1 แม นาง แฮะ ชีด กาเซา. แม มูห ปาว ปี ร็อก โอว อี แฮะ ชีด กาเซา. แม ปี บอ แฮะ ฆ็อง งาย แม, เซ โอว ยอด, งาย แม บอ หมึอม ร็อก ปี งาย มาโบลย. ฮึก ฆีณ แม มืร ว็อง ปี พึง มาแป อี โลง ดี นอน ฆีเลอาด.

2 หราง แม มืร ลูย ซีงา ปี พึง มาบู อี แฮะ ฮอต กับ ฮึก, แฮะ ฮอต ตา อึม. อึณ มืร ตู โบยห ตู หราย คอ อู โบ็ง.

3 ซีปึณ แม นาง มืร แฮะ เรณ ปี วัน อี เรณ แฆ. โมต แม มืร หมึอม ร็อก. แม ปี บอ แฮะ กาโหมะ นา แม มืร, กาลา แม ยี คอง ปี เบล มาจัก อี แฮะ กาปลัะ กาแต.

4 แมง แม นาง มืร แฮะ เฆลียด ลืม ซีคยา ปี โฮว จา ปี ซัม อาดาวีด อี แฮะ มัน ซีคยา บอ หมึอม ยอด. มากาแวะ อี ฮอย ดี แมง แม บอ ปี มัง ฆ็อง แปะ แฮะ ฮอย อูน เฆ แคง โฮว ตี. อึณ มึห ครึง กาโฆห ปี ตา เฆ ดา ซึก อี กยัะ กาเซา.

5 เบล ปู แม นาง อา โบ็ง มืร แฮะ ปี ฆอน ราบ มาฌัะ อี เหรต ดี โฮม แคง โอ็ง เปต อี มึห โบห คัมซอน.

6 อาต บลาง แปร, อาต ปวน โตต อับ ว็อง โอว ดี กอย โดบ แม อี ปี นอน กาณัน เลโบน บอ อึณปึม เดา มอรา.

7 อึย แม ปาว ปี ร็อก โอว. แม แฮะ ชีด บอ โดว, อาว มึห โดง ดี แน มาเซ.

8 แตห แม โลง ดี นอน เลบานูน, ตัห โดบ โอว. อึย แม ปาว ปี วาง อูน โอว, แตห แม เลห ตัะ นอน เลบานูน ตี, ตัห โดบ โอว. แตห แม เลห โลง ดี นอน อามานา บอ ดี นอน ฌีโรน อี จืร บอ นอน เฮราโมน. เลห ตัห แคง กาเดา โดง กอย มาครังซี บอ มาดีวาย ซีฌึม.

9 แม วา โอว บอ ดีบยา อี ดี คัด ดึห โอว, ปี ปาย งาย แม บอ มาบรีว แซณ อี ฮอย ดี แมง แม แฮะ เบต ฮาว กาโดม โอว. อึย แม ปาว ปี ร็อก โอว, แม แฮะ เบต ฮาว กาโดม โอว.

10 ปี ปาย แม นาง ดี ร็อก โอว, อึณ แฮะ ล็อะ กาเซา น็อห โอว. น็อห ร็อก แม นาง ดี โอว, อึณ แฮะ หมึอม หลึอม อึม มางูน อี แฮะ กาวัร อึณกรึห หมี ปี เดียง โอว. นามัน อูห หงูน ปี พ็อห แม นาง แฮะ อูห หงูน หลึอม อึณกรึห อี อูห หงูน ดอน โมยว.

11 โมต แม มืร งาม ปี งาม มาเพียน. ซีดัะ แม แฮะ ปี อึม ปู บอ งาม มาเพียน ดี โอว. อูห หงูน แคง ครึง ปี ตา แม ปี อูห หงูน แปร ดี นอน เลบานูน.

12 อึย แม วา โอว บอ ดีบยา อี ดี คัด ดึห โอว, แม แฮะ ปี กาปึม อี แฮะ มึห โล็ง โรบ ดอน บลาก. แฮะ ปี บอ อึม คึม บอ อึม โตห อี แฮะ กาบีด รีด ปี ตู ปึอน ต็อะ อี เฮา.

13 แคง กาปึม ตี แฮะ มึห บอ เฮ เบล, มึห บอ เบล มาจัก อี ซีแงห อี งาม, มึห บอ โบห อี บา แคง อึณกรึห อูห หงูน อี กอย แคง มาน มางูน บอ อึณกรึห อูห หงูน อี จืร นาดู.

14 แคง อึณกรึห อูห หงูน ตี, แฮะ มึห บอ นาดู, มึห บอ เดณ อี เลห แคง โบห คาโคม, บอ กาโฮม บอ แฆละ เฮ แมโฌงฮอม, บอ เลโบน แบน โมยว แบน โมยว, เดา มอรา, เดา อาโลว บอ อึณกรึห อี อูห หงูน หลึอม ดอน โมยว. ฌึร ตี ดอน โมยว แฮะ ปี โตต แม นาง.

15 แม นาง มืร แฮะ ปี อึม โตห แคง กาปึม บอ โตห อึม อี แหล โลง ดี นอน เลบานูน.

16 อึย คูน อี ตัห บลาก นา กัว, แตห แม อึณซึห. อึย คูน อี กอย บลาก นา เตต, แตห แม บูด ตัห แคง กาปึม ปาว โอว ตี, แตห อูห หงูน อัน กอ กาลัต. แตห ปาว ปี ร็อก โอว ตี บอ ลึบ ฮาว แคง กาปึม อัน ตี. แตห อัน บอ ฮาว โฮม เบล อี ซีแงห อี งาม แคง กาปึม ตี.