1 ดอ อีด โอว แดง กาโช็ง อีด โอว แคง หมึร โอว บอ ดีเกน ปาว ปี ร็อก โอว. โอว บอ กาปรา กาเซา แตห อัน ตัห, อัน ยี ตู ตัห.

2 โอว มืร วี ต็อห, “โอว ดี ยีต ฮาว แคง มืง, ฮาว บอ โดบ อึณเตณ บอ เหรต ปาว ปี ร็อก โอว ตี ดอน โปละ.” โอว ยี ตู ยึร อัน.

3 เฆ ดูอี อี บัร มืง อี ฮาว วีว ฮาว เวณ แคง มืง, เฆ บอ กาตูณ โอว. โอว วี ดีหมอด เฆ ต็อห, “เบ ยึร ปาว ปี ร็อก โอว ดี นี?”

4 โอว บอ กาโลห ฮาว ตัะ กอย เฆ ตี อี แจก, โอว บอ ฮาว ยึร ปาว ปี ร็อก โอว. โอว มืร ฮาว ปา รีด อัน, ตู เบลห ดอ เหมา, แตห อัน กอ ฌัม ดี กาง มา โอว บอ ดึห ลึบ อัน แคง อีด โดง ฆึอด โอว.

5 อึย เบ ดีบยา อี กอย มืง เยรูซาแลม, โอว ซี แตห เบ ดืง, แตห บอ มาฌัะ เฆ มาบวห โทม. แกวะ แตห เบ ตัห ปยาต ตัห ดีแล น็อห ร็อก ยาย, แตห ยาย กอ อึณซึห ราง ยาย.

6 อี ตัห แคง แปร กาฮ็อห, อัน มูห อาเซ? อารึบ อัน บอ ปี ร็อง ดัก เงา. อัน มืร อูห หงูน ปี กาณัน เลโบน บอ เดา มอรา บอ อึณกรึห อูห หงูน ปี ย็อง เฆ ดูอี อี ย็อง โกรว.

7 ยอด, อึณ มูห กาโช็ง ปี กาโช็ง คูนดีคัม อาซาโลวโมว. ดา ซึก อัน อาดา เดา ฆึร วี อี กยัะ หลึอม ดอน อี กาแต ดูอี อาโมยว อีซาเรลัะ, เฆ แฮะ โดบ อัน.

8 ดา ซึก เฆ ตี บอกาเฆลียด มูห โตต ดา ซึก อี กยัะ ดี กาโฆห ตา มาปัวะ ลาง เฆ บลา เลียห. เฆ บอ นับ ดี ดึห โฆ็ง มาปัวะ ลาง เฆ บอ บลา เลียห เฆ, ฆ็อง แร อาเพ อาเร แคง หมึร.

9 คูนดีคัม อาซาโลวโมว แฮะ โบง กาโช็ง อัน อี ชีด กาเซา ตา เฮ ปี ดึห ตัห เฆ ดี นอน เลบานูน.

10 ร็อง อัน ดอน ณ็อง แฮะ มูห โตต รึอน. ดัง ร็อง แฮะ มูห โตต ครีว. ดี มาลาง โดง ตูต อัน แฮะ ดัะ บีก เรณ แฆ. นา แคง โฮว เฆ อีบึณ แคง มืง เยรูซาแลม แฮะ โบง แตห อึณ ชีด, แตห อึณ บยัะ แคะ ร็อก เฆ คูนดีคัม.

11 อึย เบ ดีบยา อี กอย แคง มืง เยรูซาแลม, แตห เบ ตัห ยอด คูนดีคัม ตาง อาซาโลวโมว แฮะ ชึบ มังฆึม อัน. มังฆึม ตี บอ มูห ปี ดัว มา อัน ดี อัน ดอ มูห ซีแง คัด อัน. ซีแง ตี แฮะ มูห ซีแง อี โบยว ดาคึย กาเซา อาดา อัน.