1 อึย แม วา อี มูห ปาว อี ดี คัด ดึห โอว, โอว แฮะ ฮอต ตัห ลึบ แคง กาปึม โอว. โอว แฮะ ฮอต แฆบ อูน เดา มอรา บอ อึณกรึห อูห หงูน. โอว แฮะ ฮอต โฮม งาม มาเพียน อี เลห ดี อึณลาง อัน. โอว มืร แฮะ เดียง บอ อึม มางูน อี แฮะ กาวัร อึณกรึห หมี บอ อึม ปู โอว. อึย เบ ฆึก โอว, แตห เบ โฮม. เบ อี มึห ปาว ปี ร็อก เบ, แตห เบ เดียง, แตห เบ กอ แพ.

2 โอว นาง ปี บอ แฮะ ปึอน ดี อีด มืร, น็อห โอว ยี ตู อีด. โอว บอ อึณบาว ปาว ปี ร็อก โอว แฮะ ตัห ดอย มาโลห ต็อห, “อึย แม วา อี มูห ปาว ปี ร็อก โอว, แม นาง แฮะ ชีด กาเซา, อาว มึห โดง แน แฮะ ปี มาโบลย. แตห โอว ปึอน ดี ฮาว โดง กอย แม. ฆีณ โอว แฮะ อัม ณัะ ดี อึม ดีงาน. โกบ แฮะ ฮาว โอว แคง หมึร ฮึก ฆีณ โอว มืร แฮะ ดี หนีบ.”

3 โอว แฮะ ฮอต บูต เลห ครึง ปี ตา โอว, โอว ตู ปึอน วี ชึบ. โอว มืร แฮะ ฮอต บาย เปลา โอว, อาว ปึอน แตห อึณ วี กาดีห.

4 ปาว ปี ร็อก โอว แฮะ ดึห แด อัน ต็อห ดี โจก ลึบ แคง มาโลห วี วึห แซ อัน. บาง น็อห โอว มืร แฮะ ตา ตึก กาเซา.

5 โอว มืร ต็อห ดี ฮาว วึห มาโลห ดัว ดี ปาว ปี ร็อก โอว ตี. แด โอว มืร แฮะ แบ นามัน เดา มอรา. นามัน เดา มอรา อี ดึก ดี กานู โอว บอ วี จอด ดี แซ มาโลห ดอ ปา โอว.

6 โอว บอ วึห มาโลห ดัว ดี อัน, โอว ยี ตู ยึร อัน. อัน แฮะ ฮอต วี หราย. ดอ อัน ตี น็อห โอว บอ ดีหลัห อึณจัม โกบ แฮะ วี กาบัด ฮาว อัน. โอว วี แดะ อัน มืร, อัน ตู อึร โฆรห โอว.

7 เฆ ดูอี อี บัร มืง อี ฮาว วีว ฮาว เวณ แคง มืง บอ กาตูณ โอว, เฆ บอ มัห กาเซา โอว, แตห โอว กอ ดีม บอ โดว. เฆ ดูอี อี บัร ดี แรง มืง, เฆ บอ วี พาด ดึห ซีโตว ตูน โอว.

8 อึย, เบ ดีบยา อี กอย แคง มืง เยรูซาแลม, โอว ซี แตห เบ ดืง กาแซณ ดี โอว. เซ เบ ยึร ปาว ปี ร็อก โอว ตี, แตห เบ กาลาง ดี อัน แคะ แฮะ ดูก แฮะ เซา ดี น็อห โอว โกบ แฮะ ร็อก กาเซา โอว ดี อัน.

9 อึย แม นาง อี แฮะ ชีด หลึอม อีบึณ วี เฮา บอกาเฆลียด, ปาว ปี ร็อก แม ตี, อัน แฮะ ชีด หลึอม อี เฮา แคะ เหมา, แม กอ โลว แตห เย ดืง กาแซณ ปาย ตี?

10 ปาว ปี ร็อก โอว ตี, อารึบ อัน ชีด, มึห บอ โปลม เฆ แฮณ. เซ อึณ มึห ดูอี อู หมึณ วี, อัน แฮะ หมึอม หลึอม เฆ ดอน อี.

11 ฆีณ อัน ปี ครีว แฌด. ฮึก ฆีณ อัน มืร เฮต กาดัน บอ ว็อง ปี มากาอัะ ว็อง.

12 งาย อัน มืร ชีด ปี งาย มาโบลย อี กอย โคบ แบลง อึม. อัน ปี บอ มาโบลย ลูย อี ปี อึม ปู จูห โคบ แบลง อึม แหล.

13 กาลา อัน มืร หมึอม ร็อก ปี กาปึม อึณกรึห อูห หงูน. ซีปึณ อัน บอ ปี โบห คัมซอน บอ เดา มอรา แฌด.

14 แด อัน บอ ปี ร็อง ครีว อี มึห กันแด อี ฮับ แซณ เงียน ว็อง. โดว โบ็ง อัน บอ ปี แปละ มาซาง อี แฮะ ฮับ แซณ คอง.

15 เปลา อัน บอ ปี ร็อง มาว ลูย อี แฮะ วี เบลห แดง ดัง ครีว. ปี ปาย อารึบ โดว โบ็ง อัน บอ ปี นอน เลบานูน. ปี ปาย อัน ดี มึห ซาเร บอ ปี เฮ อารีด.

16 โมต อัน มืร นับ ดี กาลาง โฆรห งาม โฆรห ดาคึย. โดว โบ็ง อัน บอ โตต, อึณ บอ หมึอม ร็อก กาเซา. อึย, เบ ดีบยา อี กอย มืง เยรูซาแลม, ปาว ปี กาลาง โอว ตี, อัน บอ มูห ปาว ปี ร็อก ปี อึง โอว.