1 อึย แม นาง อี แฮะ ชีด หลึอม อีบึณ อี เฮา บอกาเฆลียด, ปาว ปี ร็อก แม ตี แฮะ ฮาว นา เหมา? ปาว ปี ร็อก แม ตี แฮะ ฮาว โดบ อึณเตณ เหมา? กาลาง ดี เย, แตห เย ปึอน ดี จอย แม เหรต อัน.

2 ปาว ปี ร็อก โอว ตี แฮะ โลง ดี กาปึม อัน อี มึห อึณกรึห อูห หงูน กืน. อัน ฮาว แตห อัน ปึอน ดี โฮม ดี เดียง บอ เบต โบห คัมซอน แคง กาปึม อัน ตี.

3 ปาว ปี ร็อก กาเซา โอว ตี, อัน บอ มูห โดง บึง โอว. โอว บอ มูห โดง บึง อัน. อัน บอ เฮียง พึง มาบู อัน แคง โอ็ง เปต อี มึห โบห คัมซอน.

4 อึย แม ปาว ปี ร็อก โอว, แม นาง แฮะ ชีด ปี มืง ดีราจา. แม บอ หมึอม ร็อก ปี มืง เยรูซาแลม. แม บอ หมึอม อาม ปี ดา ซึก อี แฮะ โฆ็ง อาลาม เฆ.

5 แตห งาย แม นาง วัห โอว. โคว, งาย แม ตี แฮะ ชีด กาเซา. โอว อาว ฮู คัม ดี ยอด. ฮึก ฆีณ แม แฮะ ว็อง ปี พึง มาแป อี แดน โลง ดี นอน ฆีเลอาด. 6 หราง แม มืร แฮะ ลูย ซีงา ปี พึง มาบู อี แฮะ ฮอต ตา อึม. ยี ตู โบยห ตู หราย คอ อู โบ็ง บอ ลาย ดาม การัม.

7 แม ปี บอ แฮะ กาโหมะ นา แม, กาลา แม ยี คอง ปี เบล มาจัก อี แฮะ กาปลัะ กาแต.

8 เซ นาง ฮอคัม แฮะ มึห เดา ฆึร วี, นาง เตียะ บอ มึห ดา ฆึร วี บอ เฆ อี มูห ดีบยา แฌด ปี บอ แฮะ มึห กืน แคง ฌืง นาง คูนดีคัม มืร,

9 โอว ยี ตู ยึร คอ อู วี อี แฮะ เฌะฌูง อี หมึอม ร็อก ปี แม อี ปี มาโบลย โอว. มา แม มืร มึห มี ฆอน อีบึณ อู วี ตี. มา แม บอ ร็อก แม หลึอม ดอน อี. เฆ อี ยอด แม เฆ บอ ต็อห, แม มูห ดูอี ปี ม็องการา ดัว เฌาพรา.

10 ฆอน ดีบยา อี หมึอม ยอด, หมึอม งึอบ กาเซา ปี อาคราว เจว หณา ตี, อัน มูห อาเซ? นาง ตี แฮะ ชีด กาเซา กอ ปี กาตาน บลาง มาเฆียน, บอ มาบรีว ปี บลาง ซีแง, บอ หมึอม อาม ปี ซีมัณ.

11 โอว แฮะ โลง ดี กาปึม เฮ เบล อี มึห เฆา แบน โมยว แบน โมยว, โอว บอ ซี ยอด เฮ เบล อี กาจูห ดี โบห. โอว ซี ยอด โยว เฮ มางูน แฮะ กาดอด บอ เบล มาจัก แฮะ โบห.

12 แม นาง แฮะ โบง แตห น็อห โอว ฟึณ โกบ ร็อก กาเซา โอว ดี แม. น็อห โอว มืร แฮะ น็อห ตาง ปี ดูอี อี ป็อะ ลักเลา อึณปร็อง ปี ป็อะ คูนดีคัม.

13 อึย ฆอน ดีบยา ซูลามีด, แตห แม วี ตัห. แตห บอ เย ปึอน ดี โคย ดาคึย โดบ แม.

เหมา อึณ ปาย ปี ซี ยอด เบ ดี โอว ดอ ฆา โอว กาแต เฆ ดูอี อี กอย แบน อึณแปรง. เหมา อึณ ปาย ปี ซี ยอด เบ ดี โอว ปาย ตี?^a