แกวะ ปีพูง แม ลอง ปี คราม แม ดี โบง แคหณา. โคว, แม ตู นับ, แคหณา อึณ ดี ปาย เหมา.

2 แตห อี เฮา อืบ แม. แตห ดูอี อี แยต แม อืบ แม. อาว โลว อืบ โดว บรีม แม ดอ เหมา.

3 เซ แม กาดูห ดี คัม อาเพ อาเร ปี โบง ดูอี รึร ดี แม, อึณ จัน หลึอม มาว เฆ กาฮาต.

4 น็อห รู บอ น็อห ดอซัะ, อึณ บอ มูห อี ฮาย กาเซา. มาแล, เซ ดูอี ยี หลัยะ อี เฮา อาว มึห อี ปึอน คัม.

5 เซ ลาย มาโนว, ลาย ต็อห โฆรห ซืร นา, อึณ หมึอม หลึอม ลาย ร็อก เครียง.

6 เซ ฆึก แม กาลาง โฆรห ซืร ดี แม, แม ปึอน หณึม อัน. มาแล, เซ รันซู แม ตัห ฆังโฆว ดี แม, แตห แม ซาดีก.

7 ดูอี อี แฮะ ฮอต โฮม แพ, อึณ ปี บอ มูห งาม มาเพียน มืร, อัน แฮะ ปึร. ดูอี อี กาปราณ, อึณ ปี บอ ซ็อง มืร, อึณ ซีแงห ดี อัน.

8 ดูอี อี เลห เตา ตัะ กาง อัน, อัน บอ ปี มาซีม อี แวน กาฮูน อัน.

9 นามัน อูห หงูน บอ อึณกรึห อูห หงูน ดี แตห น็อห ดูอี ดาคึย. บอ อากยาม อางยาน ปี ดัว ฆึก แม ดี แม, แตห แม ดาคึย ปาย ตี.

10 แม แกวะ แวน ฆึก แม บอ ฆึก ฆูณ แม. ดอ ฌัม แม ดูก บอ มึห อาเพ อาเร, แกวะ หมาณ บีนอง แม ตัห จอย แม. เฆ อี กอย กาตัด แม, เฆ ดี ปึอน จอย แม หลึอม บีนอง แม อี กอย โต็ง.

11 อึย ฆอน กาโณม โอว, แตห แม มึห อางยาน. เซ แม มึห อางยาน, อึณ แตห น็อห โอว ดาคึย กาเซา. อึณ แตห โอว ปึอน ดี เวียะ โฆรห เฆ อี แนนัะ โอว.

12 ดูอี อี มึห อางยาน, อัน นับ ปัน ดี มึห อาเพ อาเร. อัน บอ นับ ดี วัห. อี มูห ดูอี รึร, อัน ยี ตู กาพา บอ ฮาว, แตห อัน กอ ฌัม แคง ดูก.

13 เซ ดูอี แฮะ รึร, แฮะ กีคัม ดาง อี เฮา, อี มูห ดูอี ปี ตู นับ อัน, เซ อัน ซี วี การ็อห ดี แม, แตห แม ดึห อูน โกรว อัน, แตห อึณ แบน โกรว กัม อัน.

14 เซ แม ฮาว บยีต ฆึก แม ซีณวัห เจว, แม ปี บอ กาลาง โฆรห ตาง, โฆรห หมึอม ดี อัน มืร, อัน ดี วี ต็อห อึณ มูห โฆรห ดืง โฆรห เอห.

15 เซ อีบึณ ซีมา ปึณ, อึณ บอ ปี ฆลาย อี รอต โจห ป็อก ป็อก อาคราว ฆลาย.

16 แม มืร ตู นับ ปี ดี ปาย, แตห อัน จู. อึณ บอ ปี คูน, อี ตู ปึอน คร็อง บอ นามัน อี ตู ปึอน ปา.

17 ฮีน โลว ลาะ ดี ฮีน แตห อัน ลัม ซีคยา. ปาย ตี, ดูอี บอ โลว อู ฆึก, แตห ฆาย ลาย มาโนว, แตห ฆาย หล็อก.

18 ดูอี อี ลึมลา เฮ เบล ดีปู, อัน ดี ปึอน ดี โฮม เบล อัน. ปาย ตี บอ ดูอี อี โบง ฆาน ดา กาณา อัน, อัน ดี มึห ซาเร.

19 อารึบ ดูอี ลึห แคง อึม. ปี กาพา ดูอี บอ แตห อี นับ ลอง น็อห อัน ปาย ตี.

20 มืง มารานัะ ตู นับ ดี โนะ บอ ปวน อี แตห ดูอี ชึม ตู นับ ดี จู. บอ งาย ดูอี ตู นับ ดี ปึร ปาย ตี.

21 รึอน เฆ ครีว โลว ฮับ แคง กาโละ, ดัง แคง เงา, แตห อึณ แฌด. เซ อี เฮา ยี อืบ ดูอี, อึณ แฌด ดี ยอด น็อห อัน.

22 ดูอี รึร, แม ปี บอ ดึห โดว อัน ดูห แคง อึณบอ โมง โดบ โหงว มืร, รึร อัน ตู เลห ตัะ โดว โบ็ง อัน.

23 แตห แม ออน ดี เฮียง ลึมลา ซีคยา มาบู เฆ มามัก แม, แตห แม นับ ซีคยา ปี ปาย เฆ.

24 โคว, โกรวกราม เฆ โดว ซัด ตู กอย เซเซ. อาโมยว ครึร เอ ดูอี มืร ตู ปึอน อึบ อี แบน ฌาด แบน ฌาด.

25 เซ เปต แฮะ ฮอต โซะ, เปต อึณจัม ดี วี อึณโลห กามาย. เซ ฮี แฆบ กาฌูะ อูน เหรียง แคง มาน,

26 แม ดี โลว วี กับ ฮึก มาบู วี แบน ครึง ปี ดี ตา แม. แม ดี บอ ย็อง มาแป แตห อึณ แบน รึอน, แตห แม วี ปึอน ดี จึห กาดาย ปอ อึณปัว.

27 อึม ปู มาแป ดี วี แบน ปี ดี โฮม ดูอี แคง อึณโฮม แม. บอ เฆ อีบึณ อี มูห หมาย แม, เฆ ดี บอ ปึอน ดี โฮม แพ ดอน อี.