็อก อัน อี ตัห แคง แปร, อัน มูห อาเซ?

โอว มืร แฮะ บยีต ยีต แม ดอ กอย แม ครึม เฮ ซีปึม. โดง ตี บอ มูห โดง แฮะ แด มา แม บาดีก ซันเท ดี แม บอ โดง แฮะ คัม มา แม ดี วัต เซา ดี แม ดอ แฮะ ฆึอด แม.

6 แตห แม แตห โอว กอย รึม โดบ แม เซซ บอ ดึก ดี น็อห แม ปี ฌึม อี ฮอย ดี แมง แม. แตห ดอน อี กอ ยึร แม ร็อก มี โอว ปี ซีกานู อี ชึบ ดี แด แม. โคว, ลอง น็อห ร็อก มึห ปวน ตาง ปี ปวน อี แตห อี ยัม. เซ อีบึณ อีมาย ตู ลาย หณึม น็อห, อึณ บอ นับ ดี กอย เซเซ ปี มืง มารานัะ อี กอย เซเซ. น็อห โมยว ตี บอ นับ ดี กูห ปี เงา อี กูห ตาง กูห แฮณ กาเซา.

7 อึม ปี บอ กืน แคะ เหมา มืร, อึณ ตู ปึอน บยัด น็อห ร็อก. อึม แคง แบลง มืร ตู ปึอน อึณปูน น็อห ร็อก ตี. เซ ดูอี ดี บอ ดึห โตต โกรวกราม อัน ดอน โมยว, ต็อห ดี จึห น็อห ร็อก ตี, อาว มึห อี ซีเพา ลอง อัน ตี.

8 เย มึห วา ฆอน ดีบยา เตียะ อู วี, ปู อัน มืร หณัม ตาง. เซ ฮี ฌัม ปัน ดี ตัห หมาณ เฆ กาโณม วา เย ตี, เย ตู นับ ดี ปาย เหมา ดี อัน.

9 เซ วา เย ตี ปี แรง, เย ดี โบง โฮว รึอน, เบลห แดง อัน. เซ อัน ปี มาโลห, เย ดี ดึห เฮ อารีด, โบง แบน แซ อัน, ฮับ อูน ดี บลัะ มาโลห ตี.

10 โอว แฮะ ปี แรง. เบล ปู โอว บอ ปี โฮว จา แดง แรง ตี. ปาว ปี ร็อก โอว มืร แฮะ มาด โอว ปาย ตี. โอว แฮะ ปี ดูอี อี ตัห ดัว น็อห หนีม น็อห เยน ดี อัน.

11 คูนดีคัม อาซาโลวโมว แฮะ ดึอม มึห มาน มางูน อู แด อี กอย แคง มืง บาลาโมน. อัน แฮะ ดัว เฆ อี เฮา คาด ดี รัณ มาน อัน ตี. เฆ ยี โลว ดัว รึอน ดี อัน, อู วี อู แหรณ โบ็ง อาดา เบล แปะ แฮะ ปึอน เฆ.

12 อี มูห มาน มางูน โอว, โอว ดี ดัว ดี ดูอี ปี อึง โอว. อึย แม คูนดีคัม อาซาโลวโมว, โอว ดี ดัว รึอน อาดา อู แหรณ โบ็ง ดี แม. เฆ ดูอี อี คาด ดี รัณ มาน มางูน ตี, โอว ดี ดัว อู วี อา มาย็อห โบ็ง, แตห อึณ แบน รูห รัณ เฆ.

13 อึย แม นาง ปี ร็อก กาเซา โอว, แม แฮะ กอย แคง กาปึม โอว ตี. เฆ ฆึก โอว หน็อะ ดี โทม โฆรห แม. แตห แม กาลาง, แตห บอ โอว ปึอน ดี โทม โฆรห แม.

14 อึย แม ปาว ปี ร็อก โอว, แตห แม ตัห โดง กอย โอว. แตห แม ปี มาฌัะ อี หณัม ตาง บอ มาบวห อี โนะ อู ซีนัม อี กอย ดี นอน อี ลัต เฮ อึณกรึห อูห หงูน กืน.