อาพูง เฆ ซาเร ตู กาอาบ ดี ดูอี รึร. อึณ ปี อึม ดาด อี โจห อาคราว ซอดาด บอ อึม ฆลาย อี โจห อาคราว โซะ โหงว.

2 โฆรห ดืง อี ตู มึห ดีโคว, อัน ตู ดึร โดว แม. อึณ ปี มาซีล็อห เฆ มาเลว อี บึณ, ยี ตู มึห โดง ดี จูห.

3 เอ โลว ซีเบรียะ มังปร็อง, โลว ดืด ก็อะ มาลา. เซ ยี มูห ดูอี รึร, โลว มัห กาตูะ อัน ตา อึณ เพียะ.

4 แกวะ เวียะ โฆรห ดูอี รึร โดบ รึร อัน. โยว บอ แม ดี วี ปี อัน.

5 เซ แม เวียะ โฆรห อัน, โลว เวียะ อี กาอาบ ดี รึร อัน, แกวะ แตห อัน ทาง อัน แฮะ มึห อางยาน.

6 เซ แม แตห ดูอี รึร แบน ดาลาม แม, อึณ ปี แม แดบ แวน เปลา แม บอ แตห อึณ แบน อาเพ อาเร ดี แม.

7 โฆรห มากาทัะ ปี กาลาง ดูอี รึร อาว มึห ดีโคว. อึณ ปี เปลา แฆะ อี ตู มึห โปลม.

8 อาเซ อืบ มยูก ดูอี รึร, อาว มึห อาฆยึร มาเซ. อึณ บอ ปี อี ดึห มาว ปัก ดึก ดี วัน บอ วึณ.

9 โฆรห มากาทัะ ปี กาลาง ดูอี รึร, อึณ บอ ปี ดีค็อง อี แฮะ ลึบ แคง แด ดูอี อี ยึต ป็อห.

10 อาเซ ต็อห ดี ฌาง ดูอี รึร ฆาย ดูอี ปี ตู นับ อัน, อัน ปี ดูอี อี บัณ อัะ, ยี ตู ยอด นา ดี บัณ อัน.

11 เซ ดูอี รึร วี โบง นา รึร ปอ อู เฌณ, อัน บอ ปี มาโซว อี วี ฮาว โฮม ฮึร บรีม อัน.

12 เซ แม เทว ดี มาโนว ดูอี รึร, อึณ ซี แกน หลึอม แม มาโนว ดูอี อี ปีพูง อัน บอ ทาง อัน มึห อางยาน บอด.

13 ดูอี กราน นับ ดี ต็อห, “อึณ มึห มาครังซี กอย โดบ อึณเตณ. โคว, อาว ปึอน เลห.”

14 มาโลห กาบัด วีว กาบัด เวณ แดง บันโดก. ดูอี กราน บอ อีด กาเบลียะ กาบลัะ แดง กาโช็ง อีด อัน ปาย ตี.

15 อาเซ กราน กาเซา, อัน นับ ดี เบลห แด อัน แคง ซีลัยะ โบม. อัน ยี กราน ดี บาว โบม บลึบ แคง โมต อัน.

16 ดูอี กราน บอ ทาง, อัน แฮะ มึห อางยาน หลึอม บู วี อี นับ ดี กาลาง ซีคยา ลอง ดาง แบน โมยว แบน โมยว.

17 เซ ดูอี อี วีน ดี ลึบ โดง กาเอห อี, ยี ตู มูห อาเร อัน, อึณ บอ ปี อัน ตึณ โหยะ มาโซว.

18-19 เซ ดูอี กาโลว อี เฮา, อัน ปี วี ต็อห, “โอว ลังฆลึอน ปีเยณ,” อัน บอ ปี ดูอี ยอง, ดูอี ฟึณ, อี ดึห บลา อี โดะ เงา, บัณ แตห อี ยัม.

20 เซ อาว มึห เฮ, เงา ดี ยัด. เซ อาว มึห โฆรห ลาย กาย็อง, อาว มึห อี ลาย กาเอห กาแทณ.

21 เซ อี ฮับ กาซ็อห ดี อึณกึร เงา บอ กาซูห มาซีบลาว แคง กาฟาง, อึณ แตห อึณ กูห แบน เงา. ดูอี อี ออน ดี กาเอห กาแทณ ดี อี บอ โบง แตห อี กาลูต, อัน บอ ปาย ตี.

22 เซ ดูอี ออน ดี แค อาฆยาง อี, อึณ บอ ปี ปี ดี โฮม อี ซีแงห ดี อัน. อึณ ปี, แฮะ ลึบ โลง แคง วัต อัน, แตห อึณ ดาคึย.

23 โฆรห งาม อี ซีบลึก น็อห โฆะ, อึณ ปี กาโละ กาดาย อี แฮะ พ็อห อึม รึอน.

24 ดูอี อี ฌ็อง อี เฮา, อัน นับ ดี กาลาง โฆรห งาม. แคง น็อห อัน, อัน ยี ตู ซืร.

25 โฆรห อัน ปี บอ ดาคึย มืร, อาว ปึอน หณึม. แคง น็อห อัน, อึณ บอ มูห โตต อี หมึอม กาอีห ดีโลย.

26 อัน ปี บอ ปาย เหมา ดี เครียง ดี อี เฮา มืร, หมาบ อัน ยี ดี วี ลึห ซีคยา.

27 เซ ดูอี อี ฆึห กาเดา, ต็อห แตห อี เฮา โจห, อัน อี ดี วี โจห. เซ อัน บอ กาหลอย มาว ณัต อี, มาว ตี นับ ดี วี กาหลอย ณัต อัน.^a

28 ดูอี อี ซีมา กาโลว, อัน ฌ็อง ดูอี ปี กาโลว อัน. ดูอี อี นับ ดี ว็อกแวณ อี เฮา, อัน โบง แตห อี ลึร ชึม.