ดูอี ตู หมึอม นับ ดี เตา ดอ ตู มึห อี โฮว อัน เตา. ดูอี อี มึห น็อห ซืร น็อห หมาน ยี มึห น็อห ยัะ ปี มาครังซี. อัน ตู โยว มาเซ.

2 โกบ หมาบ ดูอี, โกบ ปี รู เฆ ดี ดา กาณา เฆ, ดูอี อี อึบ มาน มืง, เฆ บอ กาดูห ดี กาปลูะ แบน วี แบน วี. เซ อึณ ยี มึห ดา กาณา อี มึห อางยาน, อัน นับ ดี โบง แตห มาน มืง ดาคึย.

3 เซ ดูอี พลาน วี คาหนาบ ดูอี ฆีน, อึณ ปี ฆลาย อี โจห แตห กาโย็ง โหงว ลึร.

4 เฆ อี แวน ดารา, เฆ แฮะ อืบ ดูอี ฮาย. เฆ อี โบง โดบ ดารา, เฆ ยี ตู โพรม ปี โบง ดูอี ฮาย ตี, โลว กาคัด ดี เฆ เซเซ.

5 ดูอี ฮาย, เฆ ตู นับ นา มูห นา หมาน. เฆ อี มึห น็อห ซี โดบ เฌาพรา, เฆ ยี นับ ซีคยา นา มูห นา หมาน.

6 ดูอี ฆีน อี โบง นา มูห นา หมาน, แฮะ หมึอม หลึอม ดูอี ครัม อี โบง นา โฆะ แฆะ.

7 ฆอน อีมาย อี โบง โดบ ดารา, อัน มูห ดูอี อี มึห อางยาน. เซ อี ยี แบน ฆึก ดูอี อี ตู มึห ดีโคว, ฆูณ อัน ดี โลว ซาย อี.

8 เซ แม ฮี ซี ครัม กาปัว, โฮม กืน เอียง รึอน, โกรวกราม แม ดี วี ฮาว กอย โดบ อี เฮา อี มึห น็อห กาเว ดูอี ฆีน.

9 เซ แม ตู โบง โดบ ดารา, แม ปี บอ ซาคึร, อึณ หมึอม กาอีห.

10 เซ แม กาซูห ดูอี อี มึห น็อห ซืร แตห อัน โบง หมาบ, อึณ ปี แม ดี วี เคร ยอต ปี ดีณ อูน แม. เซ อึณ ยี ตู มึห มาเซ ปี ปึอน อี ดี กาลาง นา ตู หมึอม ลอง แม, แม ดี ปึอน คาฆูน บอด.

11 ดูอี ครัม เฆ นับ ดี ทาง เฆ แฮะ มึห อางยาน. มาแล, ดูอี ฆีน อี มึห อางยาน บอด, อัน บอ นับ ดี ซาคีะ ดี โทม โฆรห เฆ.

12 เซ ดูอี อี มึห น็อห ซืร น็อห หมาน แฮะ ออง, ดูอี กืน บอ แบน น็อห ดาคึย กาเซา. เซ ดูอี ฮาย ยี มึห ปวน ดี อึบ อี, เฆ ดูอี กืน ดี วี เตา, ฮาว เครียง โดว เฆ.

13 เซ แม ตู ซี กาลาง หมาบ แม, แม ตู นับ ดี โบยว ดาคึย ดอ เหมา. อาเซ ยี กาลาง, ยี แวน หมาบ อัน, เฌาพรา ดี วี เฆฌู, วี กาเว อัน.

14 อาเซ โรวเซ เฌาพรา เซเซ, อัน ดี โบยว ดาคึย. อาเซ ยี มึห น็อห ดืร, อัน ดี กาดูห ดูก.

15 ดา กาณา อี ตู หมึอม อี คาหนาบ ดูอี อี ดูก อี หณาบ, อัน บอ ปี มาครังซี อี เรียง ตาง บอ มาเฆรห อี คูงครัห ดี ก็อะ อี.

16 ดา กาณา อี ตู มึห อางยาน, อัน บอ นับ ดี คาหนาบ กาเซา อี เฮา. ดา กาณา อี ฌ็อง น็อห ลอพัะ, อาซาก อัน ดี โต็ง.

17 ดูอี อี มึห หมาบ โกบ ง็อห อัน ดี อี, อัน โลว ฮาว เตา เซเซ. อาว มึห อาเซ อี จอย อัน.

18 เซ แม มึห น็อห ซืร น็อห หมาน, แม ดี ลอด อาเพ อาเร. เซ แม มึห น็อห โฆะ น็อห แฆะ, แม ดี ชึม ดอ ตู โหลห แม.

19 ดูอี อี ออน ดี รัณ มาน เฆ นา, อัน ดี มึห ดี โฮม ลึง ตา ลึง. ดูอี อี กอย ดีโลย ดีลาย, อัน ดี ฆีน เซเซ.

20 ดูอี อี โบง นา หมาน เซเซ, อัน ดี ปึอน ม็องการา แบน โมยว แบน โมยว. ดูอี อี ซี แตห อัน ครัม แฮ แฮ, อัน มืร ตู ลอด คัม หมาบ อัน.

21 เซ ดูอี มึห โดง ร็อก โดง ฌ็อง, อึณ ตู หมึอม. มาแล, ดูอี บอ นับ ดี โบง นา ตู หมึอม, แตห อัน ปึอน คามูน อี แจก.

22 ดูอี อี เฆรียะ อี ซี โบง แฮ แฮ แตห อัน ครัม, อัน ตู นับ, นา อาต อัน ดี วี ฆีน.

23 เซ ดูอี มาโนว อี เฮา, กาลาง ปี ลูต อัน, นา อาต ฮาว ดูอี เฮา ดี บอ อึง อัน หลึอม ดูอี อี โหมว ดี เกา อี.

24 เซ ดูอี ปรา โกรว ฆูณ มา เฆ, ยี ทาง อาว แบน หมาบ, อัน บอ ปี ฆึก ดา โฌน.

25 ดูอี อี มึห น็อห ลอพัะ, อัน โบง แตห อี ลาย กาลูต. เฆ อี หณึม บึง เฌาพรา, เฆ ดี บอ โบยว ดาคึย.

26 เซ แม โดบ น็อห โดว บรีม แม, แม ตู มึห อางยาน. เซ แม กาดึก กาด็อะ ดี ดูอี อี นับ ดี มาโนว อางยาน, แม ดี โบยว ดาคึย.

27 เซ แม กาซาง ดัว ดี ดูอี ฆีน, แม ดี ปึอน แคะ ปี โลว แม. เซ แม ตู มึห น็อห ฌึร ตี, ดูอี กืน ดี บอ ดืง แม.

28 เซ ดูอี ฮาย มึห ปวน ดี อึบ อี, เฆ ดูอี กืน ดี ฮาว เตา, เครียง โดว เฆ. เซ ดูอี ฮาย ยี ชึม, เฆ ดูอี อี มึห น็อห ซืร น็อห หมาน, เฆ ดี มึห เฌะฌูง โตต ดอน โมยว.